【美食】大分由布院由布まぶし心：三種食法的陶鍋飯－「立」即去旅行 Lap's Travel

基本上個個黎到由布院要搵食的話，首選一定係呢間由布まぶし心，從報章雜誌和網路上都得到一致好評，吃過之後也確實有名不虛傳之感。由布院車站前（分店）和金鱗湖（本店）都有店，兩者同樣係長人龍餐廳黎嫁！

而我今次光顧的就是車站前的分店，一出車站就會見到由布岳，向著由布岳靠左邊行就會見到餐廳，不過它門口好細，因為餐廳主要係2樓，所以記得抬高過頭望下唔好錯過左呀！如果冇預約就最好一開門即刻來，我今次係佢一開門就衝入去，雖然裡面仲未有人，但職員也問有冇訂位，因為我坐得之後發現，其實好多張枱都已經留左座，由坐低到叫完野食，一瞬間已經全餐廳滿座，目測大約8成枱都已經係訂左座，所以要walk-in而唔夠早既話，要有定心理準備等一段時間。

裡面提供三款陶鍋飯，分別係豊後牛、地雞和鰻魚，除了釜鍋飯之外，仲有一些單品可以叫，不過我見枱枱食客基本上都係叫這三款飯為主，冇乜人叫單品。餐廳有提供中文menu教食客點樣可以試到陶鍋飯既唔同風味，亦即係都係一鍋三食，一食係直接吃，品嘗原味、二食係加漬物、小菜和調味料、三食係加入店家的自製高湯變成湯飯。

雖然三種都很想試試，但胃既容量有限，所以最後選擇左豊後牛（2361日圓）和地雞（2176日圓）兩款set，一開始就來左各款調味料，每樽調味料的蓋上面都貼住相應肉類的貼紙，用以食既時候增加味道既層次；然後就到前菜上枱啦，賣相睇落去簡單而平平無奇，但其實每一款都好好食。先講下筍酸梅漬，我本身好怕食筍陣味同梅嗰種酸，但呢兩者擺埋一齊係意想唔到咁夾！筍咬落去幼嫩而爽口脆身，加上微微的酸辣醬就帶出佢既鮮甜，再將梅漬放入口，嗰種酸並非很強烈霸道，而係帶點溫婉細膩，和筍互相配合，一酸一甜一脆一軟很醒胃。

然後到秋葵，很多人怕吃那滑潺潺的質感，但這個做的非常好，帶點微酸的醋中和了那潺潺的口感，咬落去既甜又香，是我最愛的前菜之一。再來就是芋頭、牛蒡，吃得出原始的感覺和味道；還有魚糕、油豆腐和玉子燒，三者很樸素但卻有純厚的味道。

因為飯是即叫即燒的，一般來說要等15至20分鐘，前面慢慢的咀嚼品嚐前菜，時間就來得剛剛好。飯上枱嗰陣會有埋啲漬物分開上，有青瓜、紅蘿蔔絲、醃菜、昆布同醃大白菜，用於第二種食法時，增加味道和口感。

陶鍋飯來了，一打開鍋蓋，地雞腿肉鋪滿滿的一層，都看不到白飯，雞肉間又夾雜著雞肝，我不吃雞肝，所以吃剩了，但雞肉雞味濃又滑；至於豊後牛也是鋪得滿滿，炭火燒烤的牛肉切成薄片，外圈微焦中心卻粉嫩柔軟，咀嚼著滿是肉汁好嫩滑，兩者都好惹味。另外，不得不提米飯，口感軟熟又充滿水份，有些部分更有飯焦，吃起來米粒顆顆飽滿又有米香。