【遊記】Day 2「鳥取 + 岡山」慶生之旅 2019 (鳥取2000Yen的士)－「立」即去旅行 Lap's Travel

第2天（星期日，3/3）

行程：三朝温泉》倉吉》鳥取（2000 Yen 的士）》大江之鄉自然牧場（2000 Yen 的士）》鳥取砂丘》賀露港》鳥取JR站（晚餐）》岡山（住宿：三井花園酒店岡山 Mitsui Garden Hotel Okayama）

Vlog 🎬: (點選上圖前往我的vlog了解更多內容）

一朝早起身，梗係要去浸多次溫泉先去食早餐（萬翠樓介紹請按此），早餐沒有昨天晚餐多元化，但都算幾豐富。食完早餐，見距離預約了的接駁專車還有點時間，就爭取時間出外走一圈，睇下昨晚環境太黑而睇不到的風景，有男女混浴露天風呂、三德川等等。

話咁快就要上車走了，首先要坐接駁專車返去倉吉JR站，然後再轉去鳥取JR站。來到鳥取站，出站後就去遊客觀光中心。由於鳥取縣的觀光景點較為分散，加上巴士班次不是很頻密，為左方便返外國遊客於鳥取縣觀光，鳥取縣政府提供了資助，實行了每人2000Yen包3小時既包的士遊覽服務。其實上一次來到鳥取縣都有，不過因為時間充裕就沒有用到，但今次來到除咗鳥取砂丘外，仲會去大江之鄉自然牧場，兩個地方距離幾遠加上巴士班次真係太疏落，所以就決定試一下。

的士唔需要預先預約，直接係中心和職員講需要服務就可以了，而錢就喺3小時結束後，直接交給司機，3小時的士服務入面，大約可以去兩至三個景點，基本上觀光所有提供一些標準路線可以選擇，所以如果事前沒有怎樣計劃也不用怕。不過我今次行程當中的大江之鄉自然牧場並不在他們提供的規劃路線之中，所以去到的時候有和職員以及司機商量一下才開始行程。的士上有iPad作翻譯同司機溝通，不過準確程度有待改善。如果去大江之鄉自然牧場的話，建議放在最後的一站，時間會鬆動很多，尤其是假日，大江之鄉超多人，寧願自己另覓方法回來，等自己可以輕輕鬆鬆咁玩下體驗工房。這個的士服務真的很方便，來到鳥取縣記得好好善用。

大約半個鐘之後，來到大江之鄉自然牧場（按名介紹）。千里迢迢來到這裏，目的就係食這裡的最出名的pancake，不過真係好多人，所以要等，但因為的士只有3小時，也很擔心會吃不切，只夠時間來這裏一個景點。幸好最後有驚無險，可以係司機告訴我們的時間之內用餐完畢，有足夠的時間去鳥取砂丘。（不過pancake真係很值得來吃）在此強烈建議可以先去白兔神社和鳥取砂丘，最後才來吃pancake，時間會好用很多。

來到砂丘之後，的士服務就在此完結。因為在牧場那邊買了好多手信，加上有少少微雨，所以先到砂丘會館找locker放低戰利品，睇了一會兒土產，跟住先出發去砂丘。

第二次來到鳥取砂丘（按名介紹），雖然本身來係想睇雪丘，不過最後都係雪量唔夠，落唔成雪～但砂丘無論睇幾多次都係咁壯觀，係砂丘上望落去，每個人都變到好細粒，望住個日本海加埋強烈嘅風吹來，整個人也清醒起來，煩惱盡消。砂丘整體上和上一次來的變化不大，是多了一些草和樹，看來也是時候「去綠洲化」了。

不過因為今次來的時候有少少雨，所以行得比之前辛苦，只是略略行了出海邊，就決定搭纜車去另一邊的展望台，繼續睇下有什麼可以買，順便食之前在大江之鄉自然牧場買的兩杯布甸，布丁雞蛋味好香好滑（高身那杯較好吃）。

要看的東西也七七八八，見還有時間，加上買了的JR pass可以免費搭假日行駛的麒麟巴士，所以就決定去賀露港（按名介紹）那一邊看看。搭過去其實好快，大約兩、三個字就到。這裡除了水產海鮮市場之外，還有螃蟹博物館(かにっこ館)和農產市場，都算有東西可以看看的，不過就比較適合當地居民多一點，如果順路來的話就可以，但要專程搭車或者自駕過來的話，就要考慮一下了。

行了一會兒就決定返鳥取JR車站那邊，因為巴士班次比較疏落，所以記得留意班次時間。搭巴士都搭了差不多4x分鐘先返到車站，由早上pancake後都沒有吃過正餐，所以就決定早點食晚飯。晚餐係翻炒返上一次來鳥取旅行都光顧過的たくみ割烹（按名看上次食評），因為那些鳥取和牛shabushabu真係好正！所以今次來到，直接決定要最貴那一款，唯一不同的是前菜和上一次有少少分別，今次吃的是類似貝類海鮮的東西，酸酸地甜甜地，口感有一點韌但幾開胃；至於和牛，真係冇得頂，肉味濃又柔軟，好食到不得了！牛魔王一定喜歡！

跟住就準備出發去岡山，係車站見到呢款抹茶芝士蛋糕，但保存時間只有5小時而且還要雪凍，所以買唔到返香港，不過就可以買來今晚吃。這一款蛋糕由壽製菓株式會社出品，叫kanoza izumo 的得獎蛋糕，用上松江中村茶舖的抹茶製造，望落去體積唔算好大，直徑大約10 cm，但拿上手就發現都幾重，用料很足，上層是抹茶粉、之後係抹茶芝士餡、再一層原味芝士餡、最底層係手工餅底，厚厚的但好鬆脆，加埋最面有一小抹金箔，感覺很矜貴。雖然佢係芝士蛋糕，但食落唔會好膩好滯，因為抹茶的甘苦中和了芝士的奶香味，食落都唔會話好甜，甜中帶苦又有回香味，抹茶控必試！不過佢的售賣地點唔係好多，除了島根縣出雲市和松江市外，在鳥取縣就只有米子市的和菓子壽城店和鳥取市JR站有得買，所以見到的話，記得試試（網址按此）。