【住宿+美食】: 三朝薬師の湯万翆楼 (萬翠樓) Mansuirou－「立」即去旅行 Lap's Travel

三朝溫泉係世界上少數的含有「鐳」放射能的溫泉，對於痛風、高血壓等有很好的療效，據說浸得多還可以預防癌症，而今次係三朝溫泉入住的是曾入選「日本溫泉飯店百選」的万翆楼（萬翠樓），亦係區內最具規模的傳統溫泉飯店。

飯店有提供專車接送，來回最近的JR倉吉站，但要先預約，來嗰程可以email或者Fax俾酒店，回程則酒店職員係check-in時會問定mark低時間，同時間亦會詢問早晚餐時間。回程的時候，應該因為只有我這組住客係這個時間走，所以專車係一架私家車。（不過，我去程因為航班延誤，而通知了旅館會趕不上，搞到而轉為搭的士）

飯店嘅大堂設置在一樓，成個大堂是風雅的日式庭園風格，配合着璀璨的水晶燈，雖然酒店已經在2009年翻新過，但眼前的畫面仍然保留左傳統日式奢華感覺，而適逢今次是女兒節來到，飯店內有好多女兒節娃娃的擺設，娃娃好精緻感覺好矜貴。另外，這種傳統飯店職員的服務真的好多無話可說，每次見到啲職員都係超級有禮！

喺大堂嘅旁邊，有一個小型手信店，喺入邊搵到好多三朝溫泉嘅土產（特色限定手信係用溫泉水製造出來的護膚品），係酒店夜晚附近沒有什麼東西行的情況下，這裏是閒逛的好地方。

今次入住的間房叫深山，整間房間都係傳統日式風格，空間都幾大，基本設備都好齊全，還有一個室內小露台，可以早上坐在小露台的椅上，慢慢欣賞下風景，而雪櫃就在露台位置。因為房間入邊鋪滿榻榻米，所以要玄關位除鞋，踏上去感覺好舒適。

房間入面亦兼備浴室，不過應該都冇乜人用過，因為所有客人都係會去晒浸溫泉，但望落去個浴缸都幾深幾高，係凹左入去咁，當然其他梳洗用品亦俱全。櫃入面放了床鋪以及浴衣，床鋪不用理會，因為食完晚飯返到上來，職員已經會處理好，而浴衣就要自己換好，不過唔駛怕唔識着，因為有晒指引教你點着，換好就可以準備落去食晚飯。

住這種傳統溫泉旅館，個人覺得最緊要要試的，就係一泊要包兩食，換上舒適的浴衣留在旅館不用奔波和用餐，餐廳內每張枱也保持適當的距離和空間，可以好好享受旅館提供的精緻晚餐，而且餐廳有會說國語的職員，有什麼事情不明白也可以問到。先介紹一下晚餐，冷熱菜式加埋甜品有成十款食物，超豐富而且質素好好。

先介紹一下前菜，因為今次來到是冬季松葉蟹的季節，所以有隻蟹鉗和幾隻蟹腳做冷盤，吃下去好鮮甜，食嗰陣點一下蟹醋，味道即刻提昇，還有一盤前菜包括了山陰的當造食材，有蜆肉、蝦、魷魚、蛋等等，味道不過不失，比較特別的是胡麻豆腐，口感帶一點黏性和偏向蓉，芝麻香味重但味道是淡淡的，加埋芥末才帶出胡麻豆腐的味道，味道和層次很豐富又很複雜。

當然近海的山陰地區，唔少得刺身，無論係魚生定係蝦刺身都好新鮮甘甜；唔少得嘅就係取自鳥取本地的牛肉鍋，在凍冰冰的天氣之下，又濃又甜的醬汁煮熟的牛肉，吃後令整個人也溫暖起來，而且牛肉的肉質很柔軟，肉味重，略嫌得兩、三塊不夠喉呢~

