【芭菲】尖沙咀成城Fruitier芭菲專門店：精緻的下午茶時光－「立」即去旅行 Lap's Travel

這天來到尖沙咀逛街，經過見到一間裝修簡約而又感覺高級的小店，望入去得一張枱，其餘座位都係吧枱，面對住開放式廚房。入去睇一睇擺係門口既雪櫃，擺放左一杯杯的迷你芭菲和蛋糕，再看看收銀處的介紹，原來這間小店來頭一點也不「小」，因為佢係來自東京的過江龍芭菲甜品店—成城Fruitier，在日本首都東京已經有4間分店，主力提供賣相精緻的芭菲。整間甜品店以白色為主調，給人一種簡潔乾淨的感覺，入內被安排坐在吧枱前，真的頗有在日本高級甜品店的進餐的感覺，因為之前在東京六本木都試過一次食精緻甜品店，當時也是坐在吧枱前，看著甜品師逐點逐點由零砌出來，變成一杯或一件精緻既甜品係一件賞心樂事，所以今次望住佢慢慢砌個芭菲出來，就好像重拾返個感覺一樣。

再望望menu，款式大約有十多款唔係好多（之前食ufufu既芭菲實在太多），但就由季節限定到招牌芭菲，甚至係蛋糕同泡芙也一應俱全，而且仲可以變套餐，套餐會包多一杯茶同幾舊自家製既蛋糕仔，不過我今次冇加到；除左張menu外，好彩佢有提供埋視像版本，對於有選擇困難症既人來說，有圖睇係可以更方便自己揀，但佢就唔係每一樣都展示左出來，例如蛋糕同迷你版芭菲就冇，不過就可以係雪櫃睇到，而且嗰啲仲可以外賣添！

落完單之後就見到甜品師開始砌芭菲啦，可能仲係新開，所以見到仲有個日藉女甜品師係到負責指導和監督其他員工，務求芭菲以最靚既賣相送上給客人面前（我仲見到如果舊生果整得唔夠好就會重新又擺過！很認真！）。因為係即叫即製作，所以都要等大約10分鐘左右先上枱。

而我今次就叫左招牌作七彩成城鮮果芭菲（$78）同栗之戀芭菲（$98），兩者賣相都係超級精緻又優雅！先講鮮果芭菲，賣相真係一百分，特別係切成花形既日本巨峰提子再配上士多啤梨、奇異果、芒果、菠蘿、紅桑子同橙共7款水果，每一樣入口都新鮮又多汁，吃下去感覺清新，然後水果的清甜微酸又會配合返中間夾著香濃的呍呢拿雪糕和香滑的忌廉，還有不得不提既係超級柔軟輕盈的海綿蛋糕和清新的檸檬啫喱，整體平衡感覺好和諧，由甜、酸、爽、滑、軟、香，每一部分也洽到好處。

至於栗子芭菲呢，唔好以為係栗子蓉就會一味死甜，看看賣相咁精緻就會知道，味道和賣相一樣做到層次分明。由最上層開始就係一輪栗子味道既衝擊，兩種栗子的口感甜得來不會封喉，而畫龍點睛既係竟然會配上日本柿，日本柿食落去好甜但又中和返栗子蓉略帶來的甜膩感，可以清一清口腔，然後再夾住蛋白餅和杏仁碎，脆得來又變返甜，食到這個位置以為食左好多甜落口，由突然變左做焙茶造成既啫喱，焙茶啫喱仲帶濃烈既茶甘苦味，完全可以中和返上幾層既甜膩感！然後再落係焦糖mousse、忌廉同芒果汁底，每一層都係反反覆覆的由甜到苦，再苦變甜再變酸，味道上既變化不停在口腔內演變，非常豐富。