【手信】淺遊「北九州 + 廣島」初春之旅 2018－「立」即去旅行 Lap's Travel

前半段係九州既行程嗰陣，因為成日要搭JR穿州過省，有好幾次都要拖住件行李四圍去，為免行李太重要拖住行，加上每次住既酒店都係1日起2日止，實在冇乜閒情逸致去執喼，所以係九州買既野就未至於好多，反而之後係廣島就買得比較多點，用盡觀光以外既時間去購物，收穫也豐富一點，而所買的當然離不開大部分是以食為主。

首先就介紹下係九州買左啲咩，中間下方係別府買的就只有那對赤鬼小朋友襪仔，因為係別府都只係留左幾小時，只有係參觀地獄遊既時候有機會買下野；另外仲有係中間威化卷嗰兩盒係Lawson買既普通零食，左上角個包係7仔買既brownie，朱古力味濃郁但同時都幾甜。而因為適逢係白色情人節，所以係7仔搵到好多朱古力品牌同7仔聯乘既朱古力，比起平時在專櫃買就便宜一點，但味道就普普通通、最中間還有一包係由布院買的狗小食。

至於係博多到買既，通常都係JR站連接住啲土產店到買。左邊兩盒大的士多啤梨封面既，兩盒都係士多啤梨蝴蝶酥黎，啡色嗰盒係有層朱古力包住，而綠色嗰盒則是有三行白朱古力係上邊。前者被標榜一年賣左好多盒，但食落基本上都係甜既朱古力，而蝴蝶酥又因為朱古力包住而冇左原本的鬆化口感；相對地，綠色嗰盒會比較適合港人口味，味道冇咁甜亦食到鬆化口感，唯兩者都唔係好食到突出既士多啤梨味。

另外右邊嗰三盒連埋有對眼嗰兩盒，同樣係土產店搵到，比較係大路的手信，右上角嗰盒什至係香港都搵到！味道就係明太子既燒餅，都幾脆幾惹味，一盒又有好多塊，啱哂用黎派手信；紅色士多啤梨得獎嗰盒，簡單點形容就係士多啤梨味既白之戀人；然後仲有明太子蝦煎餅，食落香口脆身，帶點微辣，估佢唔到幾好食，而且一盒多塊，性價比十足！至於最驚喜係眼仔嗰盒餅，係意想不到咁好食，有點後悔買得咁少～

係由布院買既，有右邊中間嗰兩樣青檸糖，一包嗰種其實係青檸喉糖，食落好順口，功效都唔錯；盒裝就係普通軟糖，有啲似細嗰食到嗰啲；另外仲有之前由布院篇介紹過既果醬，味道天然用料十足，絕對抵買！仲有辣椒醬，都係用大分縣出產的辣椒製成，唔好以日本出產唔辣得去邊，辣度其實都勁嫁！

最後係九州買既仲有門司港既手信，不過都係得一、兩樣，門司港最出名香蕉，所以買左個香蕉蛋糕，類似人型燒既香蕉餡版本，味道正常，加埋係近海邊既唐戶市場買既芝麻魚乾，甜甜香香，呢啲就係喺九州買左既野。

係廣島既時候就反而買得比較多，有係超市買既稀少糖糖漿，價錢比起香港買平3成左右；仲有去腳皮既mask一盒，用後效果顯著，係香港同樣搵得到，係貴少少；右下角第二盒係一盒4個既蜜柑大福，啲餡食落比想像中既苦，而且皮都厚，仲要幾大個，唔試冇損失系列。

