「立」即去旅行 Lap's Travel

從福岡前往由布院，有兩種方法：

1.JR由布院之森

2.高速巴士

係今次行程入面，我兩種方式都體驗過，從博多出發到由布院就是用高速巴士的方式；而從由布院去小倉就用JR由布院之森。雖然我本身有買到JR北九州pass，但我會選擇搭高速巴士出發，原因係自2017年夏天九州北部有水災，以至連接兩地的路段被沖毀，令到成個鐵路行程由從前的2個小時左右從博多直達由布院，變成了兜大圈的由博多途經小倉、別府、大分再到由布院，要成4個幾小時，除了長時間車程折磨人外，班次時間亦變得不太好用，而且要坐特色的由布院之森，每日只有去程兩班車，回程兩班車，詳情請按官網網頁。（好消息係：JR九州係今年4月宣佈預計2018年7月14日會回復返本來的路線）

至於搭高速巴士，就是我今次搭的「士ゆふいん号」，每日有多班巴士來回福岡及由布院，由福岡西鐵天神高速巴士終點站出發，途經博多巴士總站、福岡空港國際航線，再到由布院車站前公共汽車中心落，如果本身沒有買北九州的 JR Pass 的話，大家可以選搭高速巴士，巴士單程2,880 日圓，來回票 5,140 日圓（平均 2,570 日圓一程），平過單買JR接近1/3價錢。先教大家如何在官網購票，基本上官網有提供中文版本，所以購票是完全沒有難度的，官網：http://www.atbus-de.com.t.jo.hp.transer.com/

先揀左上角的預訂

再來就係要揀選出發及到達地方，離開縣就係福岡縣，而到達縣就係大分縣，再選揀路線、上落車的車站及出發日期。

再選擇出發時間，巴士公司有2種，但唔使理。

下一頁再輪入人數同確認要買來回定單程。

最後輪入個人資料，然後付款。之後會發確認信send去email，將張確認信帶去就得。

而我今次則是在博多巴士總站上車，成段行車時間大約用左2小時。博多巴士總站就在JR博多站旁邊，巴士站是接駁博多地下鐵、地下街，又或者好像我一樣，從地面直接行過去。

博多巴士總站有3層，規模都幾大，1樓主要係市內巴士、2樓有間便利店。

而前往由布院、大分、別府和黑川溫泉等等的高速巴士則是在3樓。3樓的巴士站有8個，往由布院的是在34號。當天乘客不少但又未算爆，可能因為我乘搭時間比較早（大約早上8點幾），建議早一至兩星期預先購票，以防買唔到。

上車前會有車站職員核對資料，因為一個站位會有幾架去唔同目的地既巴士，以防上錯車，記得要查清楚！如果有行李的話，職員會指示大家自己放入巴士下面行李位。

回程的時候，因為唔係返博多而係去小倉，係由布院留到3點多就決定離開，本身見這天有時間又有北九州pass，所以就試下搭這架豪華的JR由布院之森列車。（事前其實mark左當日5點幾先走，但見已經行得七七八八就去車站轉時間）

搭呢架車既人唔係好多，應該同佢成程要4個幾小時有關（好彩7月會變返2個小時，到時人流應該會增加返）。車廂望落去係幾豪華的，不過當日出面氣溫其實都幾高，差不多有成廿幾度，但車廂內係冇冷氣仲要放暖氣，所以其實係一個溫室來的。廁所都好乾淨，不過行車期間左搖右擺，去廁所是有一定難度的。

列車中間有一節係小賣部，有唔同既紀念品可以買，有襟章、明信片、記事簿、電話吊飾等等，價錢由2百幾Yen到2千幾Yen都有，基本上係座位到張小冊子都有哂價錢可以睇到。當然唔少得仲有賣食物同飲品啦，有特色便當之外，仲有係由布院勁搶手，常常迅間賣完既b speak瑞士卷蛋糕，仲要係最常售罄既細size，不過好像得原味而且每人是限量購買的。

而小賣部旁邊還有得蓋個紀念印和關於由布院之森的擺設。另外，係行駛期間車廂職員會拜訪乘客，為乘客與由布院之森的獨家照片板合照，塊板上面有哂日期咁。

最後因為車廂實在太熱，而且行車時間實在太長，所以係JR別府站就落左車，然後轉左另一架快點既列車搭過去小倉（快半個鐘左右）。如果夏天有返冷氣又回復返原本的車程時間，坐住這架由布院之森慢慢欣賞風景，應該係一件休閒寫意的賞心樂事。

個人體驗覺得巴士其實搭得幾舒服的，因為座位與座位之間距離算闊，即使把椅背拉後也不會造成對後面乘客的騷擾，加上行車相對列車來說還穩定一點，沒有列車般左搖右擺得咁誇張。另外，相對由布院之森，巴士的班次又頻密很多，而且地點上比較有彈性，可以去機場上落有得，變相計劃行程上可以更靈活，但就少了搭列車般的賓至如歸的乘客體驗（又有糖派又有職員招待大家），我相信行車時間變回和巴士差不多時間的話，由布院之森又會變回從前般熱鬧，到時候又會一席難求，如果恢復原本路線之後，記得要劃定位哦～因為全車是指定席的。兩者交通方法各有優劣，有時間的話就不妨兩者都感受下啦！

高速巴士 士ゆふいん号官網：http://www.atbus-de.com.t.jo.hp.transer.com/ (詳情請參閱網站🙂)

JR九州官網：http://www.jrkyushu.co.jp/chinese/ (詳情請參閱網站🙂)

「立」即去旅遊Youtube channel、Facebook專頁、Instagram、Pixnet：

Youtube Channel：https://bit.ly/2scNVfk 

FB： https://www.facebook.com/lapstravel/

IG：lapstravel