【遊記】Day 2 (上) 淺遊「北九州 + 廣島」初春之旅 2018 (別府半日遊散策)－「立」即去旅行 Lap's Travel

第2天（星期五，9/3）

這天是超早起身，因為行程非常緊湊，要上午去別府，下午去太宰府，其實兩個地點一點也不順路，但因為逗留在九州的時間不多，不想之後走回頭路，所以唯有今天匆忙一點和犧牲一點睡眠時間，朝早6點幾出發去到車站，係便利店買少少早餐係車上兼係列車上瞓返補眠（博多去別府一程也要大約2小時）。同時亦係開始用之前買的JR北九州3日pass，係前一晚已經係票務中心兌換好今日用既車飛，入閘嗰陣唔使過機，而係行去站長嗰位畀職員檢查通過的。

在出發之前已經做了大量資料搜集，無論是交通路線和時刻表的計算，初時真的是看得一頭煙。別府地獄區主要分為兩邊，一邊是以海地獄為主，加上鬼石坊主地獄、灶地獄、鬼山地獄和白池地獄，一共5個地獄都是屬於可以步行的範圍之內；而血池地獄和龍卷地獄則屬於另一邊的範圍，但那5個要去另外2個，就一定要搭巴士了，因為路程都幾遠。至於鉄輪則可算是兩者的中間點，從海地獄一帶逛完後，可以在這裡搭巴士去血池地獄，相反亦然。

另外，如果係從JR別府駅開始行程的話，亦可以購買巴士一日乘車券，巴士線其實很容易明白，分為兩種：
（A）循環線（綠色路線），會途經血池地獄、龍卷地獄和鉄輪，順時針方向的16、16A巴士是別府去鉄輪再到血池地獄再去別府、逆時針方向的26、26A就是去血池地獄再到鉄輪，環狀線繞一周，所需時間很長，所以建議去鉄輪直接搭返紅色路線。
（B）往返線（紅色路線），可以搭的班次很多，有2、5、7、9、41號等，主要會到鉄輪方向，部分會直達海地獄，但不經血池地獄那邊。

如果由JR別府站出發，建議路線有兩種：
（1）JR別府站—>紅色巴士路線於海地獄前落車—>海地獄、鬼石坊主地獄、灶地獄、鬼山地獄、白池地獄（由山上沿路而下行）—>鉄輪並於地獄蒸工房鉄輪用膳—>鉄輪搭綠色巴士線於血池地獄前落車—>血池地獄和龍卷地獄—>JR別府站

（2）JR別府站—>綠色巴士路線於血池地獄前落車—>血池地獄和龍卷地獄—>鉄輪—>紅色巴士路線於海地獄前落車—>海地獄、鬼石坊主地獄、灶地獄、鬼山地獄、白池地獄（由山上沿路而下行）—>鉄輪並於地獄蒸工房鉄輪用膳—>鉄輪搭紅色巴士路線—>JR別府站

如果想完全參觀整個地獄巡禮的話，建議購買共通券，1800日圓就可以去哂全部7個，而如果獨立每個入去的話，一個地獄入場費則是400日圓，基本上去5個就會回本。原本打算以第（1）條路線遊走整個地獄巡禮，但後來發現即使已經是超早的來到，如果食埋那餐地獄蒸的話，預了一整個上午都不太足夠，所以最後決定放棄了去血池地獄和龍卷地獄，直接回JR別府站返博多，打算去哂咁多個的話，記得要預留多點時間。共通券和巴士券都可以係JR別府駅的遊客中心買到，當地人用的是上面張圖那個，而外地遊客則是用中間圖那個中心才對。

（1）海地獄

車票和共通券都買好就正式出發啦！搭巴士大約20分鐘就會去到海地獄前落車，沿住指示行入去就會搵到。過左售票處之後，見到四圍都係煙，側面有兩個大既蓮花池，夠哂古色古香，聽說夏天來的時候，蓮蓬會生長得夠大，可以承載一個小朋友既重量，不過現在未係時候，所以冇乜花又冇乜葉係呢邊。

繼續行入去，要入去海地獄，這個地獄都幾多人，唯一一個出入口就是一整間土產店，日本人真識做生意～不過睇手信要慢慢來，所以先去看海地獄。入到去一開始只係見到煙，泉水顏色同個樣就乜都見唔到，好彩等左一陣煙就開始散。泉水的顏色是Tiffany Blue，加埋側邊有些鳥居，成個構圖都幾靚幾仙氣。（留意這裡路面濕滑）

