【遊記】Day4「東京」補完計劃秋季之旅 2018－「立」即去旅行 Lap's Travel

第4天（星期日，21/10）

行程：上野酒店》銀座》東京站一帶》六本木》表参道》上野酒店

今日行程唔多，基本上就係Shopping日，一朝早就去左依家香港都有，之前都介紹過既幸せのパンケーキ【幸福pancake】啦（按名看之前介紹），今次光顧的是位於銀座分店，雖然依家佢分店已經多左好多，但係來排隊既人依然都係好多，佢係一間樓上舖，未開門已經排哂人龍係出面，好彩最後都係係第一輪入到去。

除左原味之外，今次仲試埋紅茶味，意想不到又幾好食，味道有啲似午後之紅茶隻奶茶味，有淡淡茶香，遲啲可以係香港再食過。

食飽就係東京駅行街買下野，首先去買下手信，呢一間係VS嵐都介紹過，人氣超旺盛既New York City Sand（官網可按此），人龍超長，差不多等左大半個鐘先買到。佢係賣朱古力焦糖餅，食落其實都幾甜，不過就幾香焦糖味，口感幾鬆化，食落似焦糖流心，最好亦最適合配返濃茶或咖啡先食。佢有唔同口味，不過全部賞味期限都唔算長，加上幾甜幾膩，買之前真係要量力而為。

行左一陣就係時候下午茶，去左附近唔遠既Centre the Bakery（按名食評），主打高級精緻的方包。提供三款方包分別係JP、NA、EB，JP的口感彈性相當好，望落去質感很氣孔好密，一整塊純白色的，食落好軟綿綿，建議先吃一啖，什麼也不塗，直接感受麵包的香味；NA烘完之後的效果可以保持到外面微脆而內裡柔軟，帶少少煙韌感，所以個人覺得烘一點比較好，加上牛油之後香味倍增；EB烘烤完後則變得很酥脆，和之前兩種帶點軟身的有截然不同的口感。另外亦額外點了芝士多士，廚師會即席在面前現刨芝士落多士到，芝士吃落濃香有好重的奶酪味，而且廚師很不吝嗇的落得很厚，真係一款超邪惡美食，不過食完有點膩。

食飽就又再行過，都係邊行到攰就邊食下小食飲杯野咁。另外亦去左買Press Butter Sand（按名介紹），佢剛出的時候曾掀起過排隊潮，主打焦糖牛奶油曲奇，食落確實係美味但未至於驚艷，兩層餅其實很容易散，咬落去口感係厚實但卻鬆化的，而且小麥味好香濃突出，是頗出色的；至於餡料我覺得唔夠有飽滿的感覺，帶少少偏甜，而且外於曲奇塊餅麥味好出，焦糖亦好出，以至奶油味就掩蓋了，所以餡料方面要扣點分。整體上，這種餅是買得過的，拿來當手信會給人很有誠意的感覺，但因為餅乾冇乜防腐劑，記得要留意返賞味期限係好短呀！

買完行完街差不多黃昏，就過去六本木既Tokyo City View（按名介紹）睇夜景。個人覺得這裡很值得來，第一是比起Skytree的入場費，這裡便宜好多；第二係這裡的景觀可以一次過看到東京鐵塔和Skytree在同一個畫面；第三是人流冇Skytree咁多；第四就是可以冇遮冇擋的係Sky Deck睇夜景！

記得要上去Sky Deck，佢其實是一個直升機的停機坪來的，沒有玻璃阻隔的感覺，感受城市出來的風，令人感覺到很實在，亦切切實實的感受到這個城市的催燦和繁榮。

睇完夜景返落黎就去表參道晚餐，去左一間超值得推薦既shabushabu店叫しゃぶしゃぶ山笑ふ（按名食評），這裡是一人一鍋的，所以坐位都係圍住一個大圓形開放式廚房咁擺設，係到叫左山形牛涮涮鍋同松阪牛壽喜燒兩款套餐。先吃前菜，前菜就揀選了茶碗蒸，食落有超濃超香的蛋味，口感超嫩滑，而且內裡的餡料充足飽滿，有冬菇、雞肉、蝦，全陪餡料都食雞有雞味、食蝦有蝦味，估不到一細碗茶碗蒸都可以發揮得咁有水準。

松阪牛的脂肪雪花分佈得均勻細緻，每一片的顏色是更雪白一點，而山形牛則偏紅一點，雖然雪花分佈冇松阪牛更細緻，但其實賣相也絕不欺場，只是因為松阪牛太出眾而略勝一籌。食落去亦好明顯松阪牛的肉質口感更加細嫩柔軟，牛肉味好香好濃，佢唔係入口即融，所以食落唔會好油；至於山形牛，口感係有對比之下當然稍遜一點，但勝在價錢平松阪牛一截，而且其實佢質素其實好高。