【美食】鳥取米子市大山黑牛処強小亭：一嚐2017年日本肉質第一又抵吃的鳥取和牛－「立」即去旅行 Lap's Travel

日本三大和牛：神戶牛、松阪牛和近江牛就很多人都知，但在2017年既時候，於日本每五年舉辦一次的日本第一黑毛和牛大賽之中，鳥取縣既大山黑牛憑著其優質的脂肪分布比例和入口即溶的口感，成功獲得第11屆全國和牛能力共進會的多個奬項，成為優勝者和日本第一！贏絕日本三大和牛！大山黑牛一夜間係日本大受歡迎！其實鳥取和牛本身亦係和牛既元祖，最頂級的便是「鳥取和牛油酸55」，脂肪含有55%以上既油酸是橄欖油主要成分，膽固醇較一般和牛低，完全唔會對人體做成負擔，但要達到這級數，平均每20隻牛只會有3隻達標，所以產量稀少而很少出口！今次去位於米子市既強小亭，店內就係使用大山黑牛作為食材，除了一般部位外，連罕見部位都可以食得到。

在出發之前想先預約座位，上了官網發現只有電話提供而冇email，但見佢有提供英文menu，所以就試下上facebook搵下，結果搵到就send個message過去問問，就成功book左枱。強小亭位置唔太近JR車站，不過行過去都唔算太耐，建議行大街光猛一點，由車站出一直行幾個街口再轉右行一陣就到，一不留神就好容易錯過，因為入黑後餐廳附近都幾黑，好彩門口擺左個「大山黑牛日本一」既牌係到～門口位就擺左得獎獎杯同獎狀，而店內裝修和用具都很有格調，每一張枱都好像包廂一樣，坐得舒適之餘又充滿私隱度。一入去，連預約email都未畀，就已經知道我係預約嗰個人，可能因為這邊比較少遊客到，然後侍應就帶我上二樓坐。

佢有分主餐牌和另一份特別餐牌，提供既英文menu只翻譯了主餐牌，因為特別餐牌列出來的是剛剛得獎入回來的牛！所以決定叫左一個套餐，包左和牛壽司、三種稀少部分和牛、兩種和牛食法、沙律、和牛炒飯、牛尾湯、自家製既甜品和紅茶，咁多樣野都只係6800日圓超抵吃；另外亦叫左得獎牛既稀少部位，大約4千日圓左右，以和牛價錢來說超便宜，這個價錢如果在神戶，只可以食到午餐仲要未必係級數高。好快就到第一樣上枱，就係炙燒和牛壽司啦，望落去好似好生血淋淋咁，但食落去唔似食緊生野，肉質好軟熟好有牛肉味，味道唔錯。

然後就到三種稀少部位上枱，我唔係專家所以唔係好識分咩部位，但即使係自己燒出來，放入口都好柔軟，有些人很怕吃和牛那種很油的感覺，像神戶牛那種就真的是入口即溶，但就會少左點咬口，而這種大山黑牛就冇這種問題，帶少少肉既口感而未到即化，牛肉味真係超濃！優質既和牛即使唔係燒到全熟都冇問題，食落口會更滋味！配料方面有2種鹽（粗鹽和岩鹽）和兩種醬油（甜和鹹）、wasabi、蘿蔔蓉，個人最鍾意岩鹽既食法，略帶出牛肉既鮮味又唔會蓋過佢既味。

之後上左一款係點佢提供既汁，而另一種係點雞蛋溝蛋白。第一種食落都幾香，但我還是鍾意鹽微微帶出牛肉香的感覺；另一款食落口感好滑都幾夾。食到呢到，突然個老闆走了入來打招呼！原來係facebook用英語訂座和我溝通的人是老闆來的！他知道我們是遊客特登從遠方來光顧，所以特別吩咐了員工好好招待我們，還抽空坐下來和我們傾究介紹下，估唔到老闆英文都幾好，仲解釋咗「強小亭」呢個名嘅由來。原來因為米子市餐廳唔係好多，大多數也以居酒屋為主，而老闆係負責和市政府有關係的人，加上佢係土生土長的了鳥取居民，雖然曾經在東京、海外地方工作了一段長時間，但在退休之後，決定回來米子開辦一間提供優質食物和服務嘅餐廳，所以「強」係指這間餐廳希望在米子這個「小」小的地方變得強大，令更多既人會喜歡這個地方，很有願景和意思。

往後嘅這餐飯，老闆也一直陪着我們吃我們傾計。然後突然上了一塊葉，原來係畀我們清一清口腔的燒肉味，咬落去好爽口，然後啲汁液會散發出來，味道係酸中帶甜，感覺好fresh；跟住再上埋沙律，每一種都好新鮮爽甜。

清完口腔之後，就上特別餐牌上既得奬和牛，望落去油脂分布比例比剛剛那一碟更為平均，就像大理石一樣，我覺得燒到七成熟就剛剛好了，頭先那一碟食落去其實已經很柔軟，但這一款直情把柔軟程度推到極致，而且牛肉味非常香濃，一個字講晒：正！食到呢度，所有燒牛肉都已經食完，剩返就係牛肉粒炒飯、湯、甜品和茶，本身因為只係叫咗一個餐，其他係散叫，所以炒飯、湯呢啲應該得一份，但好客嘅老闆要我們每個人也試到，所以就送多一份給我們！先講下個炒飯，珍珠米超好食，加埋牛肉粒炒得好惹味，即使已經吃飽了還是吃到一粒飯也沒有食剩；至於牛尾湯，也非常足料，佢清得來又好有濃郁嘅牛肉味，我超愛這款湯。

最後上枱既，係自家製嘅Tiramisu雪糕，冇錯係Tiramisu樣同味道既雪糕，老闆話之前好多食客食完之後都超鍾意，所以決定一定要放落Menu，這款甜品為這一餐畫龍點睛和劃上完美嘅句號，真係要多謝老闆熱情既款待，希望大家去到鳥取縣米子市都會去幫襯下啦，因為真係超抵食而又好食食嫁，係日本食評網tabelog仲攞3.59咁高分嫁！大家一定要去試下呀！