【遊記】Day 7 多Joy多難「鳥取 + 關西」秋季之旅 2017－「立」即去旅行 Lap's Travel

第7天（星期日，29/10）

行程：大阪》（原定會去神戶布引香草園）神戶》大阪

這天出門口的時候，天色已經麻麻哋，搭地鐵去到梅田站然後繼續用昨天的阪急電鐵兩日卷搭車去神戶。大約35分鐘之後，就去到神戶，不過嗰陣已經開始落住大雨，之後就急急腳行去搭City Loop，佢係一架專為遊客而設，遊走於神戶市內的觀光巴士，如果一日內會搭多過三次的遊客，建議購買一日券（ 660円），因為單程車資都已經要260円，搭多過三次就會回本，要購買的話，可以在車來直接向車內的導賞員購買。

大約搭左5分鐘，就來到第一站目的地，來到到北野工房站落車，然後行過去隔離的L’Avenue Shigeo Hirai（按名食評），不過距離開門時間仲有20分鐘左右，見暫時未有人排隊，所以就返咗去北野工房行個圈，順便避下雨。大約接近開店時間前10分鐘就行返過去排隊，好好彩成為第一個，因為之後陸續已經有其他人來排隊。這間咁接近民居的蛋糕店，居然在臨開舖之前都會有成1x個人排隊，真係厲害！咁點解我要咁早來到排隊？因為這間店的創辦人曾經係2009年世界性的朱古力比賽以一款朱古力蛋糕「Mode」拎過全世界第一，二這款蛋糕每日是限量供應的，大約得四、五件，賣完就冇，唔想一場來到落空，所以點都要來排隊！好彩有排到隊，因為到第二個客人就已經賣晒～每一款蛋糕都好靚，所以另外再買多咗件栗子蛋糕，不過因為店內沒有座位，買咗蛋糕之後唯有過返去北野工房，搵張凳坐低慢慢食。

回到北野工房のまち（按名介紹），係未食蛋糕之前，見到好多學生妹拎住個牛肉薯餅，所以都買咗個試吓，真係外脆內軟好好味！食完鹹既就到甜既，一放入口，「天啊！點會咁好味㗎？」層次分明，朱古力的味道在口內不斷變化，幾種食材的蛋糕締造出過百種的味道，不愧為世界第一！原本食完野就諗住搭車去神戶布引香草園，這個香草園係山上邊，需要搭纜車先上到去，但想走嗰陣勁大風勁大雨，上到去應該都會乜都睇唔到，而且仲會好狼狽，分分鐘去到都無開，所以就取消唔去，留返下一次。因為少咗一個景點，時間上鬆動左，所以就留係北野工房到行下，最後留左勁耐，因為中間同店舖職員（當地人）傾左好耐計先走～

然後搭車去元町商店街行一陣同睇吓手信，雖然呢度有瓦遮頭，但今日既雨和風係大到你唔信，不停咁吹入來，有點令人狼狽。呢條街行得好鬆動，因為遊客唔算好多，街上最主要都係買甜食的店舖，例如好著名的本高砂屋和風月堂。而因為就到萬聖節，街上都有慶祝活動，唯一嘅可惜真係天公不作美。

由於真係太大風大雨，所以決定離開神戶回大阪，去完全以室內為主的梅田一帶行街。首先去左食野先，去左回転壽司がんこ（按名食評）下午茶～然後就去大丸百貨公司的pokemon centre（按名介紹）和Tokyu Hands行。

之後就去埋阪急百貨公司的手信層戰區，買完手信再見到靚靚蛋糕和提子，就買左2個返去做今晚宵夜～再返到酒店放低戰利品之後，就出去味乃家（按名食評）晚餐，今晚食大阪燒，秒速食完就係道頓堀、心斎橋、難波一帶行下藥房，見到日本M記既期間限定肉桂麵包就買左來試，好好好好甜但幾好食，一個人食會有點heavy，share就剛剛好～