【手信】「關西」春日之旅手信篇（下） 2017－「立」即去旅行 Lap's Travel

上篇介紹的以日常生活用品為主，今次又再次介紹返野食啦！先講左上角盒奈良出產的白色淡雪士多啤梨，我並唔係係黑門市場買，而係在難波間高島屋百貨公司超市買的，原因係超級平呀，賣相又靚都只係2000日圓一盒2包！比起黑門市場嗰陣睇仲平點！反而盒2980日圓既宮崎芒果就係黑門市場買，平過香港買，切開之後芒果香超厲害，而且食落超甜但又唔會話甜到封喉，天然果糖般甜，香港這個價錢就只買到一個，早知係日本食多2個！還有左下角隻粉紅多啦a夢係夾公仔夾返來，一次就夾到～公仔旁係藥房買即香口糖，標榜新食感，類似三文魚子咁一放入口咬開，薄荷味就即刻大量湧出，我自己就唔係好受到，因為太刺激！還有右上角2包白色係章魚同蝦片，依家銅鑼灣sogo都有賣，仲有既整即食，當然香港買就貴好多，日本買就平一截，係梅田堆百貨公司買～

另一個千里迢迢托返來，同樣係高島屋買返來的哈密瓜，只係1500日圓，又係超級甜和多汁呀，好食到反眼！但就真係重左啲～另外亦買左支純米大吟釀，但遲時未試過所以no comment，係機場免稅區買，好似似攞獎的。還有這種便利店都有得買既乳酪，佢唔係好稠身嗰種，係偏稀點的，但幾好飲的，不過香港Aeon有得買但貴一倍！

然後係大丸百貨做緊promotion買既果汁味啫喱雪葩，分別買左哈密瓜同芒果，另外仲有其他口味如巨蜂提子和桃等，可以放入冰箱到雪住，食之前先拎出來放一陣，效果就會好似食緊雪葩咁，味道非常濃郁，價錢唔算平嫁，但就真係幾好食！另外亦買左有陣熱潮既荽茜味爆谷，見過Circle K有得買12蚊包，但本人係唔食荽茜既，淨係聞到都想嘔，根據試食者提供資訊係鹹鹹地幾好食既，但我聞到陣味實在太強烈，所以掂都冇掂過！

Frantz Kobe個兩盒係機場買既，之前去大阪有試過佢既布甸堅正既，今次就買左佢另一啲產品，就係朱古力包住粒士多啤梨乾，綠色係抹茶、紅色裡面就兩種味包括原味白朱古力同士多啤梨味朱古力，咩味都有士多啤梨的～最好食係原味，其次係士多啤梨味，但偏偏抹茶味計返係最貴……粒士多啤梨只係微酸，剛好中和返朱古力的甜。

仲有大路手信系列，大大包粒數多，藍色係原味綠色係抹茶，裡面有粒杏仁既朱古力，味道唔錯，係黑門市場買的；另外就係上次2016年10月手信篇買過既cheese garden芝士蛋糕，今次試另一種口味，芝士味真係好濃郁好好食好滑，係拎返香港驚佢變形，但真係好食到唔理卡路里了～

繼續有另一大堆零食手信，左上角粉紅色一大包係蝦味既米菓，黑門市場購入，但因為派哂畀人所以冇試過；右下角係天婦羅魷魚，帶少少胡椒味好惹味，適合用來送啤酒，係新大阪站轉車去京都前途中買的；仲有中間有盒同上面介紹的一樣係朱古力士多啤梨，不過就係另一牌子，質素差過上面嗰隻；朱古力士多啤梨下面係罐紅豆，冇什麼特别；仲有高級百力滋，其中柚子味更係京都店限定的，這種百力滋口感豐富點，同平時食既食得出有分別同香點；而最下面另有些送的梅乾、香口膠同蝦餅。

前兩篇試過Pablo的朱古力批同芝士拿破崙都中哂伏，終於呢盒係值得買既，係一種芝士餅來的，買來做手信很適合；還有Sugar Butter Sand Tree既餅就不用介紹啦，見我買完又買就知係正野；反而盒係梅田阪急百貨買既福砂屋長崎蛋糕就真係堅好食，口感非常鬆軟蛋香味又濃，底部仲有一粒粒砂糖粒增加咬口，賣相仲好靚仔，用來配返杯茶食簡直一流！