【遊記】Day 3 多Joy多難「鳥取 + 關西」秋季之旅 2017－「立」即去旅行 Lap's Travel

第3天（星期三，25/10）

行程：米子市》境港市水產物直賣市場/水木茂記念館（鬼太郎記念館）》米子市大山牛奶之里》米子市

是日又係勁早起身，7點鐘已經出門口，由酒店出到來凍左好多仲有少少落雨，好彩行過去JR米子站唔使2分鐘，然後即刻衝過去搵境港線，由呢一刻開始就正式進入鬼怪世界！搭去境港要去0號月台，架列車以鬼太郎做主題，總共有六款，因為我搭嘅時間比較早，屬於返工返學時間，所以今次有三卡列車（平時多數得一卡）。我搭嘅呢架列車係星君鼠號，成架車無論係車身、天花板定係座位都會搵到佢嘅蹤影～

大約搭左九個字左右就去到境港市，車站好細但四圍都係妖怪嘅佈置歡迎你。落車之後就走去搭市內嘅循環巴士（每程100 Yen），好快就會去到境港市水產物直賣市場，不過因為未食嘢，所以唔入去睇住，行咗去附近大約5分鐘路程嘅お食事処かいがん海鮮食堂（按名介紹），食個蟹丼做早餐，奢侈一下～真係又豐富又鮮甜又抵食，大力推薦！

呢餐都差唔多食左 1小時，比預期之中耐，然後就過返去境港市水產物直賣市場（按名介紹），買咗啲乾貨手信又買咗啲即食海鮮現場食，一定要試吓呢度嘅猛者蝦！肉質勁彈牙又鮮甜，而且只係得山陰地區有得食，冇理由唔試下架～當然另一樣必定要食嘅就係紅楚蟹啦，因為價錢真係好平。

食海鮮食飽當早餐之後，就決定行下消化下（加上如果要等下一班循環巴士要45分鐘之後），行去水木茂紀念館和水木茂之路，行左差唔多2公里，大約需要半小時，話遠唔遠話近唔近～

去到水木茂紀念館和水木茂之路（按名介紹），先係妖怪食品研究所食咗粒眼珠爸爸和菓子，就開始參觀紀念館。紀念館入面，有些區域係唔可以影相，不過可以影相的區域其實有好多，裏面亦都幾多野睇，絕對值得花時間慢慢看。

參觀完之後，就沿着水木茂之路慢慢行返去JR境港站，沿途真係超多鬼太郎商店和銅像，每一間都入的話真係需要大半日時間！而且呢度收集鬼太郎印章活動，如果一早喺車站外的觀光中心買咗一本收集印章簿仔，就可以慢慢沿途搵出嚟蓋印，蓋夠一定數量仲有禮品換同證書。不過，因為我在海鮮嗰陣用多左時間，所以係呢邊唔能夠留太耐，就趕住去搭車返米子（因為班次很疏落）。

返到去米子之後，就去搭大山循環巴士，成架車都係中年日本人，大部份嘅人都係去行山和大山過夜，所以架車好熱鬧（仲撞到前一日一齊去鳥取花回廊嘅婆婆）！車程大約需要1小時左右，中途會有休息站，因為有買大山巴士pass ，所以就落車行咗一個圈，如果係呢個休息站落車嘅話，可以上去大山寺看看的，又有遊客觀光中心，而且四圍都已經長玩了紅葉，環境很優美，美中不足的是天氣麻麻地。