「立」即去旅行 Lap's Travel

第5天（星期六，13/5）

行程：大阪一日遊 （大阪1日周遊卡）

位於Grand Front Osaka南館內的函館函太郎是一間非常有質素的迴轉壽司，亦是我選定了會重複光顧的餐廳之一（舊一篇按此），上次來大阪吃過都驚嘆佢用料的新鮮，所以今次帶埋母親來盡情吃吃吃！今次來到這裡要等一下位，但也不算太耐，就趁空檔睇下餐廳門牌今日有咩特別推介。

其實本身冇諗過會幫襯千房的，但因為原本想去的味乃家在下午茶時間去到，依然非常之爆場，母親又很想吃一下大阪燒，去到美津之又係咁多人，經過千房冇乜人就入左去了。裡面大部分食客都係遊客，想先講一點，就係這裡的衛生環境有待改善一下，門口外的位置入去時要先穿過一·大·堆·蒼·蠅！印象分即刻大減啦，真係要想下點解決呢個問題，因為我記得上一次三年前來的時候，這個問題已經存在！今次仲多左，而且連食店內也有！（舊一篇按此）

世界で２番めにおいしいメロンパンアイス在香港也開了分店，不過每次經過都好多人，搞到現在我都未食過香港嗰間，今次去到大阪見有時間，又冇咩人等，所以就試吓呢一個據說係全世界第二好食的蜜瓜包（因為世界最好食係佢師父整的，佢教創辦人整）。位於道頓堀的分店，外型係名乎其實係一加架美食車，門口擺放着一個巨型蜜瓜包模型，一眼就睇到。

今次是我第二次來到海遊館，對上一篇可以參考：【玩樂】大阪 天保山海遊館：來一次深海潛行，估不到依然充滿新鮮感和驚喜。如果有用大阪周遊卡的話，更可以享用100日圓的折扣優惠。會再來多次主要是因為母親第一次來大阪，所以就帶佢來一下睇下，本身自己就冇什麼特別期待的，反正上次也來過，但原來裡面久不久就會有些展覽位更新，所以絕對冇悶場。今日來的時候下著雨，而且都幾早來到，意想不到都幾多人排隊入去，所以都要等左陣先入到去。門口位就要條大鯊魚模型迎接，行入去第一個位依舊係海洋隧道位，不過真係超多人呀！

日本的麵包常常給我一種很精緻的感覺～和港式麵包的風格截然不同，港式感覺就比較草根一點。兒時看一些日本的動畫，麵包是很常見的食物之一，除了可以在便利店買到一些包裝好的麵包，今次就試了一間會新鮮出爐的麵包店cookhouse。Cookhouse本身在大阪地區也有很多分店，我光顧的一家就在地下街Namba Walk入面，連接著地鐵。而且，這間店還有堂食的座位，座位也算幾多，買完麵包可以加錢變套餐，會多杯飲品和烚蛋一隻，但記得食完要自己放返好個盤和垃圾。

第4天（星期五，12/5）

行程：京都 》宇治 》奈良 》大阪  》黑門公寓酒店

うどん梅田こころ亭位於梅田阪急百貨公司的餐廳樓層，會幫襯佢事緣係阪急百貨公司地下是眾所週知買手信和野食的戰場，經過一輪大戰之後，母親忽發奇想要吃烏冬，所以也冇理咁多，求其搵左一間餐廳入去，在這層餐廳層有些餐廳是要等位的，但這間烏冬店完全不屬於之內，所以心裡也有了一點準備。櫥窗的食物擺設永遠是美好的，看看價錢也頗實惠的，也就順便滿足母親的意願。

次次來日本都是以住酒店為主，今次住的這間大阪PG黑門公寓 PG Kuromon Apartment有點似係住民宿，但又唔完全屬於民宿，基本上成棟大廈每個單位也是租借予人作住宿，所以佢會有其中一個單位作Reception。由在網上預訂左之後，佢就會send一些入住資料過來，包括聯絡人資料、門口密碼位怎樣打上Reception等，和民宿不一樣，就是沒有了屋主。先講地理位置，佢係超近黑門市場，轉個彎就會見到，過去道頓堀和心齋橋就行15分鐘左右，而從日本橋站10號出口行過去，也只需要8-10分鐘左右，經過停車場轉入去就會見到個門口，地理上算是旺中帶靜。

釜飯是奈良其中一樣特色食物，用一個傳統小鍋，加入米，並再以高湯、醬油、味醂等調味，鋪上不同配料烹煮，而志津香就是食釜飯的著名餐廳。在接近下午茶時間來到奈良公園附近的公園店，依然有一大班人在等候，估不到一等就等了大半個鐘，建議如果有時間可以去大宮店，那間分店人流會少一點，而且更可以預先訂位。