「立」即去旅行 Lap's Travel

第5天（星期四，20/10）

行程：池袋 》築地 》東京駅 》池袋

今日雖然是要去築地食好野，但就一改以往清晨就已經到達的習慣，因為上兩次來的時候，就已經食過了場內市場兩間超人氣食店，所以今次就轉為在場外市場覓食。來到的時候，無論是場內市場還是場外市場的遊客都已經很多，不過因為目標食店還有過多小時才開門，加上門前也沒有很多人在等待，所以決定四圍逛逛。

首先行的是場內市場，因為一直盛傳這裏會搬去豐洲，所以趁搬遷前來懷緬一番（結果到現在還是遙遙無期），包括那些有趣的電動車、永遠都打咗幾個蛇餅嘅壽司大、吉野家的始祖店等等。

然後就輪到場外市場，普遍的鋪頭也是賣日常用品（見到有一間掛滿鮑魚刷嘅聖誕樹）、食材和食物為主，還有一間神社。

行左差唔多一個鐘頭，就返咗去今日嘅目標食店—鮨國（按名食評），很奢侈很滿足很豐富的一餐早餐，好彩因為早到所以第一輪就可以入去食，因為返出來之後又是打哂蛇餅好誇張。

食飽左有氣有力後，就轉戰左東京站行地下街，包括到最愛的Pokemon Centre（按名推介）。再行到咁上下又買到咁上下手信，就到附近的大丸百貨嘆番個係茶寮都路里（按名食評）既下午茶。

因為今日主力係購物和買手信，去完兩個地方之後，戰利品已經多到冇手拎，所以就返咗池袋嘅酒店放低，然後就喺附近行下，包括去咗tokyu hands、又一次既pokemon centre（按名推介）。然後再去伊達の牛たん本舗晚飯（按名食評）。

食完見仲好早，就繼續喺池袋行街搏殺，去左好靚既空中花園，又順便買咗好多宵夜返酒店食（Harbs多層水果蛋糕、晴王青提子同便利店買既得獎布甸），三樣食物真係正到無得頂，提子清甜多汁又香、水果蛋糕甜而不膩，不同水果層次又甜又酸配合濃滑忌廉，簡直係最佳飯後甜品、焦糖布甸超級軟滑而且充滿蛋香，配上微苦焦糖醬，吃完覺得是全世界最幸福的人，今天真是飲飽食醉而充滿罪惡感和內疚感的一日呀！

「立」即去旅遊Youtube channel、Facebook專頁、Instagram、Pixnet：

Youtube Channel：https://bit.ly/2scNVfk 

FB： https://www.facebook.com/lapstravel/

IG：lapstravel