【觀光】鳥取米子市鳥取花回廊：媲美北海道的花海－「立」即去旅行 Lap's Travel

鳥取縣雖然細，但卻擁有西日本最大既植物公園，呢個公園足足有50萬公頃咁大，等於11個東京巨蛋，而呢個公園就係鳥取花回廊啦！裡面有超過400品種、200萬枝花輪流綻放，由春天既櫻花、鬱金香，到夏天既薰衣草、玫瑰，秋天既楓葉和紅花都包羅萬有，而且唔好以為冬天就冇野睇，因為冬天會舖上燈飾，真係一年四季都有唔同既景象！佢位於深山之中，但在JR米子站會有免費接駁巴士直達花回廊，一個鐘有一班車，每程大約25分鐘，非常方便。而且在鳥取花回廊之中，仲可以見到有西日本富士山之稱既大山，景色非常壯麗！

花回廊既意思，係公園以中央圓頂溫室為中心向四方伸延到各庭園和花卉，並建設了展望走廊從上而下和360度咁樣賞花，而全個公園分為11種不同既主題，足足佔據了大半個山頭！今次因為接近萬聖節來到，所以有唔同既南瓜裝飾應節。又因為公園實在太大，一入到門口位決定先搭園內既小火車「花列車」（300日圓），車程大約20分鐘，先大約兜一圈睇下有咩位值得睇，其實成程車都幾驚險，因為條路勁窄，架車又長，每次轉彎都只係剛剛好過到。

落左火車仔之後，就決定先出發到巨蛋溫室啦～沿路仲有個位係以恐龍為主題既小花園，花卉變成恐龍樣都幾趣怪。通向巨蛋溫室的路都擺滿左唔同既花卉，有啲仲係得獎既花藝來，另外，呢個位都係可以一次過睇到巨蛋溫室同大山一齊既景色。

入到巨蛋溫室，裡面主要都係熱帶植物，好有熱帶雨林feel，如果企落中間位講野仲會聽到回音，哈哈。而除左睇植物外，呢到都有得整押花飾品體驗，不過今次比較晏來加上很少遊客，所以已經閂左～

睇完巨蛋就走出走廊啦，向今次重頭戲出發，就係園內最受歡迎既花之丘啦！搭小火車經過已經被吸引到，一大片紅色鼠尾草看似無盡伸延到大山，可惜今日天氣一般，被雲層遮蓋左大山山頂，如果唔係真係一流。據說這裡種植左超過20萬棵，而到左春天、夏天仲會變成唔同既花，估唔到係鳥取縣都可以睇到媲美北海道富良野既花田，而且仲有大山作背景，坐係到賞下花真係好寫意！