第3天(星期四,11/5)
行程:難波 》京都 》京都四条微笑酒店
原本今日係好早出門口去食早餐,然後就搭車過京都,點知一早酒店check out左就發生了少少意料之外的事。話說因為會過京都過一晚夜,所以只係帶輕便既行裝過去,而本身個大行李箱就諗住放定去之後過晚嗰間阪近黑門市場既Apartment到,8點9去到㩒極門鐘都冇人應,於是就去左間便利店搵到個好好人的職員幫忙打電話畀嗰邊負責人,原來佢唔似酒店咁個reception長期有人,要成10點先有人,結果只好拖返個行李箱去原先間酒店放多陣,再兩手fing fing行過去Eggs’ n Things(按名食評)空肚食早餐先。食完就返酒店拎行李再拖去間Apartment到寄存。
放低左行李之後,終於可以出發去京都啦,比原定時間遲左一個鐘到~首先要搭去新大阪站,然後就一直跟住指示行去搭JR線,都要行成十幾分鐘,好彩指示清晰,去到13.14號月台就係去京都班列車,趁仲有20分鐘先有車,就係車站逛下商店。
只要搭新快速(野州行),就大約30分鐘內去到京都站啦,不過就唔出站住,會先再轉奈良線(8-10月台),目的地係伏見稲荷大社(可參考舊一篇作詳細介紹:【玩樂】京都 伏見稲荷大社:揚威海外的神社),去到天氣好熱好曬,食返盒抹茶雪糕粒先(只係係京都見過,大阪冇見過)。
參觀完之後就唔係去搭返JR,而係行遠少少,係出大社門口轉右,再去鐵路位行,搭京阪本線(出町柳行)係清水五条站到落,再行上去清水寺,不過路程都比想像中遠,差不多成半個鐘,都幾辛苦下。
事前都知道清水寺現在正進行裝修,不過因為母親第一次來京都,所以也要帶她來一次,當係看一下不一樣的清水寺吧~而個觀景台現在也縮小到得返一細部份,亦見到啲工人係到磨木修葺緊,我就順便求下籤求下自身整體運,估不到抽到大吉呢!
然後就沿返三年坂慢慢行落山,順便買下手信,落到山腳就搭巴士去左大丸百貨到先,因為要去pokemon centre(按名介紹)到潮聖買下野!然後去返巴士站搭車去茶寮翠泉(按名食評)下午茶,雖然其實唔算好遠,但一來行到腳攰,二來買左任搭巴士券,所以搭多幾次也冇壞,就在烏丸高辻站落巴士行入去,這裡的抹茶甜品非常不錯,大力推薦要來試下。
食飽左之後,又搭返巴士去祗園站落,然後就一直順著四条條路行,中途見到河川的日落景色,非常之靚。然後也是看下街店和百貨公司,到差不多時間就去三嶋亭(按名食評)食和牛定食晚餐。
連晚餐都食完,再行多陣消化下,然後就返今晚間京都四条微笑酒店Smile Hotel Kyoto Shijo(按名介紹)休息,返去之前係對面間超市買水果返去食。
「立」即去旅遊Youtube channel、Facebook專頁、Instagram、Pixnet:
Youtube Channel:https://bit.ly/2scNVfk
FB: https://www.facebook.com/lapstravel/
IG:lapstravel
留言列表