【遊記+觀光+美食】Day 5 淺遊「北九州 + 廣島」初春之旅 2018 (宮島半日遊)－「立」即去旅行 Lap's Travel

第5天（星期一，12/3）

行程：廣島》宮島》廣島市内

今日終於去成個旅程既重點之一，有日本三景之一的稱呼既—宮島。因為唔係住近JR附近，所以由酒店出發的話，最方便就係搭路面電車，而前一天已經在廣島車站買定左1 day pass，可以今日任搭路面電車和包左來回宮島既松大汽船，唯一可惜的是登上宮島彌山的纜車在維修當中，只好留下一點遺憾，給自己一個藉口可以再來一次。從酒店行去紙屋町東站之後，搭2號車大約1小時在總站落。

搭路面電車的話，去宮島的碼頭就在旁邊，如果係搭JR的話，就要行一段小距離。

其實廣島除左廣島燒、廣島蠔之外，還有一樣名物就係星鰻（又名穴子），受到廣島優良環境既孕育，星鰻的高品質絕對能夠和宮島蠔齊名。所以係搭船入宮島之前，先去左一間叫上野商店あなごめしうえの的星鰻專門店，創業於1901年的百年老店，係tabelog有著3.7的高分數。因為只係想淺嚐一下以及抱著去宮島野餐吃便當的心，所以一盒兩個人分，無謂霸住餐廳的堂食位置，而一盒便當為1944Yen，價錢也不算便宜。

買完之後就行去搭船，碼頭旁有一大間賣手信的土產店，不過諗住去完宮島再返出來慢慢行同買，費事要拎住行。而由於有pass，所以上船嗰陣畀職員睇一睇就得。架船可以容納很多人，下面嗰層仲可以畀車搭，可以畀車搭既船現在係香港真的很少見。

無論搭邊種船係接近宮島嗰陣，都會見到嚴島神社既水中鳥居嫁，不過如果搭JR船的話就會比起松大既船較接近一點。成段船程大約十分鐘左右就會到，落左船之後可以係information centre 到拎返份宮島地圖，包保行到邊到都唔會當失路。

出左碼頭之後就會見到鹿仔啦！相比起奈良既鹿仔，雖然數量上係少點，但這裡的就溫馴很多，沒有咁大攻擊性，不會不停問人拎野食，牠們也很會擺pose望鏡頭，很得意的！

同鹿仔玩左陣同影下佢地寫真之後，為左避免想食既餐廳之後會好多人，所以先前往去用餐。至於之前買了的星鰻便當，就留待晏一點再吃。沿途行過去餐廳會經過宮島最繁華的商店街，不過現在不看住，醫完肚再參觀完名勝後再慢慢逛。

醫肚既餐廳就係位於商店街當中的牡蠣屋（按名食評）啦！呢間餐廳在島上好出名，仲拎過米芝蓮網上推介，絕對有質素保證！加上來到四面環海的宮島，吃宮島蠔是常識吧！啲蠔新鮮又肥美，令人一試愛上！

食完豐富嘅一餐之後，再繼續向着嚴島神社的水中鳥居方向前進。途中仲見到有日本新人結婚，坐住人力車係商店街接受群眾嘅祝福～係接近嚴島神社入口之前，會見到很受歡迎的紅葉堂本店！創業於明治45年，主力售賣廣島地區特有的紅葉饅頭。（說穿了其實就只是類似人形燒咁，燒餅包住啲紅豆餡、吉士餡等等，純粹外型唔同）和其他售賣紅葉饅頭的店舖不同，這裏的紅葉饅頭食法是即叫即炸版本。

店家提供三種口味，分別係紅豆、芝士和吉士，每件180円，雖然好多人買，但因為製作量快又多，所以人龍清得很快。係自助販賣機自己購票，然後將票交給廚房位，佢俾個籌你，大約5分鐘內就會有得食。

