「立」即去旅行 Lap's Travel

第3天（星期二，18/10）

行程：池袋 》東京迪士尼 》池袋

今日係全個旅行的重點，黎東京第三次，終於正式去東京迪士尼啦！！！東京迪士尼有分2個，2個唔可以互通入場，只可以揀一個，事先聲明因為本人係唔玩太刺激既機動遊戲，所以冇揀去迪士尼海洋，而係樂園入面個3大山級機動遊戲都係睇左當玩左。由池袋出發，係到東池袋站搭有樂町線到新木場站轉JR到舞浜，行過去就好快到樂園。因為事前做足準備，所以全部想玩既都玩到、想睇既都睇哂！Hurray！（另外我今次去都撞正萬聖節時間，所以有期間限定野）所以想好似我咁玩哂睇哂既話，可以參考下我呢篇！拎Fast Pass係有限制，每次拎完要等佢張飛上面個時間先可以拎下一張，所以要好好諗清楚玩邊樣。

次序：

1.拎怪獸電力公司「迷藏巡遊車」Fast Pass（10:35-11:35）2.星際旅行：冒險續航  3.大賽車場（已結束營運）4.抽中一個人的夢想II之魔法長青 （傍晚看）5.加勒比海盜  6.返去玩怪獸公司 7. 拎幽靈公館Fast Pass（14:30-15:30）（期間限定）8.歡樂萬聖節遊行 （期間限定）9.頑熊餐廳（午餐）10.小飛俠天空之旅  11.返去玩幽靈公館  12.小小世界  13.拎小熊維尼獵蜜記Fast Pass（16:30-17:30）14.仙履奇緣童話大廳  15.小木偶奇遇記 16.海狸兄弟獨木舟歷險  17.歌舞基地睇一個人的夢想II之魔法長青  18.返去玩小熊維尼  19.去左卡通城一帶睇  20.電子大遊行-夢之光  21.心願寄星空煙花滙演  22.城堡投影秀-童話之夜

1-2. 拎完怪獸公司fast pass後，第一樣係樂園玩既係星際旅行：冒險續航（star war），類似超動感影院，要戴上3D眼鏡，玩完有點頭暈，但超緊張刺激好玩，fing得幾厲害，推薦指數： ★★★★，這款遊戲可以拎fast pass，但我覺得冇必要用係佢身上，因為佢每次都放幾多人入去，而且玩既時間好短，好快又會畀新一班人入去。

3-4. 之後過左隔離玩大賽車場，同香港o個個差不多，個場大少少，玩法亦大同小異，推薦指數： ★★，純粹坐下休息下。然後順便去左隔離小食部買左個三眼仔糯米滋，味道一般但勝在造型精緻可以呃like，而且今次有個期間限定盒呀！

5. 後尾過左加勒比海盜玩，得一開始嚇左一下，後段悶到瞓著咁濟，推薦指數： ★☆，勝在有得坐下。

6-7. 怪獸公司成個過程其實玩得好快，都唔知有冇5分鐘，係坐係架車到揸住個電筒照來照去，玩法就冇乜，勝在過程好似電影咁，造型場景精緻，投入感十足，推薦指數： ★★★★。

8. 日間遊行早少少既話可以霸到前面坐位，仲要記得霸返遊行開始段，可以早啲睇完就去玩，推薦指數：★★★★★，活力氣氛一流，常常會和觀眾互動，大量耳熟能詳迪士尼人物，仲有個樣姣到核爆既女松鼠！！佢堆妖艷眼睫毛同舞姿姣到一個極點！哈哈哈哈！仲有punk版史迪仔！不過迪士尼巡遊和表演類節目真係佢地既皇牌，好識帶動人歡樂既情緒，我見啲日本人都有high同啲表演者好多互動位跟住打拍子咁。

9-10. 睇完巡遊，食下小食米奇頭肉桂條，不錯的味道，然後經過左一堆睇咗當玩左嘅機動遊戲後（三大巨山），就決定先到頑熊餐廳食個午飯-咖喱飯，好多人用左啲時間，味道就不過不失啦。然後就去左玩小飛俠天空之旅，排左半個鐘。雖然佢都係坐係架車度遊走、投入下場景咁，但佢有些微唔同，你入到去會似係空中咁，所有場景都會係你腳下面，構思幾有趣，推薦指數：★★★。

