【住宿】上野御徒町精選永安國際酒店 Hotel Wing International Select UenoOkachimachi－「立」即去旅行 Lap's Travel

之前來東京試過住新宿、池袋和淺草，而今次決定住的是之前未住過但同樣出入交通都好方便既上野，而且今次揀既呢間上野御徒町精選永安國際酒店 Hotel Wing International Select UenoOkachimachi仲要係2018年5月先新開，距離我今次入住的日子半年都未夠，加上當時網上做緊優惠，所以就揀左佢。先講下地理位置，如果係去JR上野站的話，近一點冇乜野睇的出口就大約行5分鐘左右，兜遠少少行亞美橫町就10分鐘左右；行去metro上野站都係5分鐘步行路程，而御徒町就7至8分鐘左右；最重要係酒店附近就係來回成田機場的京成鐵路總站，像我今次搭Skyliner 來回，拖著行李去酒店都係10分鐘內就到，走嗰陣直頭可以買到最後一刻先搭車！

酒店附近有Family Mart，旁邊又有大大間7-11，唯獨要去超市就要係JR上野站嗰邊先有。酒店門口好細，初初以為好細，但其實佢係長條型，一入去就有個休息位，可以係到坐低飲返杯野，有咖啡、朱古力、茶同水等等，呢一點好貼心抵讚。加上適逢萬聖節，大堂都佈置得很有氣氛，感覺親切。

再行入少少係lift位，最入就係櫃臺。如果未夠鐘check-in，酒店有提供足夠空間畀住客暫存行李，我見有人係日本網購左貨品，酒店都有接收服務。員工態度親切，入住時仲幫我們join做會員，可以之後儲分或入住唔打掃既話，就會送返支水。此外，酒店lobby都有售賣一些上野、東京的紀念品，有興趣可以睇下。

這間酒店每一層都有唔同既主題，今次我住的是12樓，主題係森鴎外，一出lift就見到由隻雀仔做既主題裝潢。另外，訂購入住時係包埋早餐的，早餐位置就在二樓，不過地方好細，而且提供的也只是普通幾款麵包，所以我也只是去試一次而已。

至於房間方面，先講下值得讚既部分。冷氣機是分體式的，可以自己調較真的很好（因為真的在日本試過住係中央冷氣）；沖涼既花灑係可以調較不同模式，這點在一般商務酒店來說是比較少見；最值得欣賞既係酒店有提供一部智能電話供住客使用，呢部電話可以帶出去用，而且係完全免費上網同打電話，連打國際電話都係免費！激讚！講完優點，就到缺點，首先房間好細，連一個30吋行李喼要打開都非常勉強；其次酒店附近好多商店都好早收，唔似新宿、池袋咁，行到夜一夜都仲得；第三，酒店附近係亞美橫町一帶，好多居酒屋和漁檔等，所以衛生情況和治安相對地差一點；最後一點最不能接受的，是wifi問題！！佢雖然有提供到wifi，但唔知點解入住咁多日都用唔到！係幾部電話都係咁！不停連下又斷線，一係就完全連唔到！對於一個現代城市人來說，簡直就是像冇左條命咁！哈哈！這方面，酒店真的要大大改善！