【美食】山口縣下関市唐戸市場：週末假日限定海鮮街－「立」即去旅行 Lap's Travel

位於山口縣下關市的唐戶市場，和福岡縣只是一個海峽之隔，非常近北九州的門司港一帶。佢平日只係一個普通販賣漁獲的市場，但當到左星期五至日及公眾假期的時候，呢到就會舉行「活きいき馬関街飲食イベント」，市場1樓的部分檔攤會變成售賣海鮮的食店，然後係市場內或海旁找個地方慢慢品嚐新鮮的水產。唐戶市場雖然只是一個小漁，但因為這裡一帶盛產河豚，所以又有「河豚天堂」之稱，市場內也會見到各種河豚刺身或是相關食物出售。

如果從博多出發去唐戶市場，可以先搭JR新幹線去到JR小倉站，然後轉普通線去到JR門司港站，站外約3、4分鐘路程就會見到碼頭，直接搭船去下關，船程大約10分鐘，搭船嗰陣已經會見到唐戶市場棟建築物。而一落船見到大大個河豚模型，就知道已經進入左唐戶市場既範圍啦！由碼頭行過去大約需要5分鐘。

今次來到的時間比較早，雖然未至於人山人海到好似年宵咁，但人流一點都唔少！賣野食的攤檔基本上集中在兩條巷，大部分也是以售賣壽司為主，大部分都是100Yen起，最貴的只是3、400Yen，而且每一件也是份量十足，性價比很高，睇啱邊檔睇啱邊款，就可以和店主拎個發泡膠兜自己夾。除左壽司之外，亦有海鮮丼、炸物和燒物等選擇，真係令人花多眼亂。

買好食物要搵地方食，可以上2樓有啲櫈同枱，又或可以到市場外海旁搵個位，吹住海風慢慢嘆。

最後揀左燒穴子、帆立貝、拖羅、三文魚子、赤海蝦、海膽壽司，再加多個海膽丼做早餐。整體上壽司幾好食，拖羅肥美、帆立貝肉厚、穴子入口即溶、蝦肉彈牙、三文魚子新鮮，唯獨海膽係敗筆，尤其係海膽丼，望落幾靚點知係伏，入口又澀又苦又帶腥，千祈唔好試，雖然個丼只係1000Yen，但無謂嘥錢，買多幾件壽司好過。其實原本食完壽司之後再去買啲熟食試下，點知最後被我見到有隻大老鼠，正所謂寧被人知就莫被人見，係咁既情況之下，食慾已被影響，所以最後冇再食到。