【手信】「關西」春日之旅手信篇（上） 2017－「立」即去旅行 Lap's Travel

由於今趟旅程購買的手信也頗多，所以會慢慢分開介紹，上篇要介紹是一大堆包裝精美的食物類手信，而當中又以抹茶為主，抹茶控一定要留意！下圖最下中間位置分別是伊藤久右衛門所出產的焙茶和抹茶kitkat，四圍都有好容易搵，但個人覺得抹茶味和平時吃開的沒有太大分別，焙茶比想像中好，但還是不太適合我的口味，喜歡焙茶的可以一試！左下角個盒係抹茶啫喱，由伊藤久右衛門所出品，一盒有4個，抹茶味濃得黎又唔會太苦又甜甜地咁，賣相雖然墨綠色一舊似綠色龜苓膏，但真心覺得唔錯，買來做下午茶係唔錯既選擇，入得過！

Kitkat旁邊的是辻利抹茶味的百力滋，同樣地容易找到，抹茶味都算濃而且同餅乾好配合，可以入手買來當手信，一盒有成15條，買返去齊齊分啱哂～抹茶糖就買左3種，一包係伊藤久右衛門所出，另外2包就係中村藤吉的抹茶和焙茶味，價錢唔太貴，又係做手信一流，3種茶糖也重茶味，中村藤吉就甜點，而伊藤久右衛門的就驚喜點，吃到最入還會有點抹茶粉像流心一樣滲出來，甜中再帶點甘苦，味道和口感很特別，必買推介！

再來就是左上白色個盒由辻利出品的一款叫生八橋的和菓子，外層是軟軟的糯米皮，而餡則是紅豆和抹茶，這次總共買左2間店的生八橋，一間是上述的辻利，另一間則是西尾，西尾在去清水寺的三年坂有好多店，辻利的話也是在三年坂某間店或是在其專門店購得，個人建議買辻利出品的，味道比較西尾好很多，一盒有2包並附有一小包抹茶粉，用以灑上生八橋吃，因為這種和菓子是偏甜一點，灑上抹茶粉的甘苦味令生八橋多了層次，而且外皮亦較為軟熟，餡更係完勝，抹茶味出好多而紅豆蓉也非常香，要買的話就買辻利這款吧！

而隔離綠色個盒係抹茶糯米滋，初初以為係蕨餅，份量都幾多而且味道仲唔錯，煙煙韌韌又重抹茶味，美中不足係和生八橋一樣，食用期限比較短～然後左下角七彩個盒係一盒多包的茶葉，係伊藤久右衛門買的，每一款都唔同方便試多幾種茶，內裡還附上說明介紹返每種茶葉用幾多度水溫同焗幾多分鐘，非常之咁仔細，本地citysuper都有售這個抹茶品牌的茶葉，但佢就冇這盒咁一盒有咁多細細包，得一大盒一隻味一隻味咁買，所以買介紹既呢盒，試啱邊款先買就一流啦！另外還有一盒細細罐的抹茶粉，價錢比起茶葉貴得多，但飲用次數和營養價值就好好多，一罐夠飲三、四個月，味道絕對係飲得出係好貨色！

然後到抹茶蕎麥麵，同樣係伊藤久右衛門出產，雖然冇現場即製咁好食彈牙，但這種要自己煮既做到8成相似已經唔欺場，香港citysuper都會搵到，不過就貴啲同包裝唔同左，味道都食到抹茶味但就不會話好濃，夏天食都幾好～仲有同店出品的抹茶梅酒，可以係現場試完先買既，抹茶加梅味又意想唔到咁夾，味道唔錯又不算貴，但另一樣都係伊藤久右衛門產品，係今次唯一一樣係完全中伏既，就係抹茶咖喱，睇包裝都估到伏伏地既，但點都要試下當中係咩來龍去脈，咖哩入面如盒上一樣有4舊肉，但味道就真係超級無敵咁奇怪，又苦又辣辣地又甘，食兩啖已經想放棄既級別，如果鍾意試古靈精怪野既就可以買既，否則就Bye Bye啦～

介紹完一輪抹茶產品，就講下其他零食啦，有係梅田阪急百貨公司買既Grand版卡樂B，現場都幾多人排隊掃貨，因為唔係到到有得買，但其實價錢唔算貴，一盒有4小包，白色個盒係芝士味、淺藍色個盒係蜂蜜馬斯卡芝士味，我其實一共買咗四種唔同口味，另外2種味遲點再介紹，這兩款味道我也覺得麻麻地，薯仔味係幾出同口感真係唔錯，食得出同平時既卡樂B係有明顯既分別，個人推薦買牛油味，口味係普通點但就最食到靚薯仔既味。

之後係Sugar Butter Sand Tree既餅，上一次係東京買過原味覺得好驚喜，甜甜地又鬆脆，今次就買左期間限定既焦糖味，水準同樣出色，必買佳品！但隔離拿Pablo出既芝士拿破崙就完全唔好食，雪凍左食叫好返少少，絕對令人失望，又唔鬆脆又冇乜味，似淋左既餅乾，唔建議試，價錢又唔算平！反而最大圖右下角個盒窩夫餅仔有驚喜，脆脆地又有焦糖香，塊數又多，絕對要買！

講完食就講下飲，分別係杉養峰園既一堆果汁蜜糖，香港雖然依家都搵到，但就真係貴一倍，而且冇咁多味揀，我覺得成支雪凍完再沖水飲好過直接用用凍水沖～但留意關西地區大阪暫時係冇分店，要京都或者係奈良先有；另外就係係梅田大丸百貨買既荔枝味醋，開左要一個月內飲哂，荔枝味都幾濃又唔會蓋過醋味，絕對容易入口，又唔會有強烈既臭醋味，而且包裝又靚，加上個職員好nice，所以又係買得過。