【刨冰】銅鑼灣Shari Shari Kakigori House 氷屋：用日本水製成的刨冰－「立」即去旅行 Lap's Travel

自從Shari Shari Kakkgori House 氷屋開幕以來，一直都好想去試下，因為這裡標榜的是從日本進口的冰所製成的刨冰，身為日本人的老闆想一絲不苟的還原日本的味道，加上香港比較少地方有提供到日式刨冰，終於今日來到幫襯啦！接近傍晚時間來到，所以人唔係好多，唔使排隊就直接入去～

內裡座位大約有1x個，所以人多既話，的確有可能係要排隊，裝修就簡約風格，擺放左一啲日式小擺設同少少書籍，氣氛感覺悠閒。

再睇下menu，刨冰價錢大約由$7x-9x，一些和菓子或蛋糕類別的tea set則$5x-7x，以甜品價錢來說算是中上（留意每人有最低消費$35），而叫任何刨冰的話，只要加錢就可以加一款甜點。刨冰款式都幾多，仲會有期間限定款式，刨冰亦可以另加一些toppings，砌出自己心水的刨冰。

今次就叫左草莓special味（$78）再加了一個北海道芝士梳乎厘（+$25），根據店內提供的指示，share是可以的但就不要另外用碗和杯share，因為冰係好快溶，以及影完相就好20秒內食。一杯刨冰的份量其實好多，上枱嗰陣勁大杯，勁驚佢會塌下來，但慢慢順住刮刮下其實唔會跌的。呢杯刨冰有新鮮士多啤梨、忌廉和特製既士多啤梨奶醬，而食落口的口感係意想唔到咁滑，完全唔會食到任何冰粒！而聽講如果控制到冰的溫度，食既時候係唔會頭痛既，而呢杯就係唔會食到人頭痛！即使放左落口溶成水，但其實感覺又唔係好似飲咁水，士多啤梨奶醬又甜又香士多啤梨味，食完唔會好飽好膩仲好fresh添！真係好好味！除了出面層士多啤梨奶醬外，食到中間位都有的！至於芝士梳就好輕身，但芝士味就唔算太濃，份量比較細，雖然好吃但性價比就爭了一點。