【美食】福岡博多博多華味鳥（博多駅前店）：雞！全部都係雞料理！ @ 「立」即去旅行 Lap's Travel

水たき即係水炊鍋，是博多地區充滿著代表性的傳統料理，至今已經有一百多年的歷史。至於水炊鍋的主要材料就係雞肉啦，所以水たき即係雞肉火鍋的意思，這種雞肉火鍋以雞所熬出來的高湯作為湯底，這些湯因為長時間的熬煮所以有豐富的骨膠原而有美容功效（據說？）。今次光顧的博多華味鳥在博多駅附近有三間分店，我去的是博多駅前店，從JR駅行過來大約需要8-10分鐘左右。這間店走的是傳統高格調的氣派，來到的時候店員也是著住和服招待人客的，如果預算不充足的朋友而又想試一下的話，可以在中午時間來，餐廳會提供午市套餐。

基本上每枱客人之間也有足夠的私隱度，店家除了日本menu，當然還有英文和據說有中文menu的。這裡是設有最低消費的，每一位客人是需要點一款火鍋套餐的，價錢由2900Yen到5xxx Yen都有，即使是散叫一些雞肉的菜式，都係要每人點一款火鍋套餐的（不過事後證明，來這裡吃火鍋就好了）。

落完單之後，食物就開始逐一上枱，首先一來是兩小碟前菜，右邊粉紅色一舊的是明太子，其實我是第一次吃明太子的，也不知道怎樣才是好的明太子，只是覺得食落去鹹鹹的帶點微腥，鹹鹹香香中有一丁點的辣，口感有點像吃蟹子、三文魚子嗰類但就煙韌少少，不難吃但也不算很愛吃；另一碟類似蒟蒻咁吃下去很爽口，配上柚子香的醬汁鹹中帶點甜和香，既開胃又好吃，很合我心水。

再陸續送上其他前菜，三小碟的分別是蜆肉、八爪魚肉和菜，全部吃下吃的好鮮甜，八爪魚唔會話好韌、蜆肉冇沙又唔腥；然後就到很有衝擊性的雞肉刺身和炙燒雞肉！炙燒雞肉比較韌，唔算好好食，至於雞肉刺身，係放入口之前的確需要一點勇氣跨越一下心理關口，反而放左落口之後，味道較想像之中溫和，帶有少少煙燻既香味，而且口感很軟腍鮮嫩，比較似食緊魚生咁，再點一下柚子醋，帶出肉的甜味而且冇肉腥味，絕對係比想像中好食！最後仲要炸椰菜仔和筍，炸得唔錯，但我不吃筍的～

然後上枱的一款散叫的鐵板烤雞腿肉，佢賣相望落去惹味吸引，以為實安全，點知食落雞肉唔多有味而且肉質很韌似咬香口膠，雖然可以點一下旁邊柚子胡椒，令佢有返點辣味，但依然改變唔到佢口感韌過香口膠既事實。

之後終於開始上雞肉火鍋了，食之前侍應送上了一塊流程牌，係介紹成個過程係點食，一開始望住啲湯以為佢好淺色就冇乜味，侍應隨即裝了一碗湯再加些少蔥花給我，喝了一口就知道係真材實料，入口係好濃郁雞湯，飲完有點膠質蓋住嘴唇的感覺！然後侍應夾了一件雞肉給我，真係食雞有雞味！肉質結實得來又好嫩滑！

基本上前面大部分時間都係由侍應招呼的，食食下就開始佢會放雞肉滑落去，整成一粒粒雞肉丸，同時亦會放雞肝落去一齊滾熟。之後就到自己落手落腳啦，可以自己落啲蔬菜和粉絲落去。特別推薦食雞肉丸，彈牙和軟腍並重，而且雞味濃，很好食！我本人唔食內臟所以唔知雞肝點，但雜菜汲取哂雞湯既精華，所以變得好甜！最後可以揀飯或是全蛋麵作結尾，我就揀左麵，麵質很彈牙又索哂雜菜既甜味味和雞湯既味道，一個字：正！