11-12. 到夠鐘就去咗幽靈公館，因為係萬聖節，所以佢係同平時版本唔同咗，變左做Jack，一開頭等入去嗰陣環境都幾黑，成段路程都幾長，亦有好多意想唔到嘅機關，值得玩下既，推薦指數：★★★★☆。跟著玩埋係附近嘅小小世界，同香港嗰個完全冇分別，一樣係悶到核爆，船程又長，我直頭瞓着咗，推薦指數：★。

13-14. 玩左咁多樣嘢，決定來啲文靜小小嘅，所以去咗仙履奇緣童話大廳，亦即係城堡所在地。上邊基本上係關於灰姑娘嘅藝術展品，其中有個展品，灰姑娘個樣好騎呢，大家可以睇吓下面啲圖。另外呢度亦都可以試穿玻璃鞋，構思幾好，推薦指數：★★★。

15-16. 小木偶奇遇記排咗都有15分鐘，但佢玩嘅時間都唔知有冇1分鐘，快到根本咩都睇唔到，印象中好多位都唔關木偶奇遇記事，嘥氣，推薦指數：★。然後我竟然去咗玩一個好劇烈嘅活動—水狸兄弟獨木舟歷險，佢真係要你幫手扒獨木舟，當然會有工作人員帶着，但佢其實一個人都可以扒晒成隻船，不過玩完都幾攰，但可以喺樂園到扒獨木舟係一個唔錯嘅體驗，冇乜幾何，所以推薦指數：★★★。

17. 中間其實我有睇過唐老鴨4D show，同香港迪士尼嗰個完全一樣。至於另一場要抽飛既則同香港迪士尼嗰個show好唔同，這個豐富好多，即使完全聽唔明日文，都唔會影響到觀賞性，推薦指數：★★★★★，完全唔會有悶場。

18-19. 又係時候用fast pass玩最後一樣機動遊戲—小熊維尼獵蜜記，佢同香港嗰個好唔同，佢都係坐係個蜜糖樽既車入面，不過佢唔係有路軌咁搖搖下，而係四圍郁咁，內裡場景也豐富好多，也閒到濃濃既蜜糖香味，推薦指數：★★★★☆。做左咁多款機動遊戲之後，決定唞一唞，所以去咗卡通城睇下。

20. 見差唔多時間，就早啲出咗去中央城堡區霸位。這個巡遊真係要大力推薦，推薦指數：★★★★★★！爆多星畀佢，因為真係超震撼超靚呀！！仲要好多架，同日間嗰個比較係截然不同嘅感覺，形容到我詞窮，睇住呢個巡遊亦令我明白到香港嗰個會蝕錢。

21-22. 晚間電子巡遊後，隔冇幾耐就會放煙花，呢個煙花表演反而比香港遜色，好快放完無乜特別，推薦指數：★★★。不過我後尾明白，因為佢將重頭戲放左係隔10分鐘後既城堡投影show到，完全比個種視覺美學震爆眼球，真心驚訝點解日本人可以將迪士尼玩到咁出神入化，推薦指數：★★★★★★！畀多次爆星，真心希望香港嗰個學下人點盡力做好佢，睇完人地真係明白點解會賺到錢，佢真係每一個細節，無論係食物造型、精品、定節目安排都真心去please每一個來賓，亦好說服到每一個來賓去用錢係呢間東京迪士尼。

足足玩了差唔多12個鐘，要睇嘅要玩嘅要買嘅都齊了（包括薯蛋頭爆谷桶呀！勁靚！）就出返去池袋去山形牛一頭買ぃ 牛兵衛草庵燒肉（按名食評）晚餐，然後返酒店休息，呢日真係充實到爆！

「立」即去旅遊Youtube channel、Facebook專頁、Instagram、Pixnet：

Youtube Channel：https://bit.ly/2scNVfk 

FB： https://www.facebook.com/lapstravel/

IG：lapstravel