【美食】築地鮨國刺身丼：場內市場以外的好選擇－「立」即去旅行 Lap's Travel

無論有冇去過日本築地市場的人都知道，這裡是分為場內市場和場外市場，當中場內市場基本上每一家食店都是大排長龍的人氣食店，很多人清晨時份去排，動不動就要排幾個鐘，情況更越來越嚴重。基本上壽司大我已經吃過2次，大和壽司也吃過1次，對於場內市場也已經心滿意足的了，所以今次決定瞓飽先出發，並轉投到場外市場鮨國的懷抱。

鮨國開10點，我9:30左右黎到已經可以排第二，睇下餐牌影下相已經差不多入得去，但其後都陸續多人。店舖細細間，不過都仲叫做大過場內市場嗰堆名食店，格局亦係傳統壽司店般，而我就坐在壽司枱前面，望住師傅們一碗又一碗咁整呢到最出名既—刺身丼啦！！（佢亦有提供壽司的）

JXCV0629

我叫既當然係最出名嘅元祖海膽啦！！足足係放滿哂成個飯既海膽呀！！一片又一片金黃色既海膽成碗食呀！影相好似好大碗，但放上手其實只有手掌咁大碗。不過唔好以為佢細細碗份量就好少，食哂其實都幾滯，又因為海膽好多，基本上每一啖飯都會食到一啖海膽。海膽鮮甜入口甘醇，食後還有餘韻留係個口入面，略帶少少既海水味和鮮甜味就咁俘虜左我既味蕾。我亦另加左帆立貝，同樣新鮮貨色，一食就知道絕不欺場，鮮甜到不行！我另亦試左朋友既吞拿魚和三文魚子，一樣只能用鮮甜來形容。