然後就到成餐比較特別的菜式，侍應先送上一舊燒滾了的石頭和完全係生的但醃製好了的蝦和魷魚，食嗰陣就放上石頭，「咋渣聲」一下子就熟了，這樣子吃起來的海鮮質感很彈牙爽口，而且視覺效果比較好，有得玩又有得食；還有新鮮即炸的天婦羅，熱辣辣風尚，入口非常香脆，蝦肉爽滑，配上一點抹茶鹽同吃，帶出一點甘香和鹹鮮，但記得點一下就好了，點得太多會好鹹。

還有一杯茶碗蒸，用料非常豐富，有白果、蟹肉、冬菇、雞肉等等，吃起來蛋香味既濃且滑，比較起平時喺香港連鎖壽司店吃到的茶碗蒸，水準高很多！成餐咁豐富，又點少得飯後甜品，今次有外型精緻的柑橘啫喱和時令生果士多啤梨，啫喱甜得來帶點微酸，為成餐食得咁豐富之下，來一點消滯作用，吃完真係大滿足！

介紹埋旅館的早餐部分，預先已經同酒店安排好指定嘅時間來吃早餐，雖然冇晚餐咁豐富和多樣化，但都有成十幾樣菜式，一點也不馬虎，有不同的蔬果做開胃菜，所有蔬果菜式也好新鮮。此外，這種溫泉旅館傳統日式早餐當然唔少得一些漬物，有明太子、昆布、梅等等，雖然我對於漬物唔係太喜好，但出奇地有幾接受得到這幾款，因為佢唔係好適合佐白飯來吃，特別係昆布。還有山陰地區有一種海鮮好出名，就係魷魚，估唔到咁早都有一片魷魚刺身可以食下，咬落很爽口新鮮，質感好細密。

至於熱食方面，有即燒魚仔和即燒海苔，魚仔燒完之後帶點微脆，食落香口，而海苔可以燒完先吃又得，唔燒直接送飯又得，燒完之後帶點焦香微燶味，不過海苔食落有啲鹹，同埋要小心睇火，因為佢好容易燒著。

另外比較西式一點的，有即煮火腿太陽蛋，食嗰陣將隻蛋打落火腿到一齊煎，係一貫係香港食到嘅味道，只不過變咗日本蛋，蛋味香啲；還有一款類似腐皮，食落甜甜鹹鹹，口感淋淋地咁。

兩餐質素很高很精緻，來到這種傳統溫泉旅館，真的一定要試一下這種懷石料理。題外話，旅館入邊早晚餐的地方有好幾個，其中一個係萬翠樓好出名嘅「樓中樓」設計，環境超靚，不過今次冇機會喺呢到用餐，但經過見到嗰陣都可以望下。

然後就到住溫泉旅館的重點，當然就係溫泉啦！萬翠樓溫泉其中一個特色，就係溫泉外的「無声庵」有一座觀音像，當年旅館挖掘溫泉時，意外挖到這座觀音像，後來證實是屬於平安至鎌倉時期並推測當年這一帶有幾家藥師堂，最後觀音像被安排放在此旅館助陣，為溫泉加持，驅除邪魔保健康，所以這裏又叫做「藥師之湯」。

而係觀音旁邊，浸完溫泉仲有可以飲用的溫泉水，外浸內服，每次建議唔好飲多過三杯，啲水飲落同平時飲礦泉水差不多，好飲過之前係別府飲過的，味道冇咁強烈。男女湯夜晚和早上的時間會互換，等大家可以睇到唔同既風景，而兩邊的溫泉都有室內和室外。

整個溫泉浴場由朱漆木建造，室外位置則由竹林包圍著，感覺好舒適，加上溫泉水溫度剛剛好，尤其今次來的天氣都幾凍，晚上得幾度的情況下，跳進戶外的溫泉池，下半身暖笠笠，毛孔放鬆擴張，而上半身清新的空氣加涼風輕送，一冷一熱完全係享受！而且溫泉水浸完後皮膚仲感覺好滑！記得要學日本人咁樣，入住時浸一次，食完飯休息下又浸一次，早上起身又浸多次，慢慢感受傳統溫泉旅館的體驗。