【遊記】Day 2 多Joy多難「鳥取 + 關西」秋季之旅 2017－「立」即去旅行 Lap's Travel

第2天（星期二，24/10）

行程：鳥取市》倉吉市二十世紀梨記念館/白壁土藏群》米子市鳥取花迴廊》米子豐收季酒店Hotel Harvest In Yonago

雖然前一日不好運同好奔波勞碌，但今天行程豐富加上交通班次梳落，所以這天係超早7點幾出門，好彩酒店係正JR站隔離，行過去唔使5分鐘。但因為好多餐廳也未開，唯有係便利店買早餐食。

鳥取站在鳥取縣（比較米子和倉吉）來說，是比較大的車站，有迷你百貨公司、餐廳和土產店，適合買下手信～買完早餐就坐喺鳥取站等特急列車出發去倉吉站，大約需要半個鐘，落車之後就衝去巴士站，搭車過去二十世紀梨記念館，大約10分鐘左右就到，落車再行過去需要5-10分鐘。

二十世紀梨記念館（按名介紹）大約需要個幾鐘慢慢參觀，貴為鳥取縣第一特產，内裡除了二十世紀梨既介紹和歷史外，最重要係有得試食！！！佢每日會提供3款不同品種的梨試食，試完之後就可以投選自己最喜愛的一款。

玩完一輪之後，就決定慢慢行過去白壁土藏群啦，行過去話遠唔遠話近唔近，大約需要行20分鐘左右，條路唔算太難搵，可以認住下面既圖跟住來行，一出梨館經過個大型兒童遊樂設施行，好快會見到牌指住白壁土藏群既方向。

去到白壁土藏群（按名介紹），可能因為今日係平日，所以冇乜遊客，這裏環境清幽很靚，一邊沿住河川慢慢逛逛那些特色小商店，行到攰就入去店舖嘆杯咖啡休息下，感覺非常寫意，留左一陣就搭車返JR倉吉站，出發去米子。

原本諗住去到米子就午餐，但之前既行程比想像中耐左（主要係飲咖啡嘆耐左），經過見到去鳥取花回廊既免費接駁巴士差不多有車，如果下一班要一個鐘頭之後，同埋到時再去到就會好晏，只會得一個鐘參觀，所以決定喺7-11買少少嘢食就搭車過去。搭過去需要25分鐘，一落車就已經係鳥取花回廊（按名介紹），裡面真係超大，差不多佔大半個山頭，而重頭戲就係花之丘啦，有成幾十萬紅色鼠尾草配合大山風景，可惜嘅係大山山頂唔係成日出嚟～

係到玩到尾班車先走，返到米子JR站，先返連續兩晚入住的米子豐收季酒店Hotel Harvest In Yonago（按名介紹），然後過左對面間大Aeon行下，順便睇下超級市場有咩好食，因為真係超級肚餓，最後見到Mister donut有期間限定就買來試吓，雖然都幾甜但好好食好creamy！外脆內軟又有焦糖香，吉士醬又濃！

行左一陣就出發去出發前已經訂座既強小亭啦（按名介紹），佢係專門提供大山黑牛的燒肉店，估唔到一去到就受到熱情的招待，連老闆也來招呼我們，仲請我哋食嘢添，而啲牛肉都真係好好食好柔軟，果然係2017年日本一嘅和牛！呢餐一食就食咗兩個幾鐘，食到肚都脹埋，然後就慢慢行返去酒店散步消化下，不過經過lawson既時候，都係忍唔住買咗個期間限定抹茶紅豆味 Haagen-Dazs返去食～第二日又是早起天呀！