【遊記】Day5「東京」補完計劃秋季之旅 2018 (東京迪士尼海洋-攻略)－「立」即去旅行 Lap's Travel

第5天（星期一，22/10）

行程：上野酒店》迪士尼海洋》東京站》上野酒店

上一次來東京就去東京迪士尼樂園，今次就去埋東京迪士尼海洋，事先聲明因為本人係唔玩太刺激既機動遊戲，所以係樂園入面特別刺激既機動遊戲都係睇左當玩左，只不過並唔代表冇野啱玩，相反地入面亦有好多野可以做到，加上園區大而人又多，絕對玩足一日都玩唔完。因為事前做足準備，所以大部想玩既都玩到、想睇既都睇哂！（另外我今次又係撞正萬聖節時間再加今年係東京迪士尼35週年，所以有好多期間限定産品和裝飾等等）拎Fast Pass係有限制，每次拎完要等佢張飛上面個時間先可以拎下一張，但我想玩既而又要拎pass既就唔多，所以全日只拎過兩次，如果好多熱門遊戲要玩既，就要好好諗清楚玩邊樣先。

由上野出發搭日比谷線到八丁堀站轉JR京葉線到舞浜，車程大約35分鐘，但來到之後還要轉搭多一程迪士尼度假區線先會到樂園。今日樂園超多人，開園前30分鐘來到，已經排好後……

次序：
1. 拎玩具總動員瘋狂遊戲屋 Fast Pass（15:10-16:10）2.海底兩萬哩（雖然有pass可以拎，但冇乜人玩，可以直接入） 3.鱈魚岬錦標美食（早餐）兼看「摯友達菲」show 4.拎海底巡遊艇：尼莫&好友的海洋世界 Fast Pass（12:40-13:40）5.「走出闇影森林」show 6.萬聖節壞蛋水上巡遊（位置不太好，看了一陣就走了，再等下一個時段才看） 7.「哈囉！紐約」show 8.迪士尼海洋電氣化鐵路 9.返去玩海底巡遊艇：尼莫&好友的海洋世界 10.水上迎賓表演「海上送歡樂」（35週年限定） 11.地中海港灣-波多菲諾咖啡坊（午餐） 12.返去玩玩具總動員瘋狂遊戲屋 13.萬聖節壞蛋水上巡遊 14.威尼斯貢多拉遊船（排超耐） 15.美人魚礁湖區閒逛 16.神燈劇場（雖然有pass可以拎，但座位多到可以直接入） 17.「Fantasmic! 」水上迎賓表演 18.「閃亮新夢想」煙花表演
P.S. 原本想玩水上逗趣船，但由朝到晚都排勁多人，又冇fast pass拎唯有放棄……
驚魂古塔、印第安納瓊斯冒險旅程：水晶骷髏頭魔宮、忿怒雙神、地心探險之旅這些對我太刺激，所以冇玩到，但全部可以拎fast pass

1. 入園第一樣野要做既係要跑去美國海濱區，拎玩具總動員瘋狂遊戲屋 Fast Pass！無錯，係要用個「跑」字，因為每個人都係向住呢個機動遊戲出發，而每一個人無論係咩國藉同年紀，通通都係跑既，所以也不用不好意思的，跟著一起跑就是了。結果開門即刻衝，來到拎fast pass都要排隊排左半個鐘，排到一半，即場排要100分鐘，而fast pass時間已經係……

而我最後拎到既時間係……

然後向住中間那個神秘島區域進發，景色好美。而因為今年係35週年，園內有好多米奇雕塑裝置，如果有買到支紀念限定棒，就可以和這些裝置進行互動，會出現一些特別效果。

2.第一樣係樂園玩既係海底兩萬哩，會坐係架潛艇入面扮潛落深海，氣氛十分好，做左好多細緻位，例如排隧要慢慢轉落去行近海的部分等，而過程中環境都幾昏暗，望出潛艇外會見到好多得意野和海洋怪異生物，中途仲會扮固障，不過驚險度係零，推薦指數： ★★☆，這款遊戲可以拎fast pass，但完全冇必要用係佢身上，因為佢冇乜人玩，可以直接入，而且玩既時間好短。

3.因為好早來到樂園而冇食過野，所以要醫下肚先，係迪士尼海洋入面唯一一間餐廳有提供現場表演的就是這間位於發現港區域的鱈魚岬錦標美食，個show叫「摯友達菲」。首先去買野食，主要係快餐類型如漢堡包和薯條，價位大約1000日圓左右，是一間比較親民的餐廳。然後職員會安排入座，用餐時間是有限時的，不過絕對夠足夠時間看完整場表演，推薦指數： ★★★★。

食物既質素正常，以樂園標準來說已經好好，而且真正的目標是看show，成個show大約十幾分鐘，主題都係圍繞著Duffy和朋友間發生的事（Duffy是迪士尼海洋內的主角，在這邊，佢既產品比起米奇更受歡迎更有人氣！），雖然全程是以日語演出，但故事其實好簡單易明，透過肢體動作已經了解到個故事係點，完全不用怕投入唔到，加上重點係Duffy超可愛！絕對值得來用餐看表演。

4-5.本身想玩水上逗趣船，但勁多人排，所以先拎海底巡遊艇：尼莫&好友的海洋世界 Fast Pass，然後再到旁邊的失落河三角洲看「走出闇影森林」show，成場show日語好多，雖然好多時間也是唱歌，影響性其實不大，但環境十分昏暗，表演時間很長，差不多有半個鐘，加上今早早起過來樂園，所以不知不覺間就睡著了……不看也不算很可惜，如果玩到攰來休息下也可以的……推薦指數： ★☆

