【手信】多Joy多難「鳥取 + 關西」秋季之旅 2017（關西篇）－「立」即去旅行 Lap's Travel

係關西地區所買的手信，基本上都離唔開食同埋藥妝加少量精品，有些係我上次買過的介紹過的，就唔特別再介紹多一次，今次係關西地區買的唔算特別好多，冇上過幾次咁瘋狂。打頭陣要介紹嘅當然係我最愛嘅抹茶系列啦，差不多全部都係喺京都站對出間伊藤久右衛門分店和機場免稅店買的，左上角那三包係抹茶冷麵，之前都介紹過就唔介紹啦。

第一樣重點要介紹嘅係左下角深綠色嗰兩盒，賞味日期好短，係伊藤久右衛門身退出的產品，類似抹茶生朱古力+Brownie，食落口濕潤帶一點半溶的感覺，抹茶味濃但朱古力味都濃，兩者平衡得幾好，味道偏甜一點，愛吃抹茶又愛朱古力的人會喜愛它～中間最上嗰兩包係即沖抹茶粉，呢種本身係加左糖，所以直接跟佢比例加返水就飲得，夏天飲解暑一流；中間深綠色嗰盒都係即沖抹茶粉，不過呢款係Latte版本，即係本身加左奶既成份，所以加水開嘅時候會好似抹茶牛奶咁幾香。

最右邊那兩盒長方形的是抹茶布甸，每一個布甸會附上一包抹茶粉，食之前灑上去，個人覺得這款布甸齋食的話一般般，口感比較實而味道怪怪地！後來，我嘗試加左一啲紅豆蓉以及蜜柑落去食，就好似喺日本食抹茶甜品咁，效果出奇地好，三者加起來味道得以提升和轉變，買返來可以嘗試一下這種食法；至於另外兩款都係喺機場買的，正中間白色個盒係抹茶朱古力餅，味道不過不失，食完都冇乜印象；反而那一包抹茶豆就好好食，外面嗰層抹茶係脆脆甜甜的，包住粒類似花生咁味道好夾，價錢都幾平可以買多幾包～

還有杉養蜂園既果汁蜜糖，幾乎每次來日本都會買走，仲有一大堆狗食品和沖涼液，就唔多介紹啦～反而係神戶北野工房買的芝士曲奇餅，食落有淡淡的芝士香又脆，又一買來畀同事和朋友做手信之選；蜜糖側邊嗰兩支玻璃樽的係杉養蜂園買夠一定金額送的美顏補充品；右下角個四盒係高級版百力支，分別喺京都大丸百貨和梅田阪急百貨買的，唔係到到都有得買，深藍色係classic Sugar butter味，另外2款係期間限定，個人覺得栗子好食過紫薯，栗子口感滑點；百力支隔離嗰盒係神戶本高砂屋買的傳統和菓子，外面有一層好特別的衣包住，煙煙韌韌咁唔知係乜，包住紅豆蓉，紅豆蓉仲食到一粒粒紅豆口感，食落唔會話好甜但就幾香，但賞味時間有限，所以唔可以買好多。

繼續讀一大堆零食，左上角嗰三包都係一啲朱古力包住啲果仁，唔特別介紹；左下角係喺酒店拎嘅免費宵夜杯面；右上角係類似旺旺米餅，這堆是糖不甩味；旁邊係香口糖，喺藥房和便利店有得買；大盒嘅番薯百力支係機場買，食完高級版百力支之後，這一盒明顯地被比下去；兩盒卡樂B薯片係阪急百貨買，藍色嗰盒之前介紹過，紅色嗰盒係燒蘋果味，食落甜甜地有少少蘋果香；卡樂B薯片右邊都係次次都會買嘅焦糖餅，介紹過唔介紹；仲有右下角係Wasabi醬油煎餅，咬落去超強勁Wasabi味，好似成個Wasabi擺落口，係機場買。

另外仲有今次買嘅少少藥妝，有潤唇膏、去腳皮貼、去眼部角質層精華液和蒟蒻番梘。無論係去腳皮貼定去眼部角質層精華液，效果都唔係好顯著好慢，加上價錢都唔平，所以可以慳返少少。兩盒寫住美冬係機場買，由白之戀人間公司所出品，口感好似淋左嘅威化餅同蛋卷而且好甜，都係買返白之戀人算數。

還有係環球影城掟中的雞蛋哥公仔和哈利波特魔法仗； Pokemon Centre買的公仔和精品；係木津卸売市場買的哈密瓜、晴王提子和柿乾，提子和哈密瓜都好甜，柿乾都好甜，但甜得來口感好像魚生，感覺怪怪地唔係好啱我～仲有最後一樣就係喺機場買嘅柚子果汁酒，都係酒精濃度低，飲落酸酸甜甜幾爽口；仲有係藥房買嘅鎮痛膏貼、噴射裝的飛滋藥、能夠係拔毛嘅時候，會有效保護皮膚的拔毛鉗；還有美國村vintage shop買既YSL外套和機場買的樂天朱古力。