【遊記】Day 1「鳥取 + 岡山」慶生之旅 2019 (三朝温泉散步)－「立」即去旅行 Lap's Travel

第1天（星期六，2/3）

行程：香港》米子機場（米子鬼太郎機場）》米子（米子JR站兌換山陰岡山4日pass）》倉吉》三朝温泉（住宿：三朝薬師の湯万翆楼 Mansuirou）

Vlog 🎬: (點選上圖前往我的vlog了解更多內容）

由於去鳥取縣的直航航班就只有香港航空，所以今次就順理成章搭佢地既航班，不過其實事前非常擔心，因為係出發之前幾個月就發生了港航欠債事件，真係有點擔心會飛唔成，幸好最後都係有驚無險，可以如期出發！飛米子空港只有一個時間，就係早上十一時左右，所以今次可以瞓飽飽先出發，去到機場仲可以食埋早餐先上機，貫徹返今次成個旅程的悠閒風格～上到飛機發生小插曲，出到停機坪之後，因為有機上乘客突然不舒服而要落機，起飛時間因而延誤了1小時，所以之後的行程有少少延誤，加上入境時間處理了很耐，最後錯過了好多列車班次（而鳥取縣的列車班次偏偏很疏落），所以第一日的行程真的要編排得輕鬆一點，以防有突發的事情發生。

比較起東京、關西那些一線城市城市的機場，入境時間真的用了很多，所以過關記得要有心理準備。原本計劃好要搭的JR列車要等多一個小時大有，好彩見到機場出面有架去米子JR站的巴士準備開出，所以即刻同司機買飛上車（外國遊客優惠只需要500円，車程大約20分鐘）。之後就兌換返山陰岡山4日JR pass（這張係機場係沒有兌換點），順便拜托職員通知溫泉旅館，我們趕不上本身預約好的接駁專車。

鳥取縣兩個比較出名的溫泉鄉有三朝溫泉和皆生溫泉，最後選擇了今次去三朝溫泉，因為這邊比較多傳統溫泉旅館，傳統味道濃厚點。介紹一下三朝溫泉先，三朝溫泉名稱的由來，據說是只要浸泡溫泉三日，就能消除病痛，從開湯的「白狼傳說」以來已經有八百幾年歷史，同時亦係世界上少數的含有「鐳」放射能的溫泉，對於痛風、高血壓等有很好的療效，據說浸得多還可以預防癌症。

幸運地唔駛等好耐就有下一班去倉吉的JR，仲有少少時間係便利店買嘢食～一輪奔波之後，終於去到倉吉站，剛好門口有一架的士，就這樣子獻出第一次喺日本搭的士，哈哈哈。

好彩唔使搭好耐，不過嚟到三朝溫泉旅館——万翆楼［萬翠樓］（按名介紹），個天都已經黑晒，旅館的職員都企哂係大堂接待處，一開口都已經知道我個名是什麼了，應該是我們要他們等了很耐，真的有點不好意思～

上到房間安置好行李，換上浴衣就急急腳落去食晚餐，因為時間真的比較晚，成個餐廳連我那枱，就只有兩枱食客，也不太好意思阻人收工，不過菜式很多亦很豐富，味道很好，食得好滋味。

三朝溫泉入黑後，基本上除咗留喺溫泉旅館內浸溫泉之外，就係到溫泉街逛一逛，不過大部份商店都好早關門，但呢一間叫いずみ（泉）娯楽場就收得比較晏一點，算係唯一可以消遣娛樂的地方。整間店都充滿昭和時期的氣氛，裡面是一個充滿懷舊氣息和童趣的遊樂場～

遊戲有三款，有射擊遊戲、彈珠台和彈珠盤，每一款每一回都只需要500Yen，射擊遊戲有15發子彈、彈珠台有50粒彈珠、彈珠盤就有百幾粒彈珠，射擊遊戲會看射擊公仔的成績來決定禮物，每一個公仔的重量和大小都不同，當然較大型較重的公仔分數就會較高，而射擊比我想像中難瞄準，很多時也打不中。

至於彈珠台，只要將彩色的彈珠彈到入機器的洞裡就可以，洞口上面有對應的數字，會依照數字滾出彈珠，完全係靠運氣，所以如果運氣好的話，這個遊戲基本上是一直可以玩落去的，可惜這天運氣太差，彈珠炸一聲就玩完了；至於彈珠盤，原理同彈珠台差不多，也是玩極也玩不完的那一類，所以就沒有玩了。雖然遊戲的獎品是一些比較兒戲的小玩具，但其實玩樂的開心過程當中才是最重要，最後只得到了一條粟米條。基本上整個晚上，很多住在三朝溫泉的住客，也會着住浴衣過來玩，所以除咗留喺旅館浸溫泉之外，來到三朝溫泉記得來感受下這間舊式傳統遊樂場。

三朝溫泉街除咗泉娛樂場之外，還有其他很特別的商店和景點，例如梶川理髪館，裡面像個博物館一樣，門外櫥窗擺滿左好多歐洲古典理髮師陶瓷公仔，可惜來到的時候比較夜，第二朝又好早走，冇機會入去參觀一下，仲有雕刻之館、和紙燈製作體驗工房、足湯等等，足湯同樣係24小時開放，其他如果有興趣嘅話，就要早啲去睇啦。

返旅館前，去埋旅館旁邊一間超市，雖然唔係24小時開放，但入邊嘅產品都幾齊全，仲有一些三朝溫泉的手信可以買，而且附近都沒有什麼東西可以做，所以佢算係這一帶夜晚閒逛的好地方。

返到旅館順便去埋大堂側面的手信部行下，然後就返房執野去浸溫泉啦！期待已久！

浸完之後，皮膚感覺很嫩滑，同一時間成個人的精神變到非常放鬆，整個人都好眼瞓，睡在榻榻米上好快就入睡了。

雖然今晚有些附近的景點沒有看，但第二天早上吃完早餐後，臨離開前見有時間，就逛了一個圈，現在就順便介紹埋啦，最令人怕羞嘅景點，必定係位於三朝橋下、三徳川上的河原露天溫泉，佢只有一道竹簾隔住個足湯，完全冇遮無掩，基本上係橋上望落去係會完全見到哂！而且佢係男女混浴兼24小時開放的，唔怕俾人見到又有勇氣的話，可以挑戰一下。