睇完影完相，就入左土產店醫肚兼行下買手信，試左別府地獄名物之一：地獄蒸布甸同布甸銅鑼燒，布甸很滑，雞蛋味很突出，焦糖部份苦澀味很濃，所以整體上布甸唔會話好甜，可以試下；而布甸銅鑼燒則是很普通，不是特別軟熟，可以不吃。

行完土產店之後唔好以為就行完海地獄，另一邊都有少少野睇，例如有個泥紅既泉（算係睇左個迷你版血池地獄，哈哈）、仲有個溫室版蓮花池，而呢到真係有幾棵開左既蓮花，幾靚但好似長輩圖，哈哈。

臨返到出口，有一檔係賣另一種地獄名物，叫極樂饅頭，不過我覺得嗰樣就麻麻地又唔想食到咁飽，所以冇試到。

（2）鬼石坊主地獄

出左海地獄向右轉上去行十幾步說會到鬼右坊主地獄，同剛剛的海地獄相比，這裡的範圍細勁多，人煙也非常稀少。

內裡基本上是一個個泥漿溫泉（大約3、4個），望落去似煲緊芝麻糊，充滿著花生眉豆雞腳湯既氣味，旁邊仲有歷史介紹同有啲叫鬼之鼻鼾，係一堆噴煙既石頭。由於範圍好細，影完相行個圈都只係用左10分鐘左右。

（3）灶地獄

出返去之後就慢慢下落山，沿路係海地獄旁有個叫山地獄，這個在共通券內係冇包既，要另外付費入場，裡面其實只係睇下用溫泉水養住既動物，所以我就冇畀錢入去。行多5分鐘左右就會見到灶地獄門口。

呢個地獄分左一丁目至至六丁目，由六個不同又小小的溫泉而構成，有啲仲可以飲用，有啲就畀人浸腳湯。

最大的一個是五丁目，據說池水係會不轉的變色，像我一開始見到的是Tiffany Blue，但之後又變左深藍咁；另外仲有個六丁目，剛好有個韓國團的導遊係到示範向住個池吹煙，然後個池就開始不停咁噴煙。

臨到出口又係賣用泉水蒸氣蒸熟小食的店舖，不過我又係冇食到就走左。

（4）鬼山地獄

出左灶地獄之後，鬼山地獄就在對面，呢個地獄充斥著好多條由溫泉地熱和泉水養住的鱷魚！一開始先睇下啲標本以及一啲養緊既BB鱷魚。

出左標本室後，見到一個個好高既圍欄，裡面就係住左鱷魚啦！其中一個欄係特別大，裡面亦住左最多既鱷魚，起碼有五、六十條，場面都幾壯觀，不過可能呢日幾凍，所以佢地唔係好郁。

（5）白池地獄

睇完鱷魚後，穿過一條短短商店街，就會來到這邊範圍的最後一個地獄—白池地獄，亦係我本人覺得最搵笨既地獄！如果要自己付錢入來就一定唔會睇！不過見共通券包左就睇埋當回本～

裡面就只係有啲佛像、有啲望落似大陸水缸養住既魚同魚標本，加埋一個細細既白色池，就冇了！加埋唔使5分鐘行完，難怪這個地獄冇遊客。

（6）地獄蒸工房鉄輪（按名食評）

行完這區範圍內的5個地獄，一直由山上行下來，白池地獄再落少少就係鉄輪，呢個時候就係用餐時間，亦係喺別府用得最多時間逗留的一個地方！因蒸氣烹調所需的時間比較耐，加上這裡是全自助形式的，要自己洗埋碗，成餐差不多用左個半鐘先食完！

整體上都幾好食，可能原材料靚，而且又有得自己落手玩下，成個過程都幾開心，但亦導致了之後唔夠時間去埋嗰兩個地獄。

總體來說，有啲人覺得這種看池水景點會比較無聊，覺得人造規劃出來，但其實要規劃得有心思也不容易，加上有得食下蒸氣鍋，我覺得都值得來一看既。整個上午就在別府中度過，食完餐蒸氣餐之後就返左去JR別府站行下買手信，站出面有得浸下手湯，玩夠買夠到夠鐘就返博多，又要搭返2小時列車了，因為下午要去太宰府。（待續）