輪到去到邊都要買既抹茶系列啦，今次買既係香港citysuper都會搵到既茶之環既產品，部分會係香港都會搵到，當然價錢方面又會爭咁啲。第一樣係右下角黑色嗰盒，裡面有齊抹茶和焙茶既薄片朱古力，食落去得朱古力味，但仲要係唔太好食既朱古力！千祈唔好買！第二樣係金色包裝既抹茶蛋糕，賞味期限得兩、三日，抹茶味濃郁得來唔會偏苦，口感濕潤唔乾，絕對買得過！之後分別係抹茶年輪、抹茶金磚蛋糕同抹茶曲奇，年輪蛋糕口感好乾，抹茶味唔濃，可以skip、曲奇雖鬆化，但茶味唔突出很普通，可以skip、金磚蛋糕反而不錯，面層類似有啲抹茶糖漿咁，口感濕潤又茶味突出，雖然未媲美得上之前係中村藤吉食嗰個，但這個也可以試得過。

然後到都係賞味期限好短，得一、兩日既抹茶大福，味道偏茶苦一點，個人覺得皮厚左少少，比起7仔買到既仲稍將遜一點；仲有方型既抹茶朱古力，普通貨色；抹茶卷就好好味，咬落鬆脆，中間有少少抹茶朱古力，茶味突出又唔會太甜，性價比十足。

去得廣島，當然唔少得廣島蠔啦～黑色係蠔仔煎餅，每一塊都真係用上原隻蠔仔放落去再壓扁，食落蠔味幾重帶微腥同微鹹，但味道唔錯。另外亦係宮島買左兩樣蠔既產品，兩樣都係島上著名既牡蠣屋到買，樽裝係漬物、盒裝係佃煮，係餐廳食野嗰陣試左，發覺都幾鍾意，漬物有點像香港的蠔豉咁，而佃煮仲食落帶點甜，兩樣買返去做手信夠哂獨一無二又好味。另外仲係廣島既超市買左盒用來煮蠔仔飯既飯素，份量十足有哂一隻隻蠔仔係入面，煮飯放落去就可以煮返煲有日式風味既飯啦！

然後係廣島sogo到都買左好多食既手信，首先係好多日本百貨公司都會搵到既Gâteau Rusk Gouter de Roi出既烘多士（官網），透明包裝係原味，另一款就包左白朱古力。原味的面層撒了一點砂糖，咬落去超脆帶麵包香，偏甜一點但配紅茶一流，但白朱古力包住就真係太甜，除非好鍾意甜或者配埋超苦嘅抹茶食，否則建議買返原味；另一盒金色既係朱古力蛋糕仔，建議食嗰陣放微波爐叮十秒左右，食落效果有點像心太軟，濃濃朱古力味甜苦平衡度唔錯；至於檸檬蛋糕真係唔錯，食落去會咬到點點檸檬皮的口感，佢有檸檬香但唔會酸，唔會太乾又唔會太濕，檸檬味又中和返牛油香，食完唔會覺得膩。

另外，當時係sogo入面有LeTao既臨時檔，所以就買左個佢地出名既芝士蛋糕同埋新出品既青提朱古力。（後尾係廣島機場過關後既免稅店都會搵到佢既芝士蛋糕，有齊三隻味：原味、朱古力味、士多啤梨味）LeTao係日本買真的平一半，未食嗰陣就放係冰箱，食之前就放出來解凍兩個鐘，個蛋糕有兩層，放落口嗰陣一層似雪糕一層似慕絲，芝士蛋糕控一定會愛上，食完真係會飛～而朱古力味相對原味而言，原味會突出點，食到奶香、芝士香各種複雜嘅層次，朱古力味就略為較搶，蓋過了芝士蛋糕的味；青提朱古力，我初初以為係白朱古力包住青提子，點知原來唔係，佢係將青提子攪爛融入朱古力到，食落有提子香帶少少酒味，都唔錯。還有一樣係機場買的，就係嗰陣新出既Tokyo banana味kit Kat ，以為係東京先會搵到，估唔到來到呢度嘅機場都有佢嘅蹤影，食落去味道有驚喜，唔係齋係香蕉味Kitkat，而係真係做到Tokyo banana嗰種香蕉蛋糕味，味道雖然略為甜一點，但絕對值得買來試試。