【遊記】Day2「東京」補完計劃秋季之旅 2018－「立」即去旅行 Lap's Travel

第2天（星期五，19/10）

行程：上野酒店》豐洲市場》台場TeamLab 》新宿》讀賣樂園》新宿》上野酒店

昨天搭完紅眼機之後就一直四圍去，都沒有怎樣休息過，所以比較早返到酒店休息，迎接今日非常充實的一天！第一站出發去10月先新幕的話題地方—豊洲市場（按名介紹）。今次既旅行遇上豊洲市場剛開幕不足一星期，可以咁快就朝聖一下這個承接左築地之名既地方，機會難得。雖然本身諗住早少少來試搬左過來既壽司大，但最後都係決定瞓多一陣先來到。一出站首先要去既係右邊，去左食店多嗰邊先。

因為遲左來，所以壽司大已經好多人等緊，為左慳時間，唯有轉搵另一間食店，見磯壽司（按名食評）冇乜人，加上另一壽司名店大和壽司之前已經係築地市場食過，就入去試下。壽司套餐有好多款，最後叫左set特上豪華壽司同豪華壽司套餐，師傅會一次過整哂先，然後擺係你枱前面。中拖羅同大拖羅都好食，大拖羅食落唔會有筯，中拖羅則有少少，魚既油脂味好香，感覺好肥美，入口即溶，而且兩者都好新鮮，係成個set入面最好食的壽司；飯既握力剛剛好，食落唔會好黏又唔會太散，放落口後可以食到飯握得好鬆軟。

食飽飽之後出返來就四圍去行下，最近的是水產仲卸賣場棟，入面有見學區、乾貨區，例如賣雜貨、紀念品，以前很受歡迎專賣玉子燒的丸武也在這區。不過，行這區要小心一點，這裡不時會有卡車四圍穿梭，要小心避免撞倒。之後到另一邊的水產卸賣場棟，裡面係進行吞拿魚拍賣嘅地方，但首要先經過旁邊既管理設施棟先過到去，管理設施棟有一個PR區裡面展示關於「築地市場」、日本魚市場嘅發展歷史，亦有關於豊洲市場嘅介紹。

最後行青果棟，這棟大樓的參觀價值不是很高。見冇乜特別野睇，就轉移陣地，出發到附近既teamLab（按名介紹）。係市場前站搭返百合海鷗線係青海站落就係最近，一出站就會見到指示牌，只要穿過Toyota城同個摩天輪就會到。今次其實已經係開門前一刻來到，勢估唔到啲人多到排哂落樓梯排到勁遠，好彩條排都算郁得快，大約15分鐘左右就去到門口。

來之前要預先上網購票，這裡日日都勁到人！遇上週末假期，真係一票難求，唔想撲空的話就記得較啱日子上官網購票啦！teamLab官網所講「視點不止一個。你會成為中心，藝術作品會跟隨你產生變化」，將藝術同觀賞兩者合而為一，整個館內既作品，都會因應參與者的與周圍環境的互動，而令作品轉變，每一秒間所看到、發生的都會不同。

第一次接觸這種互動型數位藝術展覽，真係令人覺得很驚艷，就這樣子一行就行了三個半小時左右，能夠一邊欣賞作品又一邊成為作品，teamLab將藝術和科技融合帶來這種新的藝術視覺，真是一個好有趣的體驗。

出返teamLab之後就到旁邊既outlet 行下買下野。

再由台場直接搭JR返新宿先，試左芝士撻Bake姊妹店系列的Pogg蕃薯批（按名食評）和旁邊望落好吸引的Milk Craft Cream（按名食評），蕃薯批最外層的是蕃薯蓉，包裹著滿滿的流心番薯奶油，下層則是脆口的批底，一口氣試到三種唔同既口感。咬開之後，中間的流心還出緊煙，爭點燙到嘴！生忌廉配雪紡蛋糕，成杯拎上手嗰陣，只會見到一小個白雪雪、感覺輕盈又軟綿綿的小雪山，而蛋糕就係下面。第一啖梗係要食左主角先，入口奶味好濃而且好輕身有空氣感，有點像平時飲台式飲品既奶蓋，唔係佢冇咁膩、甜和稀，所以好容易不知不覺間越食越想食，係一種好邪惡既生忌廉！

食得兩少件甜品當然唔夠喉，朝早食完壽司撐到下午茶，所以就去左The Original Pancake House（按名食評）坐低慢慢食返餐。點左佢招牌作叫做Dutch Baby荷蘭寶貝既pancake，食落去口感有點煙煙韌韌，外圍側邊係微脆的，中間則很濕潤，而且蛋香味好濃郁，有點像那種crepe的皮。Pancake本身甜度係適中，但加左糖霜上去就變到好甜，不過因為加左檸檬汁落去，微微的酸味剛好中和及平衡返的偏甜味。

醫飽肚都差不多日落（雖然當時只係四點幾），但接下來就要到今日重點之一的讀賣樂園（按名介紹）！去讀賣樂園最主要係係因為每年冬季期間限定既夜間點燈活動—寶石燈彩（Jewellumination）。成個樂園變成了一個滿佈燈飾的童話世界！就這樣子一行就行了兩個小時左右，之後再返新宿晚餐。

晚餐地方是牛扒專門店ル・モンド（Le Monde）（按名介紹），tabelog有成3.58既高分，但偏偏門口招牌細到行過也基乎會忽略，而且性價比係超高，是一間隱世小店。必試牛柳！牛柳外有一層薄薄的火腿包著，拼埋牛柳食係超香口超夾，而且牛柳肉質很柔軟，唔會煎得過火，牛肉味好濃，輕輕抹一下牛油，一啖就食齊柔軟、脆口、香濃於一身，唔好睇佢得一件以為唔夠食，其實佢好厚身，食完真係大滿足；至於沙朗牛扒，肉質口感實淨好多，但牛肉味係濃過前者，視乎喜愛肉味濃抑或是肉質軟；和牛柳擺在一齊的是另加的肉眼扒，但明顯地被比下去，講肉質柔軟度唔夠牛柳來，比肉味濃又唔及沙朗牛扒。

晚餐後的飯後甜品就來到果実園リーベル（按名介紹），因為被VS嵐係電視節目中推介（嵐的大挑戰）而再次爆紅，每一款店家提供的水果甜點都充滿著令人唾涎欲滴的視覺效果。點了士多啤梨蛋糕和哈蜜瓜芭菲，成個蛋糕佈滿一粒粒紅潤有光澤的士多啤梨，未咬落去都覺得一咬下去會成口士多啤梨汁，而芭菲外型仲誇張，將啲哈蜜瓜皮雕花一樣。視覺上攞哂滿分，至於味道方面，士多啤梨多汁但略嫌不夠甜，帶少少微酸，忌廉味道不算很重奶脂香味同埋不算很滑，蛋糕也未至於很鬆軟，整體上主要是為了突出水果的味道，可惜今次士多啤梨未夠好，換轉吃香印提子蛋糕的話應該會好好多。