【觀光】東京豊洲市場：終於從築地市場搬過來了－「立」即去旅行 Lap's Travel

有超過80年歷史的築地市場終於在今年完成佢既任務，接棒的就是現時分成了三大樓棟的豊洲市場，基本上成個九月十月也有好多媒體有相關既報導，由計劃到慢慢起出來，到遇上各種各樣既問題和醜聞而導致延期開幕，終於在10月13日正式開放畀公眾入場啦！好好彩，今次既旅行日子遇上豊洲市場剛開幕不足一星期，可以咁快就有機會睇下這個承接左築地之名既地方，朝聖一下。

交通方面有好多媒體都介紹過，一係就搭巴士，一係就搭鐵路。今次我唔係搭巴士，而係搭鐵路，鐵路過去都有兩種方法，一種係搭到去JR新橋站汐留出口，一出就會見到百合海鷗線，直接搭到市場前站需要約35分鐘；而另一種就好似我咁，搭metro有樂町線去到豊洲，再喺豊洲站搭去百合海鷗線去到市場前站。如果想早點去到排那些長龍店而又搭鐵路的話，建議搭metro，因為頭班車比起JR會早點，如果有買到metro pass 既話，去到豊洲站既有樂町線都會包埋。市場前站得一個出口，係絕對唔會蕩失路既！

一出站，就會見到有個指示牌，方便大家去搵自己心目中想去食既舖頭。左邊既通往係水產卸賣場棟和青果棟，而右邊的則是通往水產仲卸賣場棟，大部分既食店都會係呢邊，包括深受歡迎既壽司大！今次我首先要去既係右邊，去左食店多嗰邊先。

沿著天橋行過去大約5分鐘左右，就會見到「関連飲食店舖」，大部分食肆就係集中係入面，包括吉野家、勢壽司、仲家等，當然唔少得門口已經大排長龍既壽司大啦！入面有點像商場，所有食肆剛好圍了一個圈，所以好方便逛，而衛生情況亦當然比起築地嗰陣好，起碼如果要排隊的話唔使日灑雨淋食風，仲要有櫈仔坐，但感覺上又好像缺少了一點風味。其實呢日人流唔算好多，可能係平日關係，加上地點比起之前遠而且環境寬闊左，所以人望落都少啲，好多間食店其實都不用點排隊。

一場來到，當然要搵返間食店來試下，今次就去左磯壽司（按名食評），貪佢唔使等位，可以快快手食完繼續行下。整體上質素算唔錯，不過就冇乜驚喜～中拖羅同大拖羅都好食，大拖羅食落唔會有筯，中拖羅則有少少，魚既油脂味好香，感覺好肥美，入口即溶，而且兩者都好新鮮，係成個set入面最好食的壽司。

食飽飽之後出返來，再行入少少就會到水產仲卸賣場棟入口。一開始係見學區，但啲展板感覺有啲流流地～見學區隔住塊玻璃望落去，可以見到一條隙仔既水產檔，而且呢日黎到封左唔畀落一樓，冇得近點睇下，感受不到現場氣氛，不過其實都只幾似平時去街市咁，唔睇損失不是很大。另外，呢到亦放左漁販平時會用到既卡車，參觀者可以企上去影下相打下卡。

再繼續行入去，然後上一層，就會黎到乾貨區，例如賣雜貨、紀念品，以前很受歡迎專賣玉子燒的丸武也在這區。不過，行這區要小心一點，這裡不時會有卡車四圍穿梭，要小心避免撞倒。

行返出來，見到對面寫住「豊洲市場」嗰棟大樓就係「水產卸賣場棟」，裡面係進行吞拿魚拍賣嘅地方，不過吞拿魚拍賣嘅公開見學要等到2019年1月15日先有得睇！行過去要沿著天橋兜勁遠，而且要先經過旁邊既「管理設施棟」先過到去，裡面亦有部分食店，不過暫時並未係全部食肆開哂。由於頭先已經食飽飽，所以就冇係呢邊食野，只係行下參觀下。

除咗食店之外，呢到仲有一個PR區，裡面展示關於「築地市場」、日本魚市場嘅發展歷史，亦有關於豊洲市場嘅介紹。入面仲擺放咗一條吞拿魚模型展品同吉祥物，畀大家影相留念。

因為未有得睇呑拿魚拍賣，所以就冇再入去水產卸賣場棟，轉移行返去近鐵路站少少既「青果棟」，入面係一個蔬果批發市場。本身係天橋行過去的，臨近入口處係地下位置，會有另外三間食肆係到，而其中一間就係之前係築地同壽司大一樣成日大排長龍既「大和壽司」啦！出奇地，呢日既大和壽司係冇乜人排隊，係望左陣，影下面張相既時候，先突然有啲人湧出來，但同舊時係築地見到嗰種人頭湧湧既情況比較起來，冷靜左好多。

上返去就入青果棟，入口處會有保安派參觀證先入得，沿路一直都係有玻璃窗隔住，同一開始水產仲卸賣場棟一樣，不同的是由水產變左做蔬果。行到最入就係一個展望台，同樣係隔住玻璃窗，所以係唔會聽到任何聲音，感受唔到市場既氣氛，可能去油麻地果欄既氣氛更濃厚更有地道風味。個人認為如果目標係去大和壽司的話才過來青果棟吧，這棟大樓的參觀價值不是很高。