【觀光＋遊記】Day 3 淺遊「北九州 + 廣島」初春之旅 2018 (遊由布院散策)－「立」即去旅行 Lap's Travel

第3天（星期六，10/3）

行程：博多》由布院》小倉》小倉灣第一酒店Kokura Bay Hotel Daiichi

前一日已經執好哂行李，所以今日一早起身梳洗完就可以輕輕鬆鬆咁去check out酒店，因為今晚要轉酒店去小倉瞓一晚，然後再第二日下午就會落廣島。落小倉之前就已經預左差不多大半日會去期待已久的由布院啦！去程會直接搭巴士出發，而回程去小倉就搭JR由布院之森列車，交通詳情可（按此）。要拖住件行李去巴士站，所以就預多左時間慢慢行，巴士站就在JR博多站旁邊，去到巴士站就順便係便利店買左兩個飯團上車當早餐。

由八點幾上車，搭左接近兩個鐘頭後就到差由布院啦。成程車其實坐得幾舒服，乘客未至於爆哂，而座位與座位之間距離好闊，所以可以挨到好低都唔會影響到人，可以安心睡覺，我都差不多瞓足成程，不過越近由布院一帶的景色越美，千祈唔好掛住瞓而唔睇下，哈哈。落左車之後，因為仲係拖住兩件行李（出發前已資料搜集知道車站前的手信店有提供行李寄存服務），所以就即刻去寄存行李既地方。這邊的行李暫存服務由早上9點至到下午6點，分為locker同人手看管，一件500日圓而2件就800日圓，每多一件都只係多300日圓，超化算！如果有帶行李而有需要暫管的話，絕對要揀呢到，而且光顧寄存行李服務仲送左兩件零食（？）

行李安置妥當後，就開始漫遊由布院啦～向住由布岳出發！第一站首先要做既係醫肚，去左由布院最出名既由布まぶし心（按名食評），一開門營業就即刻衝入去，如果唔係有排等。呢間餐廳最出名既就係一鍋三食既陶鍋飯。食飽一落到樓，就見到有架馬車經過，同四圍既休閒感覺好配合。之後其實都係邁向金鱗湖的方向前進，中途入左7仔見到嗰抹茶大福，即試！呢個真係冇得輸！標榜用左1.2倍抹茶，食落去真係濃味到不得了，外層少少煙韌但入口就即溶、中間抹茶忌廉包著黑蜜糖，濃濃抹茶苦澀味之中又有黑蜜糖的甜味平衡返，好味到癲！重點係這個出色的蕨餅只係需要120 Yen咋！（可惜賞味期限很短）

一直在湯之坪行去金鱗湖，沿路兩旁其實有好多特色小店，但決定唔入去睇住，直接去左金鱗湖先。由車站一帶出發既話，大約行20至30分鐘左右就會到。金鱗湖面積唔係好大，湖的西邊湧出溫泉而東邊湧出的卻是清水，形成了溫冷水各佔一半的湖，至今湖底仍不斷冒出溫泉。溫泉和清水的溫度差令湖面上産生濃霧因而成爲代表湯布院的景色之一，泛起迷霧的通常在9月至3月之間的清晨時份, 甚及冬天的時候才會有機會看到，可遇不可求。

雖然今次來到就冇泛起迷霧，但幸好天色晴朗，陽光照射在湖面的閃爍爍光，真的有幾分像金色的魚鱗，湖上仲有小鴨幾隻，湖裡又有不同的魚兒，加上湖邊的一間餐廳，構成的畫面確實帶有幾分歐洲的色彩。可惜的是，是日係星期六，四圍的遊人多得很，多多少少破壞了金鱗湖的寧靜。圍繞著一圈走，會走到另一邊的小神社和小小的水中鳥居，這邊遊人相對較少，算是可以感受一下金鱗湖的寧靜美。

