「立」即去旅行 Lap's Travel

磯壽司係其中一間由築地場內市場搬遷至新既豊洲市場既壽司店，今次八點半左右來到，見磯壽司冇乜人，加上兩大壽司名店壽司大同大和壽司之前已經係築地市場食過，而且經過壽司大時見到大排長龍，大和壽司則分佈係另一棟大樓所以冇過去睇，就決定趁呢個機會試埋其他築地搬過來，本身也充滿著歷史的食店。

其實之前築地場內市場還未搬遷前，都有經過見過磯壽司，現在來到豊洲市場，最大既分別一定係空間，其實唔只這間，應該係話間間店都大左好多，坐得闊落左，冇左以前嗰種坐得基乎人貼人既感覺，現在比較像一間高級餐廳咁，少了以前嗰種少少舊式的溫馨感而多了種冰冷感。入到去被安排坐在壽司吧枱，可以幫住師傅整壽司，枱前面有一排魚生、刺身放係雪櫃入面，一塊塊赤貝、帆立貝、赤海蝦、拖羅擺係面前，真係睇到流哂口水。

壽司套餐有好多款，最後叫左set特上豪華壽司同豪華壽司套餐，師傅會一次過整哂先，然後擺係你枱前面，兩者分別在於件數和一、兩件有些不同，例如特上有赤貝、熟蝦但冇帆立貝，豪華就得帆立貝。

中拖羅同大拖羅都好食，大拖羅食落唔會有筯，中拖羅則有少少，魚既油脂味好香，感覺好肥美，入口即溶，而且兩者都好新鮮，係成個set入面最好食的壽司；鯛魚食落好有咬口，略嫌wasabi落得太重手，食落太攻鼻，爭啲喊出來；赤貝望落食落都好新鮮鮮甜，口感爽口不煙韌。

醋鯖魚壽司食落一般般；穴子壽司始終才是我的最愛，入口即溶又帶魚脂香；蝦既wasabi又係落得太重手，食不到蝦味，只有食到流眼淚；三文魚子放入口就粒粒爆開好新鮮鮮甜；海膽食落甘香有餘韻留係口腔，質素唔錯。整體上，飯既握力剛剛好，食落唔會好黏又唔會太散，放落口後可以食到飯握得好鬆軟。

總括來說，唔夠之前係壽司大咁高咁驚喜，同大和壽司比較就爭少少，不過佢就唔使等位，所以要食邊間就要自己決定啦！

推薦指數：★★★

抵吃指數：★★★

地址：東京都江東区豊洲 6-5-1 豊洲市場 3F

營業時間：星期一至六 06:00-16:00 （星期日、假期、市場休市日休息）

網址：https://tabelog.com/tw/tokyo/A1313/A131302/13091991/ (詳情請參閱網站😋)

「立」即去旅遊Youtube channel、Facebook專頁、Instagram、Pixnet：

Youtube Channel：https://bit.ly/2scNVfk 

FB： https://www.facebook.com/lapstravel/

IG：lapstravel