「立」即去旅行 Lap's Travel

第6天（星期二，13/3）

行程：廣島 》廣島機場 》香港

來到今次旅行的最後一天，早上10點40就會搭巴士出發到廣島機場返香港～要來往廣島機場和廣島市區的話，暫時冇任何JR或是列車，只有靠巴士來往兩者，巴士會經JR廣島站以及本通的廣島巴士總站，班次都幾密，所以今次我就冇預先買車票。而因為昨晚朋友腸胃炎又痾又嘔冇乜點瞓，唯有8點幾自己一個出去食早餐行下，睇下有乜最後衝剌～咁早都冇乜店開，就去左Doutor啦～

叫左個A餐，有份烘底三文治加杯飲品，味道都唔錯。

食飽之後再四圍行下，順便買啲保礦力、暖水畀朋友，然後原本諗住去長崎堂買盒出名既長崎蛋糕返香港，已經係開門前30分鐘去到，但點知都係好多人，等得開門都排唔切隊，唯有放棄留返下次先。蛋糕就買唔到，唯有去7仔買杯今日先新出既抹茶甜品杯，上面一大堆抹茶忌廉、抹茶蕨餅、白玉同紅豆蓉，下面係成杯抹茶慕絲，成杯唔太甜又好濃抹茶味，好正呀！

之後返到酒店check out拎行李，行去巴士站途中都不忘要買買買，行到邊買到邊。巴士站就係廣島sogo上面，特登預左時間係sogo的手信層買埋先去搭車。

去到巴士站就直接去櫃位買車票，係票務站出面既2號巴士站就係搭去機場的，成架巴士連一半座位都未坐滿，車程大約1個鐘。

凖時到達機場後，就會發現廣島機場真係好細！成個機場大堂一眼望哂！不過麻雀雖小但五臟俱全，買手信既部分超大，基本上所有廣島特色土產，大部分以食為主，由廣島蠔、檸檬類製品、茶之環等等都可以搵到。

係機場又見到八天堂既機場限定口味奶油包，今次係檸檬味，食後感就係……有檸檬忌廉餡既餐包。

三樓就主要係餐廳同展望台睇飛機，地下一層有機場唯一一間便利店Family Mart。

廣島機場真係好靜而人流又少，全日由廣島出發的國際航班，就只有我飛返香港嗰班Hkexpress……而飛來廣島的也只有5班……因為真係太少人，連check in既櫃位都係借用左ana航空嗰位。

然後就離境過海關，海關後嗰位就已經係候機大堂，又係一眼望哂勁細！得三個停機坪，小買部得個小小的、手信店有一間就冇了。

到夠鐘就上機，今次就搭腸粉返港～期待下一次去旅行！

「立」即去旅遊Youtube channel、Facebook專頁、Instagram、Pixnet：

Youtube Channel：https://bit.ly/2scNVfk 

FB： https://www.facebook.com/lapstravel/

IG：lapstravel