【遊記】Day 2 (下) 淺遊「北九州 + 廣島」初春之旅 2018 (太宰府半日遊散策)－「立」即去旅行 Lap's Travel

第2天（星期五，9/3）

行程：博多》別府（地獄遊）【上】》太宰府》天神》博多【下】

中午返到來JR博多站，因為有點事情所以先返左酒店一轉，途中經過Pao crepe milk，提供超便宜又高質素的crepe，有好多口味，今次試左朱古力香蕉及開心果味，朱古力香蕉味吃下去很濃郁，食落有香蕉蓉，那些牛奶忌廉又滑又奶香味重；開心果味又係勁濃開心果打成的忌廉，一吃就愛上，重點系一舊只係百幾円，性價比超高，食多幾個試多幾款都唔會肉赤！

返完酒店之後再出發去太宰府，從博多出發去太宰府有3種方法：

1.係博多巴士總站搭西鐵巴士「旅人」前往，時間大約40分鐘，車資600日圓。（查詢）

優點：不用不停轉車、車程時間短

缺點：繁忙時間有機會塞車、車資較貴

2.係博多JR站到二日市，然後步行到西鐵二日市站，轉搭西鐵太宰府線至太宰府站，時間大約80分鐘，車資JR：270日圓、西鐵150日圓，共420日圓。

優點：如果配搭JR九州pass可以慳到一程，變相只需要150日圓車資，冇配搭都係最平的方法

缺點：時間超耐，而且JR二日市站行去西鐵二日市站幾遠下

3.係博多坐福岡市地鐵到天神站，行去西鐵福岡站轉搭西鐵天神大牟田線到西鐵二日市，再轉太宰府線至太宰府站，時間大約50分鐘，車資地鐵200日圓、西鐵400日圓，共600日圓。

優點：避免路面塞車、車程時間較JR方法短很多

缺點：車資和搭巴士一樣，但就要不停轉車

最後我是以方法3出發去太宰府的，因為多時比較接近繁忙時間，所以先否決了巴士方案，然後就是雖然有九州pass，但我出發嗰陣已經係2、3點，太宰府一帶店舖和天滿宮5、6點就已經開始收，為左慳時間就否決埋JR方法。

去到太宰府一出，旁邊就係大大間一蘭拉麵，冇人排隊但都冇話特別大興趣，所以就繼續行。沿住太宰府表參道慢慢行到盡頭就會係天滿宮，沿途兩旁有各種唔同既商店，當然唔少得係呢到嗰間特別既starbucks啦！係2011年由建築師隈研吾以2,000根杉木木材交織不用任一根鐵釘而建成，絕對係打卡必到！除此之外，太宰府另一名物就係梅枝餅啦！據說呢種餅係因為以前一位老婆婆將栗子餅燒在梅枝上，送給因冤罪而遭左遷至太宰府的菅原道真而得名而來。到到都係賣梅枝餅，點解會揀かさの家呢？一來呢間最多人排隊(只係排幾分鐘，而且望住師傅既製作過程，時間好快過)，二來佢係少數即叫就拎即製既梅枝餅畀客人，新鮮熱辣，其他有些是預先整好了有塊透明包裝包住，會容易整淋。梅枝餅食落係糯米皮帶點煙韌又有點脆身，內裡係豐富紅豆餡，但不會過甜，有點像旺角奇趣餅家的燒餅，但佢煎左脆身點、好食點。

食完梅枝餅就過隔離既Kingberry，佢係2017年先開業，主打以福岡士多啤梨「甜王」製成甜品的專門店，當中最收歡迎的就是甜王芝士蛋糕啦！來到店舖的時間比較晏，內裡的堂食企位就已經封住左，唯有買完之後再搵個位食啦！（一開始還以為是布甸）一打開樽甜王芝士蛋糕，已經聞到陣陣士多啤梨香味，果肉份量十足，而且甜王的甜味和酸味平衡得剛剛好，芝士蛋糕奶酪味道好強，兩者互相發揮出大家的優點。

食完野都差不多行到天滿宮了，太宰府天滿宮是九州最重要的神社之一，每年參拜人數多達850萬人以上，與京都北野天滿宮同為天滿宮的總本社。來這裡的人很多都是為了求學業成績，因為這裡是供奉學問之神菅原道真之地，所以先會見到太宰府表參道咁多關於祈求學業成功的副產品。

係太宰府天滿宮門口位，有一座叫「御神牛」的牛型銅像，是這裡的吉祥物。據說摸它的頭和角可以增加智慧，摸它的身體可保平安和健康，所以見到佢有好多位置都被摸得很光滑，哈哈。

除左求學業之外，這裡其實亦係著名既賞梅勝地！每年2月到3月，這裡就會有約6000多棵梅花樹綻放盛開！想像下個畫面都覺得靚，更何況我今次可以置身其中！今次來九州很近櫻花期的，但最後還是無緣看櫻，而梅花勝在開花期較櫻花長，見到成個梅花林入面有神社，見到咁既畫面也令我心滿意足了。

係行完太宰府返去車站嗰陣，係太宰府表參道經過見到這間揚子江店，它們的豚肉包曾被選為日本豚肉包的第一位，好像很厲害。一拎上手就個包份量十足，大過我手掌！內裡豚肉夾雜著洋蔥，吃起來味道還可以，不算太驚喜。雖然個包係好大，餡料佔的比例也很多，但也許個包蒸得比較耐所以好濕，搞到一拎上手就好易爛開，食到好雞手鴨腳，個人覺得級數只係比唐記好一點，不試也沒有損失。

返到太宰府站，行左陣lawson見到有抹茶大福，身為抹茶控就梗要試下啦，但唔夠7-11出嗰隻咁濃咁好味。然後慢慢搭返去天神站落車行下街，其實因為擺左個大烏龍，帶左部相機黎九州但冇帶SD card，所以要去買返張。買完之後就想搭車返博多先，中途經過見到之前池袋食過既Ringo吉士蘋果酥，決定回味一下！

回到博多站之後就係時候晚餐啦！今晚食既係喺全日本都有連鎖店既牛舌專門店—利久牛舌（按名食評），係香港比較少有這類食品既店，所以來到日本一定要食下。食飽就要買下手信，因為第二日就要離開福岡，轉移到另一個地方。臨返酒店執行李之前，這兩晚都見到係JR博多站有間大排長龍既麵包店—il FORNO del MIGNON，最多人排隊買既係牛角酥，試左焦糖、原味同蕃薯，但其實除左平之外，係脆既但好似就冇乜特別咁，印象唔令人深刻。