6.然後到萬聖節限定的壞蛋水上巡遊，全日一共有兩場，位置就在中央神秘島外，但因為沒有預早去找位置看，也不知道會從哪個方向出來，結果開始嗰陣完全係背對住，什麼也看不到很清楚的，所以看了一陣就走了，再等下一個時段才看。

7.既然未睇到水上巡遊，就睇住另一個表演先，去左大郵輪嗰邊，睇「哈囉！紐約」show，成場show載歌載舞，有點像簡化版既百老匯，米奇美妮仲會係郵輪入面走下來，加上途中還有互動環節，而戶外的氣氛加炎熱的天氣，構成了一場超歡樂超熱鬧的show，記得早少少來霸返個前少少中間少少既位呀！推薦指數： ★★★★☆

8-9.睇完行左陣，就搭電氣化鐵路，因為要準備返去玩海底巡遊艇：尼莫&好友的海洋世界，又係類似超動感影院，要戴上3D眼鏡，講述我地化身做微型機器魚，同memo係海底既冒險，遊戲類似東京迪士尼既star war同香港迪士尼既Ironman，不過呢個既刺激性就冇咁高，fing得唔算好厲害，比較老少咸宜，而這個遊戲亦係樂園比較受歡迎的項目之一，所以要記得拎fast pass慳返啲時間，推薦指數： ★★★★☆。

10-11.玩完返出來又要返去樂園中央，因為有全日得一場既水上迎賓表演「海上送歡樂」（35週年限定），本身期望幾大，以為35週年紀念項目之一會好大型，點知最後出得一架船仔，圍住一圈打下招呼就完，推薦指數： ★★。而呢個時候都開始肚餓，所以就順便係地中海港灣-波多菲諾咖啡坊午餐，整體食物質素都唔錯，價位又唔算貴可以接受，然後再慢慢睇下迪士尼產品。

12.終於夠鐘返去玩玩具總動員瘋狂遊戲屋！呢個機動遊戲絕對係機園裡最受歡迎最人氣的遊戲，裡面以反斗奇兵個人類男仔-安仔間房作佈置，每一樣似曾相識的玩具係呢到都放大哂，去到臨玩前就會見到一張放大了的安仔床，遊戲就係要進入張床入面玩射擊遊戲！這個遊戲要戴上3D眼鏡，玩嗰陣要操控一支射擊炮，中途會經過好多關，要射中電子板入面既紅心先會得分，呢個遊戲玩完隻手係會超攰，但真係好好玩！推薦指數： ★★★★★

而我最後既得分係……

13.玩完出來就要去搵定個靚位，因為下一場萬聖節壞蛋水上巡遊又要準備開始，而太陽亦慢慢開始落山。水上巡遊其實都有故事，同樣係日文但同樣地易明，故事大約都係壞人出現，然後到米奇佢地一班出來，最後再和壞蛋們化敵為友之類。今次位置好很多，可以清晰見到每一架船，而且仲會有表演睇，現場氣氛好高漲好開心，所以記得搵啱個好位！推薦指數： ★★★★☆

而咁多架當中我最喜歡下面這架，因為船上的壞蛋是大力士內的冥界之神黑帝斯，佢每一次跳舞時的扭動好狂野好用力，很有娛樂性。

14.睇完水上巡遊就去玩威尼斯貢多拉遊船，意想不到排超耐！！！由天光排到天都黑埋，排左成個半鐘！船會出到中間水上巡遊個位兜一圈，沿途負責撐船的船員會唱歌和介紹等，船程大約十幾分鐘，但入黑後四處開哂燈真係好靚，給人有一種置身於地中海風情的感覺，感覺好浪漫，雖然等得耐左少少，但都幾值得。推薦指數： ★★★☆

15-16.之後去左美人魚礁湖區閒逛，成個區域都係室內，機動遊戲看來刺激性較低，很適合小朋友玩，但因為樣樣都好多人排隊，所以就冇玩到，不過呢到模仿小魚仙入面既海底世界，環境好靚好啱打卡，推薦指數： ★★★。再慢慢移動去阿拉伯海岸，玩神燈劇場，雖然有pass可以拎，但座位多到可以直接入，這個純坐係到，載3D眼鏡睇既小電影，情況似香港迪士尼睇唐老鴨嗰個show咁，推薦指數： ★★★。除此之外，我係呢到有食下野和有玩扔公仔，仲成功扔中左返去添！

又來到水上逗趣船，人依然好多，冇得玩……

17-18.最後來到今日既重頭戲，亦係今晚最後環節，「Fantasmic! 」水上迎賓表演和「閃亮新夢想」煙花表演。劇情豐富，米奇係魔法師係水中間出現，再經歷各種魔幻情節，當中仲有巨大魔龍出來噴火，最後被米奇打低，劇情中配合各種煙火，睇到現場人人嘩嘩聲！真係超震撼超靚呀！！一定要睇！推薦指數： ★★★★★★；反而煙花相比之下就較為失色，唔算放左好多，震撼感稍遜，推薦指數： ★★★。

因為本身係預先係klook買飛入來，臨走前決定去補錢換返張實體票留紀念先走。

足足玩了差唔多12個鐘成半日，要睇嘅要玩嘅要買嘅都齊了，就出返去近近地的東京駅，去左斑鳩拉麵（按名食評）晩餐，一開始望落去以為會好油膩，食完一定滯到飛起，點知飲落去唔會太鹹亦唔係太油太稠，叉燒入口很淋，雖然唔係入是即溶，但味道燒得很香，咬落帶很微的嚼勁；麵條也軟硬適中，掛湯效果很好；至於玉子爭少少，如果溏心效果做好點，會更加為這碗拉麵錦上天花。