「立」即去旅行 Lap's Travel

來到北九州廣島的中段，會在小倉這間小倉灣第一酒店Kokura Bay Hotel Daiichi 逗留一晚，來北九州的人應該會比較少在小倉這一邊留一晚，但因為我來的行程當日是由博多搭巴士去到由布院，再從由布院去小倉會比較順路，加上之後嗰日會係上午參觀門司港，下午出發到廣島，為免要走回頭路和比較慳時間，所以決定留一晚係小倉。在這邊揀酒店的原則，最緊要的依然係近車站和便宜，係google map看的時候，地圖show出來都幾近車站，但到左現場實際行一次之後，路途都幾遠。

一出左JR小倉站之後，係北口會直接接駁住條天橋，沿住天橋向右行，差不多到天橋尾就左轉，會見到間lawson，然後就落返地下。

繼續沿下面方向行，中間會見到間apa hotel，再繼續行，再經過一間便利店叫Daily Yamasaki，這間便利店已經係最近酒店的一間，然後行多5分鐘左右。

去到呢個近海既位轉入去就會見到，旁邊是一大棟民居住宅來的。官網寫徒步需要7分鐘，但最尾應該用多了一倍有多。（拖喼再耐少少）

可能因為位置比較偏遠，所以四周圍都好靜，又由於酒店轉左入去，所以唔近大馬路，沿路行過來街燈都幾昏暗，而且人煙非常稀少，連入住後都唔多覺有好多住客。來到酒店之後，發覺reception 係一樓，而且係冇電梯得樓梯，可能酒店比較舊式，要帶住個喼托上去真的唔惹少，呢到要扣分！而地庫嗰層有間酒吧，但經過幾次都完全冇人，雖然check-in嗰陣櫃臺送左張免費啤酒券，但最後都係冇用過。

去到酒店大堂reception，又係話自己攞過乜乜獎咁，但係reception 到就聞到一陣陣煙味，真係又扣哂分！而且職員英文不太好，所以有什麼事情要找職員幫忙的話要注意一下。

上到房間層，一層都有好多間房而且都幾密，但就大部分都冇人入住既。入到房就比想像中大少少，行李夠位攤開，床辱是屬於偏硬那一種，唔算太好瞓，而且間房開盡哂燈都仲係好暗，又一扣分位。。浴室係典型商務酒店用嗰種，不過呢到比較再殘舊一點，而且浴簾又係有點污漬，又係扣分位。

最重要係酒店房間係冇獨立冷氣，亦冇暖氣，所以入到去嗰陣完全係一間焗到飛起既溫室來！後尾雖然可以開窗，但因為窗口對面就係民居住宅，而且距離非常之近，是很不令人安心的，這點真係大打折扣！

酒店外面景觀

整體來說，這間酒店設施完全停留係上個年代一樣，沒有從住客的角度出發，所以很多設施對住客來說很不方便，附近又很荒蕪，而且地理上又不算很近車站，唯獨真的很寧靜這一點是不能否定的。

優點：入住價錢實惠、環境幽靜

缺點：浴室浴廉要加強清潔、地理位置不便、酒店房間冇獨立冷氣冇暖氣、房間昏暗、設施殘舊、reception 聞到煙味，印象分大減、進入酒店要行樓梯冇電梯，有重行李就大穫

推薦指數：★★

抵住指數：★★★

預定的網站：Expedia

地點：福岡県北九州市小倉北区浅野2-17-31

Website：https://www.kokurabay.com/ (詳情請參閱網站🙂)

「立」即去旅遊Youtube channel、Facebook專頁、Instagram、Pixnet：

Youtube Channel：https://bit.ly/2scNVfk 

FB： https://www.facebook.com/lapstravel/

IG：lapstravel