【遊記】Day 5 多Joy多難「鳥取 + 關西」秋季之旅 2017 (大阪環球影城一日遊)－「立」即去旅行 Lap's Travel

第5天（星期五，27/10）

行程：大阪環球影城

今日去大阪環球影城，和上次去了第三次東京先去東京迪士尼一樣，終於係第三次來大阪先去大阪環球影城！係來之前，暑假的時候係書展抽到Klook送出嘅環球影城買一送一入場門票優惠，所以今次$2xx就可以入場真係超抵！由於我係唔玩啲太刺激嘅機動遊戲，所以就無謂買任何Fast Pass慳返筆錢，而同樣地今次都係撞正萬聖節時間，所以有好多期間限定產品和設施（例如鬼屋），入黑之後成個樂園仲有些區域變成喪屍區域，很多當地人也扮鬼扮馬迎合萬聖節（最多人扮係生化危機），但同一時間四圍都超多人，如果會玩那些刺激的機動遊戲和鬼屋，絕對建議買Fast Pass，如果唔係真係排隊都排到傻～樂園其實唔係好大，唔玩機動遊戲嘅話其實好快行得晒，不過睇下不同的節目也值得入場。

這天天氣很好，一朝早喺酒店食埋自助餐早餐先出發～如果從心齋橋出發，可以搭地下鐵去大正駅轉JR去到西九条再轉去環球影城站，出站之後跟着人群行，穿過一大條商店街就會見到門口。建議想玩那些熱門機動遊戲但又冇買Fast Pass的人最好樂園開門前來排定隊等入場，因為真係會超爆多人！

整個園區已荷里活電影做主題，分為紐約區、迷你兵樂園、侏羅紀公園、親善村、水世界、哈利波特世界、環球奇境和荷里活區（遲點還有瑪里奧世界）。今次來到環球影城最想去的就是哈利波特世界，所以排完一輪隊等入場之後，第一時間就係衝去哈利波特世界！之前要去哈利波特世界是要拎籌和有入場時間的規限，但現在基本上是可以自由出入。

好不容易終於去到哈利波特世界的門口啦！影咗幾張相之後就即刻去排隊玩哈利波特禁忌之旅先（玩完之後排隊既人已經多到不可能再排～），個機動遊戲就喺個城堡入邊，沿途每一個位置都做得好細緻，例如掛在牆壁上的人像畫真的好像電影入面一樣會講嘢！入去玩之前要先將啲隨身物品放入locker，然後戴上3D眼鏡坐上一架會360度郁既車上面，親身體驗坐上掃帚飛來飛去的感覺！成個過程好迫真，同一時間都轉得幾厲害，所以千祈唔好食咁飽～由和催狂魔的鬥爭，到參加個追尋金探子既比賽，整個過程歷時大約5分鐘，一定要玩！推薦指數：★★★★★。

玩完個刺激既遊戲，就四圍逛下睇下哈利波特精品和表演，再去個洗手間（洗手間都係仿照戲入面咁，會有愛哭鬼把聲係入面講野嫁），然後就去揀返枝屬於自己既魔法仗啦！魔法仗分為兩種，其中一種只要係哈里波特世界入面某些指定位置講出咒語和揮出指定動作，就會有神奇既魔法體驗嫁啦，推薦指數：★★★☆。我當然都有去施展魔法啦，想睇片既可以去我IG到睇嫁！當然仲有唔少得飲返杯冇酒精成分既奶油啤酒啦，味道似係汽水上面加左層奶蓋咁，不過係幾好飲既，想留紀念仲可以買特別版既杯裝添～

係哈利波特世界玩左3個幾鐘，就去第二處到睇下，行下行下就去到迷你兵樂園啦，但係勁勁勁勁勁多人！佢絕對係現在最受日本人歡迎的卡通人物之一，很多一家大小都會扮成迷你兵既樣來到玩，基本上每一處影相位、扔公仔遊戲檔攤、小食亭等都係排哂隊，而機動遊戲更加係人龍長到估唔到，起碼要等3小時以上，如果係忠實粉絲的話記得要買有包括玩迷你兵團的Fast Pass，否則真係只能遠觀～無奈下就只好睇下精品店（又係多人都飛起）同買返杯這區才有的香蕉味爆谷，很多人會買埋迷你兵團造型的爆谷桶，不過我就只買爆谷來，味道偏淡不過不失。

然後就過咗去隔離的紐約區，玩蜘蛛俠驚魂歷險記乘車遊，佢玩法都係類似哈利波特禁忌之旅咁，戴住副3D眼鏡和蜘蛛俠一齊打敵人，有些位覺得比哈利波特那個更Chok，兩者其實都好玩，但比較的話，哈利波特的感覺就比較奇幻一點，像進入了魔法世界，這個就實在一點，推薦指數：★★★★☆。

