【美食】廣島本通茶の環：多元化的抹茶甜品〔紀念文〕－「立」即去旅行 Lap's Travel

香港食茶の環抹茶軟雪糕就食得多，今次就來到位於廣島既本店，位於繁華的本通，除左地下嗰層賣抹茶產品之外，二樓係提供堂食先有既抹茶甜品，可惜係去完呢間總店冇幾耐之後，於2018年3月31日後食店層已經關閉了，唔知幾時先會有返，呢篇唯有紀念一下這些暫時已離去的抹茶甜品吧。

一入去是賣抹茶的產品，由朱古力、各類蛋糕、曲奇餅、抹茶粉等等都有，我也在離開前去買了一大堆抹茶手信先走，留待手信篇才慢慢介紹。去到因為有其他食客都等緊，所以係升降機口排左一陣隊，好彩只係需要十幾分鐘就可以上去。上到去其實仲有兩層，係一樓會有收銀處同部分座位，先落order然後等之後會送餐，因為這層已經滿席，所以今次再坐上多層。

一坐低會先送上杯茶，然後慢慢等，等食物送來反而等得比較耐，起碼超過20分鐘，不過也好，可以給自己休息一下。

首先介紹兩款抹茶芭菲，食完令人真係大滿足呀！高的一杯抹茶芭菲1200Yen，矮的一杯就800Yen。這裡出品既抹茶雪糕一向都冇得輸，估唔到連芭菲夾雜著的牛奶雪糕都唔錯，每種抹茶製作的配料也不能忽略，由餅乾、脆餅、蛋糕到啫喱，每一種不同口感的抹茶都豐富了芭菲的變化，而紅豆蓉和白玉果然同抹茶是絕配。

一set四款的抹茶甜品，完全滿足哂貪心想樣樣都試哂身為抹茶控的我！抹茶雪糕下面的是淡忌廉和酥皮，加左落去冇話有咩特別左，不過雪糕係好食；抹茶朱古力慕絲蛋糕偏甜少少，抹茶味都濃；抹茶窩夫配上白玉和紅豆，窩夫帶點煙韌，但未算最出色；抹茶蕨餅反而最驚喜，入口既溶又香抹茶味，正！食完咁多甜野，隨餐會送上一杯超苦澀抹茶，中和返口腔內的甜味。