【手信】多Joy多難「鳥取 + 關西」秋季之旅 2017（鳥取篇）－「立」即去旅行 Lap's Travel

今次旅行頭四日在鳥取縣，後四日在關西，所以我只係帶咗一個好細嘅旅行喼去鳥取，所以係鳥取買嘅嘢並唔係好多。唔好以鳥取係鄉下地方就冇乜嘢買，正正因為佢係鄉下地方，又近山又近海，天然資源好豐富，所以孕育出好多海鮮、農產品、牛乳，引申出來的副產品非常之多！有點後悔沒有帶一個更大的旅行喼來，所以唔可以帶太多野走，如果會從鳥取縣直接返香港，我一定會係境港市直接買海鮮再買新鮮的二十世紀梨返香港！今次就買住呢啲先，希望下次有機會再來，到時候再掃返屋企！事不宜遲，依家就介紹下今次係鳥取縣買咗啲乜～

首先介紹嘅係二十世紀梨既副產品！因為買唔到新鮮的二十世紀梨回港（我之後還有多天在關西），唯有買佢相關嘅產品，有些產品更可能在香港也找得到，不過就當然係貴啲啦！第一樣係二十世紀梨酒，樽身圓圓的好可愛，用上鳥取縣的水梨釀製，將完整的梨濃縮再濃縮，再加入多達40%的鳥取縣特產梨果汁，由於酒精度數不高，所以喝下去好順口好清爽，甘甜不膩，這樽果汁酒買來送俾人做手信一流！然後就係中間那樽梨醬，平時拎嚟塗麵包或者做pancake醬都流，食落去甜味自然帶有粒粒微微的果肉，但如果開咗之後記得要盡快食晒，因為我即使放咗喺雪櫃，到最後依然變咗……有點可惜；酒和果醬中間的是鬼太郎版本的梨味牛奶糖，牛奶味重一點，只有少少梨香味，冇乜太大特別；後面一大杯裝住的是梨汁啫喱仔，見過香港有得買，吃起上來都幾清甜，買來派比同事、朋友做手信之選；梨型狀的也是梨啫喱，吃起上來也有一點點果粒，味道清甜天然，食完唔會封喉，像吃了一個濃縮的二十世紀梨，雪凍來吃味道更佳。另外，盒內有介紹食完個兜，可以洗乾淨之後拎來做盆栽或者裝野，賣相得意好搞笑。上述東西基本上好容易搵到，係百貨公司、車站抑或大部分鳥取縣手信店都會搵到。

然後就到大山牛奶之里買既一系列產品，係鳥取縣其他地方比較少見，唔食得嘅有兩個襟章，一個係駱駝代表砂丘、一個係牛奶之里的代表吉祥物，另外亦買咗張明信片，紀念一下今次睇唔到嘅風景。然後都識嘅，右下角最大盒嘅係牛奶軟雪糕曲奇餅，咬落去鬆脆帶點偏甜，中間的牛奶層夾雜了像一點砂粒的口感，令佢食起來像軟雪糕一樣，味道和口感都唔錯，試過雪凍係咪會好食啲，結果還是維持室溫的味道最好。

至於左上角那盒係牛奶薄脆，見到有當地日本人買了三大筒所以也買來吃，整塊吃下去真的很薄也很脆，但微微的牛奶甜味和蛋香；中間半圓形那一盒係牛奶芝士多士，味道冇想像中好食，因為佢偏淡，唔係好食得出牛奶味和芝士味，倒是口感很脆口；右上角那一盒是牛奶忌廉煮食包，一包裡面還包括了一條雞腿、半邊粟米和兩片南瓜，伴飯吃一流，帶有濃烈的牛奶香帶微甜，價錢有點貴，但食完之後就有點後悔只買得一盒。

三款海鮮類零食，一款是松葉蟹煎餅、一款係墨魚仔煎餅、一款是有「幻之蝦」之稱的猛者蝦煎餅，後者中曾經係鳥取縣的食品大賽之中得到獎。松葉蟹煎餅估唔到食起嚟都有點蟹味，口感脆身味道惹味，不一會兒就吃完了，在鳥取縣亦好容易搵到；墨魚仔煎餅就令人有點失望，因為食落去好腥好硬，係浦富海岸登船處買，唔建議買；至於蝦煎餅，煎餅餅身會見到微微的蝦身，蝦味唔算好強烈，但味道剛剛好又脆身，下午茶食兩、三塊係唔錯嘅選擇，都係縣內百貨公司和手信店有售；另外亦都係境港市的水產物直賣市場買咗一包櫻花蝦，價錢好平又大包，買來平時炒飯或者炒蛋一流，可以增加香味和脆口感。

還有四樽調味料，左邊嗰三樽有兩樽係境港市水產物直賣市場買，由左至右分別係海膽醬、蟹肉XO醬（百貨公司、手信店買）和蟹味噌；右邊個樽粉紅色的寫住話華貴美人，其實係一支豉油，因為加左紅菜頭所以先變咗粉紅色，不含添加色素，純粹紅菜頭令到佢變咗粉紅色，食起上嚟味道和一般豉油沒有太大分別，係加左紅菜頭感覺健康啲。至於左邊嗰三樽，海膽醬帶有強烈的酒精味，齋食的話幾乎唔能夠入口！試過用好多方式烹調過，都只可以略略減少左陣酒精味，完全食唔到海膽的味道和口感，價錢都唔平所以唔好買！蟹肉XO醬以為好特別，食落同普通嘅XO醬冇分別，買不買也沒有所謂；蟹味噌則是我的最愛，完全還原到之前喺日本食過嘅味道，蟹膏味濃郁，適合用來拌沙律、拌飯或者整成壽司吃，但又係開咗之後要即刻食晒，我食到一半放在雪櫃以為冇事，點知冇幾耐想食再打開嗰陣，發覺顏色變了而且發臭，超級浪費和可惜，可能冇乜防腐劑。