玩完兩個刺激的機動遊戲之後，又係時候食午餐啦！返咗去哈利波特世界嗰度食，貪佢好氣氛，叫左份萬聖節限定套餐，味道有驚喜喎！南瓜造型的是南瓜蓉批，還有燒雞、豬肋骨和原始感十足的整條燒粟米，薯仔湯是另加的，肉類肉質都幾滑和幾淋、南瓜批造型可愛之餘味道也很濃郁、粟米也非常鮮甜、湯也creamy，整餐也非常滿足。食完出到來，仲見到貓頭鷹表演～然後就行返出去樂園中間位置。

去到樂園中間位置做乜？就係準備睇花車巡遊啦！花車巡遊絕對係樂園的重頭戲之一，所以周圍都超多人霸定位，我也搵定個靚位睇花車巡遊，整個花車巡遊環節超級熱鬧，一開始會有工作人員教大家跟住音樂跳舞，等花車出來的時候可以等觀眾跟着音樂跳炒熱氣氛！而花車方面，有墨西哥風格的芝麻街、史努比、現時最受歡迎的迷你兵團、印度風格的Hello Kitty等等勁歌熱舞！和迪士尼不同的是，環球影城的花車巡遊會在某些位置停下來，然後給遊客走近花車的周圍影相和跳舞，完全和大家打成一片！所以來到環球影城的話，一定要看花車巡遊，推薦指數：★★★★★。

睇完花車之後，就在旁邊的扔公仔攤檔玩左一陣，在日本玩這些扔公仔檔攤氣氛超好，工作人員很識搞氣氛。玩的時候，原本已經打定輸數，但最估不到的是在最後一球竟然中咗！所以就攞咗一隻大雞蛋哥公仔做獎品～Lucky～推薦大家玩玩碰下運氣：★★★。

扔完公仔之後因為要到芝麻街精品店看看東西買手信，所以就去咗環球奇境（Wonderland）。這一區的遊樂設施比較偏向兒童性質的，所以也包含着很多卡通人物，例如Hello Kitty、史露比、芝麻街，而且周不時會有卡通人物出來和大家影相和跳舞。

再行返出來的時候，天色都開始變黃，四圍也越來越多人，基本上都玩唔到任何機動遊戲，所以就周圍行吓影吓相，順便睇吓精品店。而適逢聖誕節也就快來到，都見到樂園開始出現一些聖誕裝飾，所以這個時間來可以同時間見到萬聖節與聖誕節裝飾一起出現的奇妙場景。其實本身想玩鬼屋的，但因為友人不玩，所以我也無謂自己一個入去要人等，唯有留返下次吧。

然後繼續四圍行，去了侏羅紀公園，兩種刺激的機動遊戲當然係睇咗當玩左，而且排隊的人超多，即使係黃昏時間都要等兩、三小時以上。見到好多人拎住火雞腿，所以就諗住試下食再買左抹茶玉桂條，但原來火雞腿的肉質很硬和韌，不算是好吃，哈哈～反而玉桂條就幾好食。

見時間差唔多，就今日第三次去哈利波特世界，原因係逢傍晚開始，哈利波特的城堡會有3D投影show，歷時5至10分鐘。來到的時候已經有好多人塞住左係度，但當時距離表演開始還有45分鐘以上，真係好佩服日本人等待的耐性。不過這個show真的很值得大家看（雖然現在已經沒有了，會否再有就視乎園方決定），又會放煙花畫面又靚，內容係點都唔太重要，反正唔難理解，而表演除左城堡位，四圍也會突然出來。推薦指數：★★★★★（現在沒有了很可惜，希望之後會再出現返）

連投影show都睇完，都差不多準備離開環球影城了，臨走前再兜多個圈，因為入黑後開始就會出現喪屍了！這是萬聖節特備活動，除了鬼屋之外也設置了一些喪屍區，但遊客很多喪屍相對地顯得有點少，所以也不太可怕，其中我仲拍左條喪屍跳舞片，一點也不恐怖仲幾Funny，有興趣可以上我IG看看（Account係文末）。然後就走了，係門口見到仲多人過早上入場，真係誇張（適逢星期五晚上）！

離開環球影城之後就返去心齋橋那邊，途中經過百貨公司仲買左個栗子蛋糕和粒粒都好飽滿的香印提子做今晚宵夜！放左返酒店之後就行去Namba City晚餐，去左一間叫天ぷら大吉（按名食評）的天婦羅餐廳，佢最出名係成地蜆殼碎和平民價錢即製天婦羅，所以也可以放心地叫到成枱係～食飽就散下步，因為四圍都好靚，尤其近美國村一帶，然後就返酒店休息食飯後甜品。