「立」即去旅行 Lap's Travel

話說之前和母親來大阪的時候，都曾經來過這間味乃家想幫襯，當時的時間大約係下午茶時間，但人龍完全排滿哂成條樓梯，都唔知要排到幾時，因為唔想要母親等咁耐，所以嗰次就放棄左。今次就係傍晚時間來到，人龍依然都係排滿哂成條樓梯，餐廳都有告示牌，如果繩子內排滿哂人就唔好再排，但我剛好就排到入隊，既然第二次一場來到，今次就試吓等下。

意想唔到的是，排隊的時間比預期中少，由隊尾排到去隊頭大約只係需要20分鐘，完全超乎想像。排到一半嘅時候，店員就拎咗Menu過來， Menu分了日文、英文、繁體中文、簡體中文，有散叫亦有套餐，視乎個人喜好，然後店員會預先幫你落好單。原來這間味乃家仲拎咗2017年米之蓮飲食推介，所以絕對唔可以睇小，去到門口擰轉頭發現人龍一啲都冇少過～

好快就入到去坐，裏面座位好多，名人簽名板很多、油煙亦很多～每張枱都會附設一塊鐵板，店員會即席在這塊鐵板上整一個個的大阪燒和炒麵等等，完全由店員動手，食客只能眼看手勿動。

今次叫左個套餐B（3350Yen），包左味乃家的招牌綜合口味大阪燒、細嘅綜合炒麵和牛筋肉蔥燒。首先第一樣上枱嘅係大阪燒，望住店員三兩下手勢攪混左啲食材，就放落去煎，同一時間，店員又將個煮好了的炒麵放上鐵板到，加隻蛋落去，店員就會叫你先食炒麵，然後等個大阪燒慢慢整熟。炒麵味道很濃，麵質彈牙，整體上都好惹味，

食食下就話個大阪燒都食得，超級快速，食個陣可以因應自己的喜好落調味料，有醬汁、木魚碎、紫菜粉和七味粉。我略嫌佢材料分配得唔均勻，佢這款大阪燒材料有豚肉、花枝、蝦、章魚等，但因為唔均勻，所以當和團友分來吃的時候，有些位置是沒有某些食材～口感味道都惹味好吃，比之前吃過的千房大阪燒好，但略為比美津の的大阪燒遜色。

大阪燒都未食完，店員就係側邊開始準備最後一款的牛筋肉蔥燒，因為鐵板很熱所以很快熟曬，但這個味道就一般般，蔥燒得太乾，食吃來像咬乾草，要加很多調味料先食得到。之前喺美津の都有食過這類蔥燒，但就比這個出色。

成餐唔使四個字就食完，一來佢預先落單，二來佢預先炒定個麵，三來佢同一時間整幾樣嘢食，感覺上比較趕時間，希望食客快點吃完的感覺，加上這裏的通風設備不太好，食完一定會成身油煙味～整體感覺味道就美津の最好，這間第二，千房第三；進食氣氛依然係美津の最好，第二千房，第三這間，不過美津の現在係超爆場的，所以要自己衡量啦，下次再試另一間大阪燒先～

推薦指數：★★★☆

抵吃指數：★★★☆

地址：大阪府 大阪市中央区 難波 1-7-16

營業時間：星期二至五12:00-23:00 星期六、日及假期 11:30-23:00 （逢星期一休息）

網址：http://ajinoya-okonomiyaki.com/top/

「立」即去旅遊Youtube channel、Facebook專頁、Instagram、Pixnet：

Youtube Channel：https://bit.ly/2scNVfk 

FB： https://www.facebook.com/lapstravel/

IG：lapstravel