【住宿】大阪心齋橋多米溫泉酒店Dormy Inn Shinsaibashi－「立」即去旅行 Lap's Travel

今次在大阪一連四晚都是住在位於心齋橋附近的大阪心齋橋多米溫泉酒店Dormy Inn Shinsaibashi，佢係一間連鎖式酒店，最大的特色係集團旗下每一間酒店都會附設溫泉（有天然溫泉，有人工溫泉，這間是人工的）、宵夜有拉麵提供及豐富的自助早餐，我今次都一一試晒！除此之外，這集團的酒店都有級數之分，再好一點的有Premium和野乃。先說說地理上這酒店係在美國村的一帶，步行過去心齋橋條商業街或是心齋橋地鐵站大約需要5-10分鐘，附近一帶可以逛街買衫，但缺點係這邊很多酒吧，夜晚的時候人流比較雜，很多日本年輕人喜歡聚集在這一邊，尤其我來的時候比較接近萬聖節，所以常常有派對，夜晚是會比較嘈以及很多飛仔～酒店樓下有一間便利店Family Mart很方便，買飯後甜品或者飲料都唔使出酒店範圍。

而酒店方面，服務還頗好的，因為我來住之前的四天也在鳥取，在email詢問店方說可以把2件大型行李放在酒店寄存，而且還覆得幾快的～房間方面，床就幾大但房就一貫商務酒店般的細，走廊窄到開不到行李，只可在床尾位勉勉強強開到一個；還有個窗台仔，不過也要全關窗簾，因為對面是住宅望得一清二楚；床頭冇位可以控制房內的燈，有點不太方便，而且房燈不夠所以比較暗；冷氣可以有搖控器自由控制開關、大細、風速係最抵讚的地方；洗手間反而唔似平時商務酒店咁一模一樣，但係我不太喜歡這種深藍色，給人一種好像很污穢的感覺，所以我4晚也是到浴場溫泉那邊洗澡的，而且洗手盆個塞是廢的，完全阻不到水流走；另外仲有2套衫係用來於酒店行走的睡衣，例如去浴場溫泉、食拉麵宵夜咁。

至於其他設施方面，浴場溫泉和早餐、宵夜是在同一層的，先講下的溫泉，需要洗乾淨身體才浸落泉水，不過4晚落到去也沒有很多人，所以即使沖身位得4個，每次去到也不用等。因為不能拍照，就在酒店官網拿了一下照片給大家看看，裡面有一個熱水池、一個冷水池、兩個木桶池和一個桑拿（男湯那邊），但池水都幾熱，通常我只浸到一陣就頂唔住～環境都幾靚的；然後到宵夜既拉麵，係有時間限制的（21:00-23:00），但如果過左呢個時間都唔使怕，因為可以落去大堂reception到拎個杯麵～至於味道方面，唔使錢嘅就不過不失啦，唔會太難食，比想像中好，麵質比想像中彈牙，杯麵都差不多。

最後到早餐方面，係自助餐來的，有西式和日式，想試的話可以到酒店大堂reception買早餐券，價錢係600日圓一個人。款式方面就中規中矩，應該有的都有提供，例如西式的有炒蛋、煎蛋、腸仔、煙肉，日式的有太卷、腐皮壽司、漬物，還有沙律、水果、乳酪、麵包、窩夫、粟米湯、味噌湯和各式飲品等等。基本上都是一些大路款式，味道都唔會太差，兩款蛋都是現場即製的，麵包都有得烘返熱，算是頗豐富的一餐，可以試一下。