「立」即去旅行 Lap's Travel

紅楚蟹、松葉蟹、猛者蝦、白魷魚、岩蠔等等，境港漁港的產量非常豐富，而在這個漁港的附近，就是境港水產物直賣市場。漁船卸下來的新鮮海產，會即刻拿到這裡，保證新鮮！從JR境港站過來，如果沒有自駕的話，建議直接搭市內循環巴士，會直接在門口處落，唔建議用腳行過來，因為路程都幾遠。

裡面大約有1x間海鮮檔、乾貨店和餐廳，面積唔算大，基本上一條直路已經睇哂，不過檔主們都非常熱情，經過時都會叫我們去試食一截蟹腳，超鮮甜！

有名你叫「蟹取縣」，基乎每一檔都會見到紅楚蟹既踪影～（當時未到松葉蟹既季節），而且價錢係超抵！就好似尋寶咁，唔同質素就唔同價錢，3000Yen x 5隻、4000Yen x 5隻、5000Yen x 3隻，真係超級抵！

而對蟹冇興趣既，都有其他海產可以買，例如巨型八爪魚、貝類等等，當然仲有乾貨啦，價錢比平時出名既大型水產市場會平點。而由於這個水產市場係好近米子空港的，如果係這個空港搭返香港既話，仲可以買完打包好拎返香港添！

唔可以打包返香港？唔緊要，場內有提供枱櫈，買完之後可以係到食，店主會提供筷子、布同豉油，咁就可以慢慢嘆～我今次就買左一盒拆好哂既紅楚蟹，食起來超方便，只係需要1000Yen，味道鮮甜又好爽口，一個人食哂都唔會嫌多！另外，仲試左有「幻之蝦」之稱既猛者蝦（1000Yen）！這種蝦只有係山陰地區先有機會食到，因為佢既鮮度只可以維持好短既時間，不能夠輸出到其他地方。佢外型很兇猛，有一點很特別既係佢既蝦膏係鮮藍色，微微解凍剝殼後再點豉油，係超鮮甜又彈牙，黎到如果唔試既話真係嘥哂！

愛好海鮮既就快啲黎呢個寶藏發掘下啦，買返香港之餘仲要記得個肚要預留多啲位畀呢到鮮甜既海鮮呀！

推薦指數：★★★★

抵玩指數：★★★★

地址：鳥取県境港市昭和町9-5

營業時間： 08:00-16:00（逢星期二休息）

網址：http://www.sanmaki-direct.jp/

「立」即去旅遊Youtube channel、Facebook專頁、Instagram、Pixnet：

Youtube Channel：https://bit.ly/2scNVfk 

FB： https://www.facebook.com/lapstravel/

IG：lapstravel