最好食係紅豆，順序係芝士同吉士，炸了的紅葉饅頭外脆內軟，芝士有微流心效果，味道帶點鹹唔甜，芝士味唔太濃；反而吉士好普通；紅豆餡則是最好，突出到饅頭炸皮嗰種香味而又唔會太甜。店舖有提供熱茶供食客享用，內裏完全採取自助形式，是食完饅頭和飲完茶後要懂得自己收拾好，把垃圾分類。

連飯後甜品都食埋之後，終於行到來水中鳥居啦！係鳥居嗰最佳拍攝位置，會有專人付費攝影服務，而且呢個位有好多鹿仔，鹿仔、水中鳥居配上蔚藍的天空，畫面很美，不愧為日本三景之一。而要睇鳥居其實係唔使俾錢入去嚴島神社的。水中鳥居喺潮退和潮漲既觀賞效果很不同，可惜喺網上做資料搜集嗰陣，話今日潮退潮漲效果唔明顯，意味著只會睇到潮退嘅效果～其實即是冇做資料搜集，神社門口都有提供潮漲潮退嘅資料，方便遊客。遠睇鳥居唔覺得有咁大，但現場企喺佢隔離嗰陣，就會完全感受到佢嗰種宏偉和神聖。

係鳥居影完一輪相之後，決定係入神社之前，係神社外圍行一圈先。首先會穿過塔之岡隧道，然後就會去到島上面嘅其他文化財產，例如五重塔和千疊閣，雖然我行左好多次級樓梯上去，但最後都係冇俾錢入內參觀，不過呢邊嘅景色對住海，觀景一流！

行返落去近嚴島神社附近，因為這天天氣很熱，見到一間叫做伊都岐咖啡的店舖，就諗住買番杯嘢飲解下暑，另外呢度仲有和八天堂crossover，店舖限定的伊都岐咖啡口味麵包，一見到「店舖限定」呢四個字，即刻忍唔住要買來試試！伊都岐咖啡係宮島唯一有自家烘焙咖啡公司營運的咖啡店。杯檸檬飲品有少少搵笨，差唔多有三份二杯都係冰，雖然解渴但唔抵飲；至於個包，就係咖啡奶油餡嘅餐包。

還有沒有開的彌山纜車……

不停食食食之後，終於要入去神社參觀！這個神社係全日本約500座嚴島神社之首，神社內大部份建築以及收藏萬物都被列為國寶。整個神社也是以朱紅色為主，其中供奉神明的舞台位置對出就是鳥居，傳說鳥居是人間界連接生命所居住的神域通道，係潮退既時候係完全見到有條路通向鳥居咁，真的幾厲害。

神社內有座反橋，佢亦係屬於國家文化財產，早於鎌倉時期經已記載，傳聞只有天皇的使者才能使用這座橋。係現場睇到嗰陣，條橋既傾斜度好高！係正面睇嗰陣會覺得條橋通向天一樣，這些建築物的細節令人佩服！行完神社出到來仲見到梅花添！

參觀完之後就坐係海邊野餐，食埋今朝買既星鰻便當。飯盒既復古包裝很精美，食既時候雖然已經凍左，但依然食到穴子的香烤味，口感並非入口即溶但帶少少煙韌，而且冇魚骨和魚油味濃，相信如果熱食效果會好好；至於珍珠米好香好好咬，凍左先食有點可惜，估唔到既係連飯盒內既酸薑都好好食。

食飽飽又觀光完，就係時候要購物了。來到商店街有各式各樣的手信店，其中最特別要提到的，是宮島出產的飯勺，飯勺上面用毛筆寫左啲祝願字眼，最多係寫「必勝」，但應該主要係用來作擺設吧，毛筆字寫左還可以拿來裝飯嗎？哈哈。有興趣又想特別小小的話，仲可以張自己提供的照片印落飯勺到當手信買走，雖然我唔知有咩用，但都幾有特式丫哈哈哈。另外仲有啲特色小食，例如酥版既紅葉饅頭、星鰻饅頭，不過實在食得太飽，又冇乜人光顧，所以就冇試到。