【美食】鳥取鳥取駅前山陰海鮮炉端かば居酒屋：性價比超高居酒屋－「立」即去旅行 Lap's Travel

來到鳥取市的時候已經是晚上十點多，這時才開始搵餐廳晚餐，發覺特別多居酒屋，原本想找間鳥取和牛吃涮涮鍋的，可惜太晚來已經關門，剛好經過這間山陰海鮮炉端かば的居酒屋，見到內裡都幾多客，望望餐牌見到款式都幾多，而且性價比超高，於是就入去試下～（另外，佢亦有任飲放題，不過我冇試）內裡的格局是一個個包廂來的，入內要除鞋，有足夠私隱度。不過，居酒屋並非禁煙，和隔離房只有一板之隔（上面是通風的），所以有陣時會有一股輕微的煙味傳入來，幸好影響不算大。

居酒屋有提供中文英文menu，但並非包括了每一款食品，所以有時也要看看日文版本的。其實這間居酒屋在全日本都有唔同既分店，連東京、大阪都有，不靠既然來到位於山陰部分又靠海的鳥取，理所當然地吃海鮮應該會比較新鮮和便宜啦，而且大部分食物都係用返山陰地區的食材，比較地道一點。

事實上這裡的食品價錢真的超便宜，基本上看著menu也不太怎樣需要看價錢～而最化算抵食的絕對是招牌作刺身拼盤，因為一大盤二人份量只需要8xx Yen咋！！大約只需港幣$5x就有1x片唔同既魚類和貝類刺身！有鯖魚、油甘魚、鰆魚、鰺魚、鯛魚、三文魚、呑拿魚、帆立貝和魷魚仔，份量超多不過並不是每一種也好吃，鰆魚和魷魚仔就不太好、吞拿魚有筋，但油甘魚和三文魚就好肥美，帆立貝也好新鮮。佢還有4人份量，都只係1xxx Yen，刺身係絕對抵食既！

除左刺身拼盤之外，因為比較夜先食，所以只係叫左啲小食，例如越式蝦米紙卷、湯浸炸豆腐、串燒和一款叫貝殼地獄的貝類鍋。先講嗰米紙卷，味道和平時在香港食到既差不多，不過佢整得好整齊，蝦肉都幾爽口；而炸豆腐雖然浸住湯，但都唔會浸到層炸衣爛哂，食落去唔係話好脆但就吸收哂啲汁，都幾入味，係油左少少；串燒方面佢可以畀你揀鹽燒抑或是汁燒，所以我就雞肉大蔥串燒揀左鹽燒，燒雞皮就汁燒，個人覺得汁燒比較好，因為佢鹽燒落得比較重手又燒得唔太溶，所以食落去好鹹，而雞皮食落去唔係脆，反正有種似煙肉卷咁既質感帶少少滑，值得試一下既。反而最尾既貝殼地獄雖然標榜係人氣之作，但佢比較大型的貝殼得幾舊，其餘最多既係細過手指尾指甲既蛤仔，基本上冇乜肉食到，這款可以慳返的。