【遊記】Day 1 多Joy多難「鳥取 + 關西」秋季之旅 2017－「立」即去旅行 Lap's Travel

第1天（星期日到星期一，22/10-23/10）

行程：香港》關西機場》寄存行李於大阪酒店》鳥取縣鳥取市鳥取華盛頓廣場酒店Tottori Washington Hotel Plaza

今次既旅行，萬萬想不到會遇上了今年侵襲日本最厲害的颱風蘭卡，出發前幾日已經密密留意天氣報告，結果當然係起飛前一天收到飛機延誤的消息，由原本凌晨1點變左做朝早6點，但因為本身係Klook book左JR山陰岡山4日pass，佢個換領counter收夜晚11點而開朝早7點，冇辦法之下唯有夜晚10點幾去左機場領左個pass同wifi蛋先，然後搵個位瞓下等上機啦，好彩都搵到個好位瞓，係四圍嘈左少少咁～幸運地到左5點半左右就可以登機啦，唔使再Delay！

係飛機上臨降落的20分鐘前，搭飛機搭到好像玩跳樓機一樣，不停上落的離心力也搞到整個人不太舒服，而落到機場之後，又因為剛打完風令機場比較繁忙而冇停泊位落客，所以要坐在機艙內接近40分鐘先落到機，好彩過關就比較快，幾經辛苦終於到左關西機場啦！

可惜好景不常，又因為打風，所以好多航班都係同一個時間去到關西機場，所以成個車站都係人。好不容易終於排到自己換飛，原本已經在EGL買定既南海電鐵車券，以為可以舒舒服服出市區，點知今日停駛！！！只能夠搭站站停既列車，職員退返相應既車費之後，就即係衝落月台，但結果最後都係搵唔到位坐，只能夠揸住兩個大喼企係迫過沙甸魚既情況下搭足50分鐘出到市區…….

去到呢一刻已經經歷過瞓機場過夜唔夠瞓、飛機上的跳樓機、長時間等停機坪入境和沙甸魚魚式迫車廂，總算來到難波一帶，再轉車去心齋橋，因為肚餓加上到預約時間，決定先去食今次旅程既第一餐，就係可以帶來幸福感的幸せのパンケーキ（按名食評），總算可以抖一抖，舒服地食下野。

食飽飽就拖住個行李去幾日後先返來入住的大阪酒店放低行李（事前已email問了可以放3晚），然後只拎個輕便細喼行去難波既OCAT，因為本身book左由大阪去鳥取既高速巴士，以防有什麼不測所以就早點過去睇下咩情況，順便要拎之後去京都、神戶的阪急列車2日Pass（一樣在OCAT拎），而這個又係另一個惡夢既開始……

去到巴士站發覺當日所有巴士都停駛了！！！連第二日也不知道有冇車！但係我已經訂好左3晚酒店同餐廳，而且又買左山陰岡山JR 4日Pass，所以當下第一時間職員就叫我去落兩層既難波JR站問下有冇車過鳥取。一開始時，我其實先走入去售票處排隊問的，但因為很多人排隊問，我就了去閘口問職員，但他也不清楚所以叫返我入售票處問，呢個時候突然有位日本人聽到知道我要去鳥取，就很熱心幫手問職員，又上網check同㩒下部售票機，同時間在大堂中央位置，剛好有位來自台灣的職員，專門幫旅客解決問題和作翻譯來幫助我們，最後發現在大阪站係有車出發到鳥取！但因為這邊是細站，什麼也做不了，再加上買了的山陰岡山4日JR Pass都要係嗰邊兌換做車票，所以就即刻直奔返Namba Walk搭地鐵過梅田搵大阪站的JR位！長話短說，最後買到接近7000日圓的JR車票單程（自由席）去鳥取，而回程決定博一下1000圓日交巴士開返未，回程嗰日再算。

大阪站入閘後，去3號月台第5、6號位就係自由席，有2卡車廂，好彩有早點排隊，否則要企3個鐘！到最後因為Delay所以坐左3個半鐘左右先去到鳥取站，經過整日既奔波和心情不停既起伏，整個人都攰到飛起～（雖然我有係車入面瞓著，但真係太焗，所以瞓下又醒下咁）鳥取我終於來到啦！！然後去今晚下塌既酒店鳥取華盛頓廣場酒店Tottori Washington Hotel Plaza（按名評價）check-in 安頓一下，就即刻衝出去食飯，因為已經係22:xx，好多餐廳都已經關門，好彩鳥取係比較多居酒屋，普遍收得比較夜，所以就揀左呢間性價比高的山陰海鮮炉端かば（按名食評）居酒屋晚餐。