【美食】東京都內（Bake姊妹店系列）Pogg蕃薯批、Dou銅鑼燒、Press Butter Sand 焦糖奶油曲奇、Ringo蘋果酥、ZakuZaku脆泡芙－「立」即去旅行 Lap's Travel

之前曾經在香港掀起過一股芝士撻風潮的Bake，雖然已經不像剛剛開張般有這麼多人追棒，但其實在日本，佢售賣不同類型的食品店舖已經不停延伸開去，繼之前試過既蘋果酥和脆泡芙之外，今次就一口氣試哂咁多款，睇下有邊啲係值得試，邊啲係一般而已，今次試左既包括有Pogg蕃薯批、Dou銅鑼燒、Press Butter Sand 焦糖奶油曲奇，另外為左方便睇，之前試過的Ringo蘋果酥、ZakuZaku脆泡芙也會包括在這篇內。

（1）Pogg蕃薯批

「POGG」這個品牌名稱是結合了「POTATO」與「DIG」，意思係將蕃薯批無論是外型、口感、味道都經過改良再進化，佢暫時仲未有好多分店，東京都內的話就是新宿這間分店。店舖很細小，來到的時候也不用排隊。看著一條條形狀特別呈三角形，色澤焗得金黃的蕃薯批，望住都令人流哂口水，據官網說蕃薯批採用嚴選過嘅國產番薯，質素有保證。

一條蕃薯批大約係手掌般大小，價錢1個320日圓，5個有特價1500日圓，我買的時候還是新鮮出爐，食落熱辣辣！最外層的是蕃薯蓉，包裹著滿滿的流心番薯奶油，下層則是脆口的批底，一口氣試到三種唔同既口感。咬開之後，中間的流心還出緊煙，爭點燙到嘴！奶油流心順滑好邪惡，有點像返集團既芝士撻，不過呢個係蕃薯版，而蕃薯蓉柔軟，批底亦鬆脆，食得返蕃薯嗰種天然的甜味，成個批唔會話過甜。整體上質素有保證，不過佢始終係蕃薯，食完會有點膩同滯，所以一條如果兩個人share來食就剛剛好。

（2）Dou銅鑼燒

Dou係咁多間姊妹店入面，係暫時唯一一間以日式和菓子—銅鑼燒做藍本，其他的是以西式烘培為主。不過，它提供的不是一般人認識的銅鑼燒，而是柔合了西日兩方面，充滿顛覆性的新派銅鑼燒。今次來到池袋車站的分店，和其他姊妹店一樣，裝修風格都是簡潔時尚，金屬銅色給人的感覺很高雅。和網上看到的不同，來到的時候是完全冇人排隊，望入店內只見店員在製造緊少量銅鑼燒。店舖周不時會推出不同合味，價錢大約由270日圓至3百幾，都幾化算的。

今次試左原味和抹茶味，平時的銅鑼燒，外面那層皮是有點像熱香餅那種，中間再夾雜著紅豆餡，而Dou的則是用了像海綿蛋糕的口感去取代；據說中間的餡料除了是用高級紅豆「雅」煮成的紅豆蓉外，亦加添了北海道產的奶油和麻糬，用料感覺矜貴，拿上手時有種爆餡的感覺。

賣相就好像不錯，不過食落既驚喜感就欠奉，因為食落就真係似蛋糕，但嗰皮口感有點乾，而麻糬食落係偏軟身，不是煙煙韌韌那種，紅豆餡唔會過甜，最好的是奶油，全靠奶油救返成舊銅鑼燒；至於抹茶味，整體上好過原味一點，抹茶奶油食得出抹茶的甘和香而不會苦澀。不過，即使抹茶味是好一點，兩件銅鑼燒個人覺得沒有什麼亮點，比較起同集團其他的芝士撻、蘋果酥等等失色不少，順路經過的話可以一試既，即使沒有吃到，損失也不會很大。

（3）Press Butter Sand 焦糖奶油曲奇

Press Butter Sand 剛出的時候曾掀起過排隊潮，佢同集團既其他產品唔同，佢主力係賣手信的，無論係池袋、新宿定skytree都會搵到佢既分店，而且全部都係唔使排隊既，唯獨係我今次光顧既東京站分店係要排，因為暫時就只有呢間店係有售即場焗製的焦糖牛奶油曲奇，可以即買一塊現場吃，新鮮熱辣。

但可惜今天來的時候已經售罄了即焗即食的，唯有只買手信版，要留意返賞味時間很短，只能放一至兩星期左右。禮盒的包裝設計得很有格調，灰泥色厚身紙盒質感很好，送禮一定也不失禮，而且盒上亦有很多店舖既細心位，例如標榜了餅乾的size，每一塊45 x 45 x 20 mm的完美比例，代表能夠一口吃的大小；又會寫上曲奇的特色，如曲奇係模整，裡面裝滿牛油忌廉同焦糖，很容易咬等，每一個細節都給人很用心的感覺。

官網說曲奇餅層是用北海道嚴選的小麥粉所焗烤，而內裡的奶油焦糖餡亦都係用上北海道最頂級的新鮮牛乳製作出來。用料很高級，包裝和賣相都很精美，至於味道呢，買之前在網上看到是很多好評的，食落確實係美味但未至於驚艷，兩層餅其實很容易散，咬落去口感係厚實但卻鬆化的，而且小麥味好香濃突出，是頗出色的；至於餡料我覺得唔夠有飽滿的感覺，帶少少偏甜，而且外於曲奇塊餅麥味好出，焦糖亦好出，以至奶油味就掩蓋了，所以餡料方面要扣點分。整體上，這種餅是買得過的，拿來當手信會給人很有誠意的感覺，但因為餅乾冇乜防腐劑，記得要留意返賞味期限係好短呀！