【美食 + 觀光】鳥取米子市大山まきばみるくの里（大山牛奶之里）：充滿歐洲風味的小村落－「立」即去旅行 Lap's Travel

大山まきばみるくの里（大山牛奶之里）係一個集合了體驗、觀光、購物和餐飲既多元化景點，置身於當中真的有一種在瑞士小村落既感覺！佢係一間牛乳專門店，所出產既大山牛乳和其乳類製品非常出名，在鳥取縣的便利店很容易找到佢既牛奶或者係泡芙！如果從JR米子站搭大山循環巴士過來，大約需要一個多小時左右，沿途在一直觀看大山風景，時間很容易過，然後會有中途站停15分鐘，有買到pass的話可以落車走走。

這裡係背靠大山，面向弓濱半島，天氣好既話，仲可以見到乳牛係大山下食草所配合既境色，可惜呢日天色麻麻，以致一直係到參觀緊嗰陣，一隻牛都睇唔到，好彩最尾上咗車行駛緊嗰陣，竟然係比較低嘅位置見到有牛牛食緊草，否則就只會得一望無際既草地，可幸既係景色都依然優美，空氣都好清新！這裡地方看地圖就知道很大，除了幾棟牛舍、購物店和餐廳外，基本上所有草地都係用來放牛，活動空間好多，難怪肉質咁好：）

睇完風景之後，就到食既部分，餐廳分咗兩邊，一邊係BBQ而另一邊則以西餐為主，而我係去咗西餐廳。其實來之前，上網見到有人介紹過呢到既牛奶火鍋係幾出名，但因為要3日前電話預約，我又覺得行程會好多變數所以冇預約度，如果有興趣嘅人可以事前預約試下，詳細就睇返官網啦～雖然冇食到牛奶火鍋，不過就試咗另一樣唔使預約都食到嘅芝士火鍋（ 3890Yen，2人份量），如果唔鍾意芝士嘅話，都有好多款唔同嘅西式料理供應，全部都係以大山食材（牛奶、牛肉和雞肉等）烹調，保證原汁原味。

一開始先上枱嘅係沙律，然後好快就會到芝士火鍋和配料。個芝士火鍋一放低係超級香，聞到都流晒口水！配料有一大籃麵包、少少蔬菜、薯仔、腸仔、蝦和帶子，唔好以為配料咁少會唔夠飽，食落去其實係超級滯但又超級好味！芝士控一定會愛上，因為乳脂味幾重，配上麵包就最夾，完全突顯到芝士高水平既質素！啲芝士半溶半流質咁包住啲食物，食落去又唔會蓋到食材既味道，不過就每一啖都變得好邪惡！估唔到係日本都食到咁高質素嘅芝士火鍋，來到這裏的話，真係大力推薦一定要試！但記得要食快啲同得閒要用個殼搞下佢，因為啲芝士都乾得幾快，不過放心是佢唔容易濃到癡底既，因為個兜係特製。

然後就到購物部份，大山牛奶之里所出產嘅牛奶副產品好多，單係蛋糕都有十幾款，年輪蛋糕、奶油蛋糕、芝士蛋糕、流心蛋糕仔等，總有一款會合口味。仲有個款形形色色嘅餅乾、蛋卷、布甸、牛奶，甚至係芝士、腸仔、白汁烹調包都有，鹹鹹甜甜一應俱全，總有一款啱心水。除咗食嘅，都有紀念品賣，真係花多眼亂。而購物每滿1000Yen就可以儲一個印花，滿五個印花就可以換一杯特製牛奶軟雪糕（我今次有買夠5000 Yen )，而呢杯軟雪糕據說高峰期一日可以賣出4000杯！真係超誇張！這杯牛奶軟雪糕真係必試！由這裏的牛奶新鮮製成，乳香味超濃郁，入口超滑，如果買唔夠5000Yen，自己都要買一杯來試試（ 350Yen）！另外，我都是試左呢度嘅牛奶，都係超香醇好飲嫁，一啲騷味都冇！