【遊記】Day 1 淺遊「北九州 + 廣島」初春之旅 2018－「立」即去旅行 Lap's Travel

第1天（星期四，8/3）

行程：香港》福岡機場》福岡博多站前太陽線酒店Hotel Sunline Fukuoka Hakata Ekimae 》博多站附近

這次去九州的時間都唔錯，朝早11點幾先上機，可以係屋企瞓飽之後先出發，然後再係機場食埋早餐，就搭豆腐火腩飯去福岡啦！

比原定時間早了十幾分鐘落機，就即刻行快兩步去入境，因為三點幾呢個時間係好多人入境！好彩通關都算幾快，出左關去到機場大堂真係四圍都係人，但係望落去機場好似唔係好大，左邊就係遊客諮詢中心，而右邊就係一大堆交通售票處，因為剛好有Aeon JCB卡做優惠，可以免費換兩張巴士券（一來一回機場又得，兩張換哂單程又得），順理成章就揀左搭巴士而冇搭地鐵去博多。至於巴士站就係正機場門口外，見到係自己目的地既巴士就上車（巴士冇行李位，要自己拎住）。

大約搭左20分鐘左右就去到JR博多站，因為是日落雨又拖住個喼，所以第一時間先去連住兩晚的福岡博多站前太陽線酒店Hotel Sunline Fukuoka Hakata Ekimae（按名介紹）check-in整頓一下。酒店都算唔錯，幾近車站又幾新，反正也是早出晚歸，所以企企理理就可以。

然後就出發去第一個目的地:博多城的Pokémon Center 啦（按名介紹）！但係喺呢個時候，蝦碌野就發生啦，諗住拎部相機出黎影相嗰陣先發現，原來我冇帶記憶卡呀！唯有之後睇下有冇地方可以買到啦T^T。這間Pokémon center 比較細，所以都唔係行左好耐就轉行其他地方。

行到咁上下諗住去食晚餐嗰陣，一出就見到啲樹著哂燈，聽講係期間限定的櫻花燈飾，真係好靚！然後就慢慢行向晚餐既地方，一間專門食水炊火鍋（亦即係雞肉火鍋），叫做博多華味鳥的餐廳（按名食評）。餐廳係走傳統和式路線，會有專人服務，整體上水準都唔錯，雞肉嫩又有雞味，加埋多菜少肉，都算食得幾健康。

食飽就要行下消化下，不過行街之前首先要做正經野，就係用之前買落既北九州JR三日pass換定黎緊幾日要用既車票啦！換票位置就係JR博多站中間站，係間好多人排隊賣牛角酥既店對面，入面有講國語既職員，佢會畀張紙你填目的地、出發地、時間等等資料，填好就去櫃位，職員好快就會出好車票，有啲人會覺得咁快換好哂好冇彈性，但其實如果到時有咩更改都可以隨時用張pass再換過另一啲時間或者目的地咁，以備不時之需，好過到時冇座位（一般我會預計2到3個時間給自己走盞，始終預計不了用幾多時間參觀，所以我今次都有2、3次調動過）。另外，我來的時間是比較晚，所以冇乜人，如果日頭來換票的話，應該會大排長龍，建議可行的話就晚上來。