【遊記】Day 4 淺遊「北九州 + 廣島」初春之旅 2018 (門司港上午遊、廣島下午遊)－「立」即去旅行 Lap's Travel

第4天（星期日，11/3）

行程：小倉》門司港/下関市》廣島》廣島法華倶樂部酒店Hotel Hokke Club Hiroshima 》廣島市内

一清早連早餐都未食就出發去門司港啦！因為第一站會直接出發到門司港對面既山口縣下關市既唐戶市場食早餐。從小倉的酒店直接搭JR出發到門司港總站落，過去前將件行李先放係JR小倉站locker，搭到門司港大約只係需要十幾分鐘就到，成個站都充滿舊西方式味道，有啲佈景板位係畀人影相，連搭過來的列車都好似之前係東歐搭過嗰啲咁。

略略睇過下就即刻衝去搭船，碼頭就在車站一出轉左大約三、四分鐘步程，剛好來到有班船差不多要開，即刻嗱嗱臨買好船飛趕上船。其實門司港這一帶是有種叫關門海峽四葉草pass可買的，這個pass包含左來回門司港和唐戶市場的船票、唐戶市場往來關門海峽隧道（關門人道）的巴士票以及潮風號乘車券，成個pass一共800Yen超化算值得買（詳情可按官網）。原先的路線係諗住由門司港搭船去唐戶市場，然後搭車去關門人道行返去九州，再搭潮風號返九州鉄道記念館，即係兜一圈咁觀光。不過，我最後冇買到呢個pass，原因之一係潮風號係我來的時候適逢停駛期，計完數唔太化算。

搭船過去嗰陣可以慢慢欣賞下風景，上層冇遮冇擋，但超大海風，下層就完全係室內，架船開得都幾快，大約5至10分鐘左右就落船。

沿著海岸線行就來到第一站目的地—唐戶市場（按名食評），早餐都未食就梗係要第一時間衝入去開餐啦！這個市場係逢星期五至日及公眾假期先有這條海鮮壽司街，慢慢睇下揀下，揀完就搵個位慢慢食。整體上，海鮮都幾新鮮，可惜的是原本食完壽司之後再去買啲熟食試下，點知最後被我見到有隻大老鼠，正所謂寧被人知就莫被人見，係咁既情況之下，食慾已被影響，所以最後冇再食到走左。

係唐戶市場出來之後，係海邊望過去條橋嗰個位就係關門人道嗰位，起初諗住慢慢行過去，沿途都幾多大型神社可以睇下，但行左20分鐘都未到，就最尾決定搭巴士，上左巴士5分鐘就落車，其實應該行多15分鐘左右就會到，哈哈。好快來到關門人道既起點，呢條行人海道隧道最特別之處，係佢橫跨左兩個縣，行畢全條隧道大約需要15至20分鐘。進入隧道是免費的，除非係帶住單車進入，就要畀20Yen。今次來到剛好是隧道的60周年，估唔到有咁多年歷史。

係隧道的開端和終點會有歷史介紹，而且兩邊都有紀念印章蓋，兩個蓋好加起來才是一個完整的印章，頗有心思的。一開始從隧道望入去，有種一望無盡的感覺，而且完全是密閉式，感覺有點可怕。

一直行行行，終於來到兩縣交界線，亦意味著行左一半啦！

最後係關門人道出來後，就需要步行返JR門司港站一帶，路程勁遠，行左成半個鐘有多（其實係關門人道出口有巴士可以搭的，但班次勁疏落，成個鐘先得一班，剛好出到來走左一班所以無謂等）。沿途的風景優美，經過民居又冇乜人好寧靜，中途仲會經過停駛左既潮風號站，可惜冇得搭，用左好多腳骨力！

一直行都冇乜人，直到返到來門市港歐陸式建築物群一帶，終於多返好多人氣！有國際友好記念圖書館、舊門司三井俱樂部、藍翼吊橋（被稱為「戀人之聖地」，每日會固定幾個時間升起，最遲係下午4點）等等，不過我冇乜點參觀到，係出面影張相打左卡就算。

來到呢邊係海峽plaza，有餐廳、手信店，遊客好多。而因為門司港最著名的是香蕉，所以特別多香蕉類製品既手信，當然唔少得要慢慢睇慢慢買。除左香蕉之外，門司港另一特色美食就係燒咖哩，係返小倉之前，決定係JR站旁邊的Bear Fruits午膳（按名食評），試下什麼是燒咖哩～食落去其實就係焗左既咖哩飯。

返到小倉就要準備出發去廣島，今次會直接搭新幹線去，一程要7千幾Yen，冇劃位（不過架車一點也不full，所以好彩慳返唔劃位）。其實JR有pass係廣島山口，可到博多、小倉、下關、宮島、尾道等等，但計完數就發覺同我本身北九州三日pass重疊左，要用的交通又cover唔到個pass價錢，所以冇用到，有興趣可以按官網看看。子彈火車的流線型外觀好有型，行車整度勁快，有時候會因為氣壓而耳仔痛！但車廂座位和溫度也令人感到好舒適，體驗感覺不錯。

由小倉搭過來廣島大約只係需要45分鐘，真係超快！一落到JR站，見到瀨戶內地區最出名的檸檬蛋糕，忍不住買返個算，然後就移動去搭路面列車，順便係車站買定明天要用到的一日乘車乘船券，可任搭一整日的路面電車和出入宮島的松大汽船，為840Yen（詳情按官網），買好就搭路面電車出發去酒店。

咁早來到冇得check in住，所以先放低行李係酒店再出去行下，是日仲見到有遊行活動。首先去左下午茶先，就係香港citysuper都會搵到佢踪影既茶の環（按名食評）。可惜係去完呢間總店冇幾耐之後，於2018年3月31日後食店層已經關閉了，唔知幾時先會有返。

第二站就出發去廣島sogo百貨公司入面既Pokémon center（按名介紹），是日因為有活動，所以成間分店超多人超熱鬧超開心！

行完之後已經買到成手抹茶野同Pokémon 野，決定先返去酒店check-in先。今次係廣島咁多晚，都係入住廣島法華俱樂部酒店Hotel Hokke Club Hiroshima （按名評價）。好多遊客揀酒店的話，一係就會揀近JR廣島站既一帶，一係就好似我咁會選擇位於本通既一帶。視乎行程而定，如果除左廣島之外，會去埋廣島周邊的話，住在JR附近的確比較方便，例如如果去宮島既話，搭JR的話會比在市內搭路面列車快好多、如果會去吳市或是岡山的話（有買JR pass的話），出出入入都會靠JR，但這邊就相對地比較少點逛街的地方和店舖也收得冇咁夜；而本通就是廣島最熱鬧的一帶，很多百貨公司、商店街等等可以行，店舖收得較晚，餐廳又多選擇，去廣島市內景點又方便，例如廣島平和記念公園就可以徙步也到達得到，即使要去宮島也可以搭路面電車很方便。

Check-in完放低戰利品再整頓下就再出發，去酒店對面既和平記念公園，入面還有平和記念資料館、國立廣島原爆死者追悼和平紀念館（按名介紹），可惜來到已經過左啲資料館既入場時間，唯有明天再抽空過來看看。現在先係公園四圍看看，碰巧這天來的日子是3.11日本東北大地震的記念日子，在這個象徵和平的地方有官方活動予民眾參與，祝福災民。是次活動就是將災民、學生等所繪成的、製作成的蠟燭燈，砌出311的字樣作祈福，現場還有合唱團在旁唱歌，整個環境和氣氛令人有種莊嚴、有點傷感卻有帶點盼望的感覺。