【遊記】Day1「東京」補完計劃秋季之旅 2018－「立」即去旅行 Lap's Travel

第1天（星期四，18/10）

行程：香港》成田機場》上野御徒町精選永安國際酒店 Hotel Wing International Select UenoOkachimachi 》築地》自由が丘》押上Skytree 》銀座》上野酒店Vlog : (點選下圖前往我的vlog了解更多花絮）

捱完成晚紅眼機之後，一落機就急急腳開始今日既行程，不過入境都搞左好耐，出左關就即刻去換左張Skyliner 同72小時metro車票先，然後就出發去呢幾日會住既酒店。今次入住位於上野既上野御徒町精選永安國際酒店 Hotel Wing International Select UenoOkachimachi（按名介紹），佢係今年5月先新開張，都算幾近JR上野站、metro上野站同京成鐵路總站，拉住件行李過去唔使8分鐘就到，不過咁早就未可以check-in，所以先暫寄行李，今晚返來再check-in。

第一站出發去築地，雖然場內市場已經搬遷左去新開既豊洲市場，但場外市場仲保留緊嫁，其實成個場外市場唔多唔少都受到新開既豊洲市場影響，人流方面最為顯著，以前係到行真係迫到人貼人好似行年宵咁，但現在就行得都幾鬆動似平日出油尖旺（加上這天是平日），唔知依家場內外分左開之後，呢邊往後會變成點呢～

其實好多間出名既海鮮丼都如常係築地營運緊，例如我之前已經光顧過，今次再次光顧的鮨國（按名看上一次食評），人龍就冇上次咁多，好快就入得去食，不過可能呢個時間並不是海膽當造既季節，所以水準冇上次咁好，但整體質素依然唔錯。

食飽飽第一餐之後，行左一陣就搭車去自由之丘啦！自由之丘係其中一個我每一次來東京都有考慮去，但每一次到最後因為行程編排緊緊而被放棄去既地方，所以今次決定點都要來一次。這裡是一個很悠閒的小社區，四圍有好多雜貨店、甜品店，係一個甜品天堂，而且遊客好少同當地人也很少，行得都幾舒服，詳細介紹、看食評：【美食+觀光】吃吃行行自由之丘：甜品森林Sweets Forest（Le Souffle）、自由が丘ロール屋、黑毛和牛腰塚。

來呢到既重點之一，就係食甜品！第一站係去左甜品森林Sweets Forest食梳乎厘！森林入面好似一個只賣甜品既 Food Court咁，入面有好多間甜品店，想食邊間就入邊間。內裡佈置有點像入左愛麗絲夢遊仙境般的童話世界，色彩繽紛又帶點可愛氣氛。梳乎厘食落好重蛋香味，質感很柔軟但未至於完全地空氣感，再落埋個sauce落去更加突出到梳乎厘既蛋香味，質素唔錯，但就唔夠之前係六本木食過既好食～

第二站去左有小威尼斯之稱的La Vita。但其實這個位置好小，就真的得影相出來的這般大小，而且那些水很淺又很污濁，雖然也看見有些日本人來拍下照，但如果是專程來看的說，就真的不太值得，經過看看就無所謂吧。第三站就去左自由が丘ロール屋，一間專門賣軟綿綿爆哂漿（忌廉）既瑞士卷的甜品店，質素很高！蛋糕質感放落口係超柔軟所以唔係好挺身，食嗰陣要小心點，中間既忌廉好易漏出來，但軟綿綿真的很好吃！

食左咁多甜食，係時候食返啲鹹食啦，去左黒毛和牛腰塚食一款每日限量供應30個叫做炸黑毛和牛半熟玉子的肉丸。買的時候並非新鮮熱炸，所以咬下去是凍的，但凍左依然能夠保持到外面層炸衣酥脆，而肉既部份牛味好濃好香好嫩。至於玉子部份略為過熟了一點，只有少量蛋黃流出。食完就返去車站搭車，見返之前係九州食過既crepe，又即刻食返件甜品先走。

係搭車去skytree之前，因為要係渋谷轉車，所以順便行左2個圈，去左搵想試好耐但一直未有機會試到既然花抄院。由2009年就創立的然花抄院，憑著招牌的Castella，亦即係半熟蜂蜜蛋糕，加上各式各樣連名字都很美的御菓子如叫幻月的餅乾和叫畳畳的抹茶酥等等，每一樣產品包裝都清幽淡雅，有種京都感覺般的禪意。一定一定一定要試的是招牌作Castella半熟蜂蜜蛋糕，包裝是純白色橢圓形以傳統和紙手工摺疊，就像一個大雞蛋一樣，既優雅又堅固。

包裝就很精美，至於味道當然也不能被忽略啦，蛋糕據說用的雞蛋，是由京都用丹波黑豆飼養的純種雞所生產的，每個蛋糕會用上四隻雞蛋的雞蛋黃去焗製！所以吃起上來蛋味係超濃郁，而且帶有香甜的蜜糖味，甜得來有餘韻，越食越好食；至於口感方面，食落去濕潤綿密帶點黏性，但入口近乎即溶而且軟綿綿，一咬下去，半熟位置流點金黃流心出來，真係超邪惡，可惜賞味期限超短，得兩日，唔能夠帶到返香港。至於其他幻月和畳畳抹茶酥就普通了一點，抹茶味既不突出，又不算是特別好吃，絕對係被半熟蜂蜜蛋糕比下去，試蛋糕就足夠了。

買完食完就去等左好耐既Skytree晴空塔啦！（按名介紹）同自由之丘一樣，都係我每一次來東京都有考慮去，但每一次到最後因為各種原因而冇上過去既地方，所以今次決定點都要來一次！係Skytree上面慢慢地望著窗外，由日景到黃昏，再由黃昏到夜景，城市的燈光漸起，特別是看著東京鐵塔亮光，真的是一件很美的事。

skytree返落黎後，就行下個商場shopping，見到東毛酪農63°c的牛奶雪糕，即刻叫返杯嘆下（是日食左好多甜野呢。。。），奶味係超超超超濃超香醇又唔會過甜，口感超超超超滑，連下面個竹炭筒都超脆超香，咬落去仲會食到一小粒一小粒既芝麻，超有誠意！兩者配合一軟一脆真心正！十個推薦！

行到咁上下就要去晚餐，今晚去食拉麵，呢間拉麵店仲剛剛上完無線電視《X遊東京》被介紹過，佢就係位於銀座的Ginza Noodles むぎとオリーブ拉麵（按名食評）！這間拉麵店更係連續2年入選過米芝蓮推介！這店的裝修風格行歐陸可愛風格，拉麵味道令人覺得親切和細緻，湯底比平時食開既拉麵來得溫和好多，唔會太鹹，味道濃郁得來又帶一點清新，重點推介添加店家提供的橄欖油落去，成個湯底的味道得以全面昇華，鮮甜味和香味變得很突出，食到最後我成碗麵也差不多變哂綠色。