【美食】別府地獄蒸工房鉄輪：日版蒸氣鍋－「立」即去旅行 Lap's Travel

別府最著名的就是溫泉，繼而衍生出來的這間地獄蒸工房鉄輪（地獄蒸し工房鉄輪），就是利用溫泉地熱所產生出來高達98度的天然蒸氣，再用蒸籠把食物放入蒸氣中慢慢蒸熟，據說由江戶時代已經流傳下來，能夠吃出食材最天然、最新鮮、最原始的味道，有點像平時香港食到的蒸氣鍋，很多來別府觀光的遊客都會慕名而來，是別府人氣很高很受歡迎的餐廳。另外，蒸氣烹調所需的時間比較耐，所以記得要自己預好時間（這餐用了1個半小時左右）

我上午參觀完溫泉地獄一帶才走過來（海地獄走到白池地獄，然後就會回到鉄輪），大約十點半左右，幸好很早來，因為在用餐嗰陣已經見到門外要排隊等候，加上這種料理的方式比較用得多時間，如果遲一點先來，應該會不知道等到何年何月~門外有得試飲熱熱的溫泉水，喝了一口，就像生銹了的水般難飲，好彩只斟了一小啖。

餐廳左邊位置就是蒸氣烹調的地方，行近一睇真係煙霧瀰漫。入到餐廳之後，基本上這裡是全自助形式的（搵位、買食物券、拎餐具和洗碗等），多人就要先向職員登記。

冇乜人的話就可以係餐牌睇下想食什麼，然後係自動售票機購票，之後去櫃位畀食物券給職員，職員會把食材執好，自己再攞出去蒸籠位置，再跟著職員指示放落去蒸，食物會一層層放落去，因為係自己放落去，所以蒸嗰陣記得帶返對手套！同時間會有個計時器，跟據不同食材所需的烹調時間去拎返出來，中間等待的時間就要自己係餐廳搵定位和拎餐具。此外，購票嗰陣除左食物要付錢之外，同時間亦必須付錢去借蒸食物個兜，價錢係510日圓。

食物一共叫左三款，有餐廳既人氣no.1，餐牌上係16號的豚肉shabushabu（1500日圓）、6號的海鮮套餐B（1500日圓）以及12號的蔬菜薯仔套餐（700日圓），初初以為份量唔多所以叫左三款，但結果係比想像中來得誇張，食到肚都脹埋！蒸蛋嗰陣可以揀想食到咩效果，因為想食溏心蛋，所以蒸的時間短一點，連埋豚肉大約用左十分鐘左右。蛋就好濃蛋味，係略嫌溏心效果唔夠出，有得蒸少點時間會好點。豚肉望落去唔係好多，但下面既芽菜同椰菜份量就真係唔講得笑！到最後係食唔哂堆菜~個人建議點柚子醬油，食落去清新一點可以解膩，至於豚肉食落去柔軟而且冇平時的豬肉臊味，加上蒸出來原汁原味，堆菜鮮甜得來又吸引左豚肉既精華，絕對值得推介。

食到咁上下又要出返去拎海鮮啦，大約用左廿分鐘左右，有蝦、蠔、帶子、魷魚同魚肉丸，基本上蒸海鮮係點都唔會有得輸，而且啲貝類都清潔得很乾淨，所有海鮮食落去係依然會彈牙爽口而冇腥味，特別驚喜係魷魚、魚肉丸同蠔，香港蒸海鮮都比較少食蒸這類魷魚，估唔到咁爽口、蠔食落去好juicy好甜帶少少海水味、魚肉丸就彈牙唔腥，整體上都好好食！