【美食】大阪梅田函館函太郎迴轉壽司：新鮮高質抵吃壽司 @ 「立」即去旅行 Lap's Travel

位於Grand Front Osaka南館內的函館函太郎是一間非常有質素的迴轉壽司，亦是我選定了會重複光顧的餐廳之一（舊一篇按此），上次來大阪吃過都驚嘆佢用料的新鮮，所以今次帶埋母親來盡情吃吃吃！今次來到這裡要等一下位，但也不算太耐，就趁空檔睇下餐廳門牌今日有咩特別推介。

比起上次來，今次再不是一張翻譯了的紙餐牌了，取而代之係用ipad落單，同時間亦直接有中文版本方便像我這種的遊客。內裡氣氛熱鬧輕鬆，少了一種高級餐廳的拘謹。

以下落黎就係今次食過既壽司啦，總共吃了13碟壽司和2款小食：

首先介紹既係和牛壽司，牛肉味很香濃，雖然未至於入口即融，但口感非常軟稔而不會韌，食落帶點牛油感；另一樣係炙燒吞拿魚，燒完後魚油香出哂來，入口即融，高質素的吞拿魚。

接下來是炙燒了一下的赤海蝦，一吃就知道是新鮮貨色，咬落去很爽口，加了沙律醬帶出了蝦的鮮味；炙燒鯛魚就相對地冇咁出色，賣相雖然很靚，但吃下去就比較燒得熟了一點；帆立貝就鮮甜肉厚，必點之選！三文魚子咬下去卜卜的爆開，新鮮的滋味就迅間在口裡爆發了，又是另一鮮味之選！

跟住到兩款蟹膏軍艦，橙色那款多左陣香草味，反而我覺得失色左，被種味蓋左陣蟹膏香；而灰灰地那種就食到濃郁的蟹味，膽固醇再高也不怕，一定要食！還有新鮮北寄貝，在香港很少有得吃新鮮的，煮熟了的口感會比較韌，這種生的反而是爽口，可以趁機會試下生的。然後就是我encore了兩碟的穴子了，亦即係海鰻，很喜歡那種獨有的味道，入口沒有河鰻般彈牙，比較軟身一點，一放入口就溶化了，而且冇咩魚骨，係我的最愛！