欣賞過後，就回到湯之坪兩旁的特色商店，邊行邊看邊吃邊買，輕食綜合篇可（按此）。

はちみつの森Honey Bee，見到好多人吃它的蜂蜜雪糕（這天太陽暴曬超熱），但因為已經吃了好多甜的所以冇試，反而裡面有一樣野令我印象深刻，就係有成隻蜜蜂係入面既蜜糖，蜂巢浸蜜糖就見得多，但這個原隻蜜蜂就真係望落有點驚嚇而且佢係made in Japan，估唔到日本都會做呢類昆蟲浸野，感覺有啲似我地既老鼠酒同蛇酒。

由布院ガラスの森，地下一層主要賣的都是玻璃工藝品，二樓就是雜貨如音樂盒咁。玻璃工藝品形形色色的好多款，靚係幾靚但費事買返去的途中會打爛，所以睇完就算數。

蜂の巢 Craft & Cafe外觀是一間玻璃屋，在湯之坪街道上特別吸引人注目，一樓是賣手工藝品，二樓是Cafe，手工藝品大多是木材製品，但價錢有點偏貴，而且店內嚴禁拍照，所以當作在欣賞藝術品逛一下就算。二樓的Cafe不知道什麼原因，呢日來到沒有開，所以無緣上去睇下係咩樣。

Yufuin Floral Village是2012年特別建造的一個以英國童話氛圍為概念的小鎮，內裡的建築物較一般的矮，就像是童話故事中才會出現的夢幻小屋一樣，而裡面店鋪賣的東西都是跟歐洲有關的東西。這小村是免費進入的，四圍有圈養一些小動物，例如山羊、松鼠等等，還有間貓頭鷹cafe（要另付費入場）。走一圈其實不用太多時間，個人覺得堆砌感覺太濃厚，所以好快睇完就走返出來，經過一去兜過圈也無妨但不會逗留很久的一個景點。

Snoopy茶屋由布院店，全世界第一家的Snoopy茶屋，食品賣相很可愛。除了食物外，內裡也有很多snoopy的精品，當然少不了那些地方限定和期間限定的啦，是粉絲的話絕不能錯過。

還去了一間叫藥味家的店，專門賣各種柚子胡椒，紅、橙、黃、綠等等很多色，其實用的是不同辣椒，好辣的朋友買來做手信也不錯。

一邊睇一邊行返去車站，再睇下有咩手信買。原本已經劃了5點幾的由布院之森列車既飛，但見咁早行完，所以就去車站同職員改劃3點幾的班次。因為成段由布院之森列車的車程比較耐，所以當感受過之後，搭到去別府就落車，然後再用張pass劃車票，搭另一架快速點的列車去小倉。

去到小倉其實已經差不多6點，於是乎就去左今晚住既小倉灣第一酒店 Kokura Bay Hotel Daiichi（按名介紹）放低行李整頓一下先。話說小倉是著名漫畫家松本零士很喜歡的地方，所以這一帶有好多其著名漫畫《銀河鉄道999》內裡角色的銅像和佈景板公仔等等，可以讓粉絲集下郵。放好行李後就出去行下，順便去晚餐。小倉這個城市給我的感覺很有趣，它的規劃就像一個舊式的未來城市，從前的人想像了未來的模樣規劃了這個城市，但現在看來一切都已經變成了舊事舊物，這種差異性是日本其他城市未從給過我的，就如《銀河鉄道999》咁，從屬於未來的現代，看著過去盼望的未來。

四圍行下，去到商店街，見到這間舊式的麵包店，吃了一個只需40Yen的忌廉卷，味道甜得來很實在，外皮很鬆軟，這個價錢的小甜吃現在可以在哪裡還找到呢。

然就就到今晚晚餐京壽司（按名食評），這間回轉壽司的CP值很高，吃多兩碟也不會傷荷包，所以客人也很多。

食飽就慢慢散步返酒店休息，途中係便利店買左啲飯後甜品同飲品，那個在Lawson買的tiramisu 雪糕味道超好，咖啡味奶味平衡得好好，見到可以買來試試；至於泡芙就一般般冇特別；Starbucks買既兩杯飲品，一杯就一睇就知係抹茶就不介紹了，而另一杯係櫻花士多啤梨latte，但兩杯味道其實都麻麻地，可以慳返。翌日上午還會留在九州，下午